Thitumhnak Puai Ah Nihin Cu

Tukum sianginn kaikum ahhin kan hawi le 3 va an ngei cang. A dang pakhat hi May thla hrawngah a ngei ding a si than. Nihin cu kan hawinu pasal ngeih a si i ka va kal ve. Aho dah a si ti cu ka hal duh hlah uh (Bibik le Pa Pum kha rak ka hal hlah uh bia nan duh.) Nan thei hlei lai lo, kan chimh hna zongah (hehehehe).

Khua ka ruahmi cu lailei rian ka rak tuanbalnak sianginn hrawnghrang i sianghngakchia an i duh hmanhah sianginn kan rak chuah tawn hna kha ka mitthlam ah a cuang. Nupi thit, vangeih an rak duh hmanhah sianginn khar lio thengtheng lo ahcun a ngah lo kan rak ti hna kha ka thei than. Nature against zulhphung tangah kanmah zong kan rak i hreng i kan fale zong kan rak hren hna kha ka sianghngakchia thing pawl an hmai bak ka khap lo (atu cu ka va si ti lo nain mu. . .hehe). Hi kaa tuah cun Pathian thluachuah an ti i kan sayate dih lak nih an fale thitumh puai cu telpi a si.

Thitumhnak an tuahnak biakinn ah thitumh puai 2 caankhat te ah tuah ti a si. An Biakinn hi dot sarih a sang i a lenglei zohnak ah cun vawlei pumpi bantuk in design an tuahmi a si. An Church cu Pentecostal Church a si. Kannih kan i telnak puai cu dotkhat nakah an tuah i dotthum nakah puai dang tuah a si ve. Lehthahtu hna pastor hi nu a si i fa pahnih a ngei cangmi a si i Reverend an pek mi a si. Amah nih cun leh a thah hna. An i dawh taktak. An pa he amah he misang taktak an si. A donghlei ah monu le mopa nih lawmhnak an chim ve ve. Mo pa nih monu a nu le a pa sinah, "Ka dawtbik mi fanu dawhte nan ka hrinpiak caah le tlamtling ten nihin tiang nan rak ka zohkhenh piak caah kai lawm," a ti i cu bantuk cun monu zong nih mopa i a nu le a pa sinah a chim ve. An chimmi nih ka lung a ka suk tuk. Ka sining kai ruat. Ka darling nih a ka dawttuk sawk ti phun in "Na ka dawt caah kai lawm," ka ti bal lo i a hringtu a nu zong hi "Ka dawtbik mile a ka dawbik tu na ka hrin piak caah kai lawm," ka ti bal lo . . . (ka tlai taktak ...ti ve ka hau cang lai). Laimi hi kan thih hnu lawngah lawmhnak, dawtnak chim kan hmang tawn. Cu nak cun kan nun lioah dawtnak le lawmhnak hi i chimh ding a rak si deuh timi a ka theihter.

A kik tuk i hmanthlak zong hngak ti loin ka rak tin. Lampi ah Macdonald ka vun ei pah ka umnak ka phak bak in ka email ka vun zoh. Kan Khrihfabu biaruahnak ah thawngtha taktak an rak kan thanhmi ka hmuh. Ka mawnu Malaysia a ummi cu Laitlang lei kan Pastor pa i a naupa he Malaysia ah nihin ah puai an rak tuah tiah thawng an rak kan thanhmi a si. Pathain fonhmi nupa thar hna Bawipa nih dawtnak in an nunchung temtawn ko hna seh tiah lunglawmhnak he thluachuah zaa ka hal piak ve hna. (A sau tuk hoi cang ka si lai u ci mu Bibik le Pa Pum. . .kan tih pah hna eh)