GPS

Kum Thar lawmhnak, daihnak, le hlawhtlinnak nan cungah um ko seh!

Pathian cu a tha tuk hringhran. 2008 timi thlua (= tlang) hi kan chuak kho te hnga maw, kan rak ti nain atu cu Pathian zaangfahnak le zohkhenhnak thawngin kan chuak cang. Atu cu 2009 ah kan um cang. Nai Khrismas lio ah Columbus, Ohio um Laimi nih tlangtar ah an i thimmi cu "Immanuel" ti a si. Immanuel ti a sullam cu Pathian kan sinah a um asiloah kan sinah a ummi Pathian tinak a si. 2008 lawng si loin, cu hlan zong ah a rak kan umpitu cu Pathian a si. Kum Thar a kan phanhtertu zong Amah Pathian thiamthiam a si. Hi pinlei ah a kan zohkhenhtu ding zong Amah Pathian a si rih lai. Pathian hi thangthat awk tlak hrimhrim a rak si.

Nai DC lei ka tlawnnak ah ka tonmi nan sinah chim ta ka duh. A dang cu a si lo. Thitumh puai ka zawhnak kong a si. Zaan i puai tuahnak lei ah kan va telpi hna lai tiah, kan kal. Mawtawi pathum in kan kal hna. Kei cu ka upa mawtaw ah ka cuang. Kan hmai ah mawtaw pahnih an kal. Laimi mawtaw pathum i zul in kal cu lung hi aa hmuih kho taktak. Kan hmai kalmi mawtaw pahnih cu an dir ko. Zei dah a cang tiah kan hal hna tikah lam kan tlau ti a si. Elaw, loh bak, kan vun ti.

Cu ahcun ka upa nih GPS a vun i chuah. Cu cun ka thawpi le ka thawte ka chuah. Puai i kal i timh, kan hnu ngai cang vun ti lio i, tlau i, puai tuahnak zong i chuah khawh lo i vaivuanh ko ding cu, a poi tuk ding khi a si. GPS ahcun kan kal duhnak address cu a vun tial. A mawtaw hmai te ahcun a toh. Cun, tuan deuh ahcun, kan hmaiah mawtaw pahnih an kal i, an hnu in kan zulh hna. Nain, atu ahcun kaa citmi mawtaw tu nih hmai a vun sak cang. Ka lungthli tein ka upa hi tuan tein a GPS hi a rak chuah diam ding a si, ka hei ti pah. Nain, amah nih cun kan hmai a kalmi nih lam an theih ko tiah ka ruah i a si, a ka ti i mawhchiat awk a tha fawn lo :-). GPS kan bunh hnu ahcun tlau ding phang lo tein kan kal i, a rauh hlan ah puai tuahnak inn cu kan va phan. Tuan te khan GPS rak bunh sehlaw mu, kan tlau hnga lo, tiah khua ka ruat. GPS i ngeih ahcun hna cu a ngam ngaingai. Kal kan duhnak hmun address kan theih ko ahcun duhnak paoh kal khawh a si.

GPS loin kal khawh a si tawn ko. Nain, lam hlat kal ngam a si lo. Kan kal bal lo nak hmun kal ding ah a har. GPS a um lo ahcun direction i tial asiloah map tal i ken a hau. GPS a ngeimi nih lamtlau sual ding an phang ti lo. GPS hmanh ahhin a tha deuh le deuh lo a um. A cheu GPS cu khua chung ti bantuk luh tikah direction fawi le bai in a hmuhsak kho lo zong an um. Sihmanhsehlaw, Khrihfami nih cun a tha tukmi GPS kan ngei. Cucu Pathian a si. Kan sinah a ummi Pathian, kum 2008 chung lam a kan hruaitu Pathian, kum 2009 lunglawm tein a kan phanhter tu Pathian hi a si. Amah belte, GPS cu kan ngei nain, kan hman lo ahcun san a tlaih lo bantuk in, Pathian hi kan nunnak lamhruaitu ah kan i sawm ve lo ahcun, kan nunnak ah phan awk a um lengmang ko lai.

Cu caah, kum 2009 kan thawk cangka hin kan nunnak lamhruaitu dingah Immanuel, kan sinah a ummi Pathian, i sawm hna usih.