COVID 19 le Zumtu Dirhmun

COVID 19 ruangah vawleipi cu lungmit in a um. Kan thin a phang. Tihnak le lungretheihnak in kan khat. Thaizing ah zei dah a cang lai, kan hngal lo. Biakinn i pumh kha thloh kan si. Asiloah kanmah te in biakinn ah i pum rih lo dingin biakhiah cio a si. Cu tikah Khrihfa tampi nih i pum ko usih, Daniel le a hawile bantuk in ral tha tein um ko usih, an ti. Cun, biakinn ah aa pum lomi kha ralchia le zumhnak thazaang der ah an ruah hna.

Kan philh lo dingmi cu, Daniel cu a Pathian sin thlacam thloh a si. A Pathian he biaruah lo ding cu a duh lo. Cucaah, a tuahkel a simi thlacamnak cu a pehzulh. Cucaah, chiandeih kawm ah an thlak. A hawile pathum cu milem biak fial an si. Cucu an duh lo. Cucaah, meiphu chungah thlak an si. An Pathian caah zumhtlak an si. Zohchunh tlak taktak an si.

Atu lio kan tonmi thil ah, kan philh lo dingmi cu, kannih cu Pathian biak an kan thloh lo ti hi a si. Zawtnak i chawnh lo dingin, minung paohpaoh an him, kan him nakhnga, ralrin an kan fialmi a si. Thil tha tuah an kan fial. Nunzia thiam an kan fial. Kan vawleipi a dam nakding ah le virus a karh lonak ding caah a si. Nihin kan tonmi, biakinn ah pumh kan ngol ta mi hi, Khrihfami hremnak caah tuahmi a si lo. Mirum le sifak, nan biaknak, kan biaknak ti um loin MINUNG kan himnak caah tuahmi a si.

Biakinn lawng hi Pathian a umnak le aa phuannak a si lo. Jacob sinah Pathian aa phuan caan kha amah lawngte a um lio caan ah a si ko. Moses zong Pathian nih burbuk in a chawnh kha amah lawng a um lio caan a si. Jesuh nih a kawhmi hna a zultu kha biakinn ah an um lio ah a kawh hna kha a si lo. Biakinn hi Pathian biaknak caah Pathian sinah pekchanhmi a si caah, thazaang kan laknak le Pathian kan chawnhnak ah a tha khun. Sihmanhsehlaw, Pathian aa phuannak le a hmual a langhnak hi biakinn ah a si bik lo. Zumtu hna nih thinlung tak tein kan biakchawnhnak hmun kha a ngaingai ti ahcun biakinn (Khrihfabu – church) cu a si.

Biakinn kan phanh khawh lo caah kan thachiat tuk ding a si lo. Hawi dang hna he Pathian thangthat ti cu a nuam tuk. Cu lio caan kan ngaih kha kan mawh lo. Nain, Pathian nih caan a kan serpiak than te ko lai. Atu hi mibu dirhmun nak hmanh in pumpak in Pathian kan kawl le kan panh caan a si. Na Baibal kha a langhnak bik na cabuai ah chia law, hun rel hmanh. Pathian sinah thlacam law, na thilrit (na thinphannak vialte) kha thum hmanh, Pathian nih na nunnak ah thawnnak an pek lai, thinlung hnangamnak an pek lai.

Nihin ah, Khrihfa cheukhat (pastor le hruaitu tel in) nih biakinn i pumh an thawn duh lo. Hihi zumhnak thawn ah a ruatmi an um. Anmah ruangah, minung tampi nunnak ah harnak a tlung kho ti an philh rua (an i theihter lo maw, an thei lo dik). Midang sinin anmah hrim virus an i lak khawh i, an dawtmi an chungkhar le an innpa chakthlang tiang an chawnh chin khawh hna. Thlarau nih ralthatnak a ka pek timi hi Pathian thlarau nih cun a si ngaingai hnga maw? Vawleicung hmun tampi ah COVID 19 a karhnak ah aa telmi cu Khrihfabu pumhnak hi a si. Khrihfa hmuisam an chiatter.

Khrihfa biaknak hi hrem duh ah, pumh thloh si usih law, raltha in kan zumhnak caah, Khrih caah kan dir i, kan i pumh ahcun cucu kan zumhnak langhternak le Pathian sinah zumhtlak kan sinak langhternak caah a si hnga i, i pumh kha a tha ko. Khrih nih vawleicung a rat cu “nunnak kha an ngeih i, duhdim tein an ngeih khawh nakhnga ka ra” a ti bantuk Pathian nih a kan sermi kan pum, kan dawtmi hna i an pum himnak le damnak cu kanmah rian bak a si.

Daniel le a hawile bantuk dirhmun le atu kan tonmi i kan dirhmun hi aa dang. Jesuh nih vawleicung i a tlonlen ve lio ah, mizaw kha a damter hna. Zawtnak a karhter lo. Thinghmui zawtnak in a tuarmi kha a damter hna, a thianter hna. Thinghmui zawtnak in a zawmi kha khua chungah hramhram in a luhter hna lo. A damh tu in a damh hna. Cu hnu ah khua chungah an lut kho. Zawtnak a karhnak ding a simi thil vialte hrial cu zumtu a simi paoh le minung a simi paoh i kan rian a si. Nangmah rian a si i, keimah rian a si.