Fapa a hrin la ii a min ah Jesuh na sak lai – zeicahtiah a mi kha an sualnak chungin a khamh hna lai,” tiah a ti. Bawipa nih profet ka in, “Ngaknu cu fa a pawi la ii fapa a hrin lai i a min cu Emmanuel a si lai,” tiah a chimmi a tlin nakhnga caah, hi thil vialte an hung um hi a si. (Emmanuel ti cu Pathian kan sinah a um, tinak a si.) (Matthai 1:21-23)
Hi Baibal caang hi Jesuh chuahnak kong a si. Chuahcam kan lawmhmi hi Jesuh a si i, Emmanuel ti zong in auh a si. Hi nih Christmas sullam fiang tein an langhter. Jesuh a kan khamhtu a chuak ti le cu khamhtu cu kan sinah a um ti hi a si. Kan pawngah a um ko ti kan theih lo ahcun Christmas hi sullam a ngei lai lo.
Nihin cu ka thawh ka in Christmas hla le a dang Pathian hla tete ka ngai. Hla a satu hi Laimi hlasak thiam le aw tha an si. Cun hlaphuahtu zong an thiam. A phuahtu cu aho dah a si, a satu aho dah a/an si timi tete an tial chih. Cu tangah telh chihmi cu “sponsored by” aho te chung asiloah aho nih sponsor a tuahmi a si timi an tial chihmi tete ka hmuh. Khua a ka ruahter. Sponsor tuahtu hna an thawngin hla thatha Youtube le Facebook ah ngaih khawh an si. Thazaang zong an kan pek ngaingai. Sponsor a tuahtu hna nih hla fung khat ah zeizat dah an dih cu ka thei lo. Nain, an dih pah lai ti cu a fiang. Christmas kan tuahmi hi tah aho nih dah sponsor a tuahmi a si? Christmas hi Pathian nih a thawkmi a si. Pathian nih cun a fapa ngeihchun bak pekin sponsor a kan tuahmi a si. Pathian cungah lawmh loin um awk a tha lo. Christmas hi Pathian nih sponsor a tuahmi a si.
Kan sining a har tuk lio a si nain, Christmas thawngtha nih a kan chimhmi cu Pathian kan sinah a um ti hi a si. Sualnak nih a hrulhter mi kan vawlei ah harnak, mitthli tlaknak le hnabei donghnak a phunphun kan ton. Sihmanhsehlaw kan Pathian cu kan sinah a ummi Pathian a si. Kan sin um a duhmi Pathian a si. Kan sinah a um i, kan harnak chungin chuah khawhnak lam a kan kawlpiaktu a si. Kan sinah um ding le khuasa dingin Jesuh cu a chuak cang! Cun sual saltannak chungin kan luat nakhnga amah hrimhrim nih a kan tuaktan. Bethlehem caw inn ah a chuah lawng si loin nauta bik a simi hna kha a cawisan hna, a bawmh chanh hna, a damter hna, eidin a pek hna.
U le nau hna, kan Pathian hi kan sinah a um ko ti hi philh hlah usih. Kan Pathian nih kan retheihnak a hngalh. Kan herhmi a hngalh. Kan duhmi a herh.
Pathian kan sinah a um cu kanmah caah a si. Kan tlin caah a si lo. Kan thiam caah a si lo. Rian kan tuan khawh caah a si lo. Duh kan nun caah a si lo. Amah muisam keng in sermi kan si i, a kan dawt caah a si. Kan i porhlawt ding a si lo. Pathian cungah kan i lawmh ding tu a si.
Minung hi mi thleidan a hmang ngaimi kan si. Chungkhar hmanh ah thleidan kan hmang. Kan fale ciocio a si ko mi kan theidanh tawn hna. Minung hawi ah kanmah caah san a tlai deuh dingmi cu kan komh deuh hna, kan len deuh hna, kan leng u tiah kan sawm deuh hna. Acheu cu an kan leng sual lai ti kan phanmi an um. Thilrit an kan phurh lai tiah kan ruahmi hna an um. An sinah caan tawite hmanh um kan duh lo. A rum deuh mi, aa dawh deuh mi, a fim deuh mi pawngah um cu kan i cuh. An kut tlaih kan duh cio.
Nain, misifak deuh an si ahcun kan chawn zuam hna lo, kut tlaih ding phun ah kan ruat hna lo i, len sawm ding zong ah kan duh lem hna lo.
Nain, Pathian nih cun a zei bantuk kan si hmanh ah, kan sifah ah, santlai lo tuk kan si zong ah, kan sual palh tuk ko bu ah, kan sinah um a duh ko. Kan sinah um ding in aa thim thiamthiam ko.
Kan Baibal ah Pathian nih minung cu a ser hna i Eden dum ah a chiah hna ti kan hmuh. Eden dum ah a chiahmi minung cu Pathian nih zanlei sang ah a veh hna, bia a ruah hna, an sin te ah caan a hmang, ti kha (Gen 2-3) ah kan hmuhmi a si.
Pathian nih Israel mi hna cu Moses hmangin Izipt saltannak in a luatter hna. Sinai Tlang an phan. Anmah he biakamnak a tuah. Nawlbia pahra le a dangdang zulhphung tete tam nawn a pek hna. Miphun pakhat ah a ser hna. Cu dih ah puanthlam sak a fial hna. Cucu anmah sin te ah khuasak a duh caah a si. Cu puanthlam cu Pathian inn ti a si. Siangpahrang Solomon chan ah Jerusalem ah biakinn an sak. Cucu Pathian inn an ti. Pathian an biaknak hmun a si. Pathian an sinah a umnak hmun ah a cang.
Siangpahrang David nih cun, "A thuk bikmi muihnak horkuang chungin kal hmanh ning law, BAWIPA, zeihmanh ka tih lai lo, zeicahtiah nangmah nih na ka umpi" tiah a ti (Salm 23:4).
Profet Isaiah nih cun ngaknu nih fa a hrin lai i a min ah Immanuel tiah ti a si lai tiin a rak chim. An sinah a ummi Pathian nih Israel mi hna cu Babilon saltannak in a rak luat ter hna i, Jerusalem biakinn a rawkmi zong an rak sak than. Pathian an sinah a um hmelchunhnak a si. Pathian an biaknak hmun a rak si.
Kan caah a chuakmi khamhtu hi kanmah sinah um a duhmi a si. Nihin ah Thiang Thlarau in a kan umpi. Christmas sullam cu kan caah khamhtu a chuak, kan sinah khua a sa ti hi a si. Jesuh a kan khamhtu cu kan sinah a ummi Pathian a si. Immanuel (Emmanuel) ti cu Pathian kan sinah a um tinak a si.
Nu le pa, ule nau hna, Pathian cu kan sinah a um ko. Cucu kan i lawmh caan ah, kan ngaihchiat caan ah, kan lungretheih caan ah, zei bantuk caan paoh ah philh hlah usih. Pathian nih cun a kan dawt tuk caah kan sin um a duh ko. Kan minung hawi nih zei an kan rel lo kho men. Nain, Pathian nih cun zei a kan rel ko. Kan sinah um dingin aa thim ko. Cucaah, kan sinah a ummi Pathian cu kan nunnak uktu ah i sawm hna usih.
