Israel mi hna cu an umnak ah paam a tlun caah Josef chan ah Izipt ram ah an pem. Josef a thih hnu ah, Josef a thei lomi Faro nih sal ah a ser hna. Faro nih Josef a hngal lo tiah Exodus ah kan hmuh. Nain, Faro pakhat a simi nih an ram mangtam in a rak khamhtu hna Josef theih lo cu a si kho lo. Asi kho deuhmi cu “hngalh a duh lo.” Hi nih Kawlram tuanbia zong ah Bogyoke Aung San hruainak in Panglong Hnatlaknak an rak tuah. Cucu Kawlram hruaitu, a bikin ralkap nih an i theihter duh lo.
Israel mi hna an tah hramnak cu Pathian nih a theih i a hngalh. Cucaah Moses cu Faro sinah a thlah. Moses nih a u Aaron he Faro cu an va ton. Zei tin dah sal a simi, Faro ralkap a thatmi pa kha Faro nih a ton duh hnga? A tlaih in thong ah a thlak hnga lo? Ruah lo awk a tha lo. Exodus cauk kan rel cangka, Faro nih Israelmi an karh kha a duh lo i, a phunphun in an karh lo dingin a kham hna. A hnu bik ah fapa an ngeih ahcun thah dingin nawl a chuah. Levi chungkhar nih fapa te an ngeih. Cu an ngeih khawh i, thah a si lo cu naungeih tertu pahnih nih Pathian an tihzah i an luatter caah a si.
Cu fapa te cu a nu nih a thuh khawh tiang a thuh. A thuh khawh ti lo tikah bawm a ser i, tiva i a kam hruang lakah a va chiah. Cucu a farnu kha lamhlat in zoh a fial. Tiva ahcun Faro i a fanu le a lalang pawl tikholh dingah an ra. Faro fanu nih bawmte cu a hmuh i a salnu kha lak a fial. Faro fanu nih bawm chung i ngakchiapa te a tah a hmuh tikah “A zaang a fak ngaingai i, ‘Mah hi ngakchiate hi Hebru mi hna ngakchia pakhat a si ko lai’ tiah a ti” (Exod 2:6). A farnute nih Faro fanu cu ngakchia zohkhenhpiaktu dingah Hebru minu pakhat kan auhpiak lai tiah a ti. Faro fanu nih a farnute cu na ta a si maw, na auh dingmi hi ngakchiapa i a nu a si lai maw ti bantuk a hal lo. A hngalh ko lai. Nain, ngakchiapa i a nu cu “Va ka cawmpiak. Cun, na cawm man cu keimah nih kan pek lai” tiah a ti. Ngakchia cu a ngan nawn tiakah Faro fanu sinah cun a nu nih a kalpi. Faro fanu nih a fapa ah a rak i ser (Exod 2:10). Moses tiah min a sak.
Israel mi Izipt ram chungin a chuahpitu hna Moses hi Faro fanu nih a tanpi mi aa cawmmi fapa a si. Faro fanu nih rak i cawm hlah sehlaw, tuanbia hi phundang piin a kal ko lai. Faro ton i an kal tikah an tong kho lai lo. Faro fanu i a fapa a si caah Faro zong a ton khawh. Faro fanu hi “zaangfahnak” a ngei. A pa nih a ralmi hna kha anih nih a zaangfak hna. Moses aa cawm hnu, kan tuanbia ah Faro nih ngakchia dang a thah hna ti kan hmu ti lo. Faro fanu nih thil hman a si ko ahcun a pa nih a ralmi kha a tanh ko. A pa nih thil tha lo aa thim i a tuah lio ah, anih nih cun thil tha aa thim i, a thi dingmi ngakchiapa Moses kha a khamh, a cawm i, hruaitu tha ah a sersiam.
Israel mi nih Izipt ram in an luatnak dingah a chungmi (Faro fanu) hi a rak biapi tuk ti hi cinken a phu. A chungmi le a lengmi i bawmh i tanti a herh. Nihin Kawlram dohthlennak zong ah mizapi cu lung aa rual ngaingai cang. A chungmi ralkap le an bawile nih thil tha an i tim i, mizapi lei ah an tan a herh tuk. Nai ah Dr. Lian Hmung Sakhong nih ralbawi pawl cu mizapi lei ah tang u tiah a forh hna. Cucu a hman tukmi a si. Ralbawi pawl an fale chung in siseh, anmah ralbawi pawl chung lila in siseh raltha tein mizapi lei ah thilhman caah an tan ve ahcun tuan ah teinak kan hmuh hrimhrim lai. Cu a si khawh nakhnga, sawm hna le forhfial hna zong a herh ngai.
