Ka Len Tawnmi Blog Pawl

Ni khat ah voikhat cu a tlawm bik blog pawl ka kau hna i, an tialmi ka rel tawn. Mirang blog ka len tawnmi pawl cu ka langhter lai lo. Laimi nih nai hrawng cu blog tete kan vun tuah pah hna i, lawmh awk ngai a si. Amah belte, pumpak le minung pahnih thum komh lawngin tuahmi, man pek loin tuahmi an si caah, duhning tluk in carel awk an kan chiahpiak kho rih lo. Nain, an chiah tawk, an kan thanh khawh tawk tete zoh ah lung aa hmuih ngaingai. A tanglei hi nai hrawng i ni fatin ti awk in ka len tawnmi blog pawl an si:

1. Nunnak Lamzin timi Pastor San No Thuan nih a tuahmi a si. Atu lio i a tarmi cu "A Hmunmi Dawtawk Daan" timi a si i, pehzulh tein hi kong hi tial aa tim. Rel phu taktak a si.

2. Hawikom timi Pastor Ngun Thawng Lian nih a tuahmi a si. A tuahnak a sau rih lo. Ca a tarmi zong a tam rih lo. Nain, a tarmi hnih khat hi an tha, rel phu taktak an si. Nai i a tarmi cu "Atu lio Israel le Hamar Ral Ramhnak" a si.

3. Meifar Cazual timi a si. A hmasa ahcun minung pakhat lawng nih ca a tial tawn. Nain, atu ahcun catialtu hi paruk an si (anmah tialning ah). Thawngpang thanhnak ah an tuahmi a si i, anmah nih an tialnak ah: "Vawleicung thawngpang, Kawlram thawngpang, Laimi thawngpang relnak" ti a si. A thawktu hi Malaysia ah a ummi a si. Atu lio i an tarmi cu "Kawl cozah nih American professor pa le a nupi an kirter hna" timi a si. Thawngpang theihtlei tete an thanh tawn caah rel phu ngai a si.

4. The Chin Herald timi Chumto (Korea a ummi) nih a tuahmi a si. Hmanthlak tampi a tar khawh caah len a nuam. Kan hnulei hrim cu Hakha hmanthlak tampi a tar i lungleng ko in a ka tuah. Atu lio a tarmi cu "Chin National Font Bawm Hna Usih" timi a si.

5. Biaknak-Hmurka timi a si. Atu lio a tarmi cu mah kong hi a si ko hen cu :-) Ni fatin ka lenmi blog a si ve cu mu :-) :-)

Blog dangdang zong an um pah nain, update an tuah kho hna lo i, atu tiang ahcun len phu in ka hmu hna lo. Ca tam deuh, thawngpang tam deuh an tar tikah, an kong ka thanh than te lai.