Mawngtu

Minung kan nunnak cio ah a kan mawngtu thil an um cio. A thami thil nih a mawnghmi cu thlua an chuak i upatmi ah an cang tawn. Nain, thil thalo nih a mawnghmi cu mibu chungah buainak a chuahpi tu an si tawn. Cucaah, mawngtu thil hi minung kan nunnak a thatnak le a chiatnak kong ah lai a rel ngaitu a si. Rick Warren nih The Purpose Driven Life timi cauk a tialmi chungah minung nunnak a mawng tawntu thil panga a langhter.

Pakhatnak, minung nunnak a mawngtu pakhat cu phuhrunnak a si. Minung nih phuhrunnak a ngeih tikah thil tha lo tampi a chuak tawn. Zoh kel in zoh komi hmanh kha huat zoh in an ka zoh tiah i ruah sual a fawi. Phuhrun kan ti tikah a liamcia caan ah thil thalo rak tuahmi ruangah a si bik tawn. Phuhrunnak nih a mawnghmi nunnak cu a nuam kho lo. Caan a rauh tikah hawi sin hmanhah chuak ngam lo tiangin mi a tuah kho. Cucaah phuhrunnak nih a mawnghmi si lo ding ah atu lio tein kan i ralrin a hau. Atu kan tuahmi thil nih kan hnu in a kan zulh ti kha philh lo i thil tha tuah aa zuammi si i zuam awk a si.

Pahnihnak, minung nunnak a mawngtu a dang pakhat cu lungsilonak asiloah thinhunnak a si. Midang nih thil tha lo kan cungah an tuah tikah kan thinhung theo. Cu bantuk thinhunnak nih nunnak a mawngh sual ahcun thil tha lo tampi a chuak kho. Mi pakhat cungah lungsi lonak asiloah thinhunnak kan ngeih tikah amah nakin kanmah kan i sungh deuh. Aruangcu, kan ton paoh ah kan lungnuam lo. Nain, amah cu a zei a rak poi ziar lo. A theih hmanh a rak thei lo kho. Cucaah, thinhunnak nih a mawnghmi kan si lo ding a biapi ngai. Thinhun tikah thil a chia tha thleidan a har tuk. Cu bantuk caan ah biakhiahnak tuahmi cu a palh fawi te. Thinhunnak nih minung nunnak ah hmunhma a lak tikah ngaihchiatnak, sivanghnak le thatlonak a chuahpi tawn ti kha philh lo i dawtnak le ngaihthiamnak nih a mawnghmi si i zuam awk a si.

Pathumnak, minung nunnak hi tihnak nih a mawngh tawn. Tihnak kan timi hi a ngaingai ti ahcun mah le mah harnak i pek khi a si. Kan nunnak ah tihnak a um tikah tuah awk a simi thil kha tuah ngam loin um a si tawn. Cun, tuah lo awk a simi thil kha tuah sual zong a fawi. Nihin kan ram zong ah tihnak kan ngeih ruangah chim lo ding kan chimmi a tampi. Tuah lo ding kan tuahmi zong a tampi. Tihnak hi thil tampi ruangah a chuakmi a si. Tahchunhnak, thil tha lo kan tuah sual tikah mi pakhat nih a kan theih. Cu tikah, midang nih a kan hngalh lai ti phan asiloah tih a hung si. Cucaah, tihnak teinak ah a tha ngaimi cu dinfelnak a si. A dang tahchunhnak pakhat, Laimi cu i thih a hmang ngaimi kan si. Ngakchia kha heh tiah kan thih hna. Ralchia lak in kan tuah hna. Cu bantuk in thihmi cu a than tikah hawidang hmaika ah aa langh ngam ti lo. A tih. Tuah ding thil a tuah ngam ti lo. Cu ruangah thil tampi a sung. Hihi Laimi nih kan hrawh zokzok ding a si. Nulepa nih fale thih hrimhrim lo ding a si. Zei cah tiah, tihmi kan ngeih ruangah kan tlolhmi thil tampi a um. Kan sunghmi zong tampi a um tawn. Thil tha tuahnak in tihnak a teitu si i zuam awk a si.

Palinak, thilri duhtuknak zong nih minung a kan mawngh tawn. Thilri duhtuknak hi ruahnak palhmi in a chuak tiah ruah a si. Caan tampi ah cun thilri tampi ngeihnak nih lawmhnak le nuamhnak a chuahpi tiah ruah a si. Cu ruangah mi tampi nih thilri tampi ngeih kha an i zuam. Asinain, thilri ngeihnak nih lawmhnak ngaingai hi cu a rak chuahpi kho tuk lem lo. Cucaah thilri duhtuknak nih a mawnghmi cu thilri ngeih an i zuamnak nih thil tha lo lei ah a kalpi tawn hna. Pakhat hnu pakhat in ngah le co an duh caah an nunnak ah a nuam lomi thil tampi a chuak tawn. Baibal bia in chim ahcun phaisa duh tuknak cu thil tha lo vial te i a hram a si. Chawva cu minung nunnak ah a herh ngaimi a si caah kawl ding cu a si hrim ko. Nain, chawva le thilri nih a mawnghmi si lo ding tu cu a biapi ngai.

Panganak, minung nunnak ah duh ngai ciomi cu midang nih thangthatmi le hnatlakpimi si a si tawn. Cucaah mi tampi nih cun midang hnatlakpinak ngah duh ah midang lungton an i zuam. Mi kip tein lungton khawh a si lo caah a donghnak ah cun hnabeidonghnak nih a uk tawn hna. A caan ah cun midang lungton duh ah thil hmaan lo zong kha an tuah ko. Cu thil a hung zultu cu lawmhnak si loin lungretheihnak le phuhrunnak te hna an si tawn. Cucaah, minthat duh tuknak le thangthat duh tuknak nih a mawnghmi si lo ding zong a biapi ngai. Minthatnak hmumi si cu a tha. Nain, thangthat duhnak nih a mawnghmi si belte cu thil tha si dawh a si ti lo. Thatnak tuah duhnak nih a mawnghmi si tu cu a tha. Zei cah tiah, thatnak a tuahmi ruangah thangthatmi cu a si hrimhrim ko lai.

A cunglei ah kan langhter bantuk in kan nunnak a kan mawngtu thil kong ah i ralrin ngai kan hau. 1) Kan pumpak nunnak ah zei nih dah a kan mawngh? Duhfah hakkauhnak nih maw, thatnak tuah duhnak nih dah? 2) Kan Khrihfabu hi tah zei nih dah a mawngh? Phun tanhnak nih maw, Khrih zumhnak le dawtnak nih dah? 3) Kan miphun a kan mawngtu thil hi tah zei dah a si? A kan mawngtu thil hi thatnak le dawtnak Pathian thinlungput a si ahcun Laimi kan ngan a dam lai. Thluachuakmi zong kan si ko lai. Phunhrunnak, tihnak, thinhunnak, thilri duhtuknak le mahthangthat kawlnak nih a mawnghmi kan si sual nakhnga lo thil tha tuahnak ah kan tan a hau. Zei nih dah a kan mawngh?

Theihternak: Thomas Cung Bik nih Muko Magazine (June 2005) ah a tialmi a si.