An Ka Forh Eh

Nizan ah "Umhar Phen Cio" timi ka tial i ka tar (na rel rih lo ahcun a tanglei ah a um ko khih). A relmi hnih khat nih kan duh ngai, tiah an ti (an vel hle in an in ti ko cuh, ka ti hlah ulaw, ka tha nan ka chiat ter sual lai). Ka hawinu Lai Rawn nih online i chatting kan tuahnak ah, na tialmi a dang nakin a rel a nuam deuh, mah bantuk kha kan tial piak lengmang a ka ti. A vun ka fak ta, ka ti lai cu. A tha tho seh tiah a ka fak ti cu ka theih ko nain, ka nuam thiam. Fakmi si zong hi a nuam ko cuh, i pheh lo tein chim ko ahcun. I pheh lai cih u, nan duh cio ko khah :) Fak a tong lo hmanh um a si cu mu :) :)

Atu hi a ka fak ruangah tial than ding ka tim. Zei ngai tial ding belte ka thei lo. A ka hrawh bak ko, a ka buai ter. Ka fak chap rih seh tiah zei maw tial le ka duh fawn. Aize, "fak" timi biafang hman ding a si ti rua lo, "forh" ka ti cang lai. Forh i kan i ziak cio. A ziak deuh le deuh lo lawng kan i dang. Kan ngakchiat lio ahcun, kan ral chiat ngai ko zong ah, kan ule nih an kan forh i, an kan velh ter caan a um. Kei belte hi ka vel tuk lo, ka theih tiang ah voi nga ruk lawng a si lai dah, forh chom i velh cu :) :) Cu bantuk forh chom in thil tuah cu ka ngol cang lai, ka ti nain, ngol khawh ngai a rak si rua lo hi ta. Nangmah na thawng deuh, na thiam deuh an ti ko ahcun, kan i lung hmuih tuk. Keimah lawng forh aa ziak ah ka ruat lai usih. Nan si cio ko khah, i pheh hlah u. Muithla nih an thih sual hna lai. Nanmah kanmah cu chim lo, mifim pipi timi hmanh forh an i ziak ko si. Ka phuang lai u cih law, ka lo lai :) :)

Mah lungtho a si lomi forh chom thil tuah a poinak cu a lang colh ko. Tial ding ka thei ti lo, forh chom, forh chom in tial cu. Ka ngol than ko lai, a ruah zia thiam ko uh :) :)

Ka chim ta lai, ka siaherh ai. Lai Rawn nih mah bantuk kha tial lengmang tiah a ka forh nain, amah nih a tial ve hlei lo cu mu. Mi lawng forh, mah nih le tuah ve hlei lo. A si te a si lo, a mui te he, ti ko ning. A mui te he ka ti hi atu a voi thum nak hrawng lawng a si rih ko lai dah :) :)

Keimah lung chuak a si tikah ka tial than te lai. Nain, kan chimh cia hna. Ka lung chuah lo ahcun ka tial fawn lai lo. Khah, ngol zokzok ning, ka tial deuh, ka vaivuan deuh; ka vaivuan deuh ka tial deuh. Elaw, a zual chin ai. Mah vial.