Friday, June 5, 2009

Minhleng Catial (Pseudonymity)

Efesa, Kolose, 2 Thesalon, 1-2 Timote le Titas kong kan zoh hlan ah, “minhlennak” (pseudonymity) kong hi zoh ta usih. Minhlen ti tikah a cheu caah mit kha fak piin i au i, ziah Pathiah thawchuahmi a si lo maw, ti dingin a um. Langhter colh ka vun duhmi cu, kan theihmi Paul catial kha Pathian nih thaw a chuah khawh bantuk in kan theih lomi, Paul min hmangin ca a tialtu catial zong hi Pathian nih cun thaw a chuah khawh thiam ko.

A cunglei ah kan langhtermi cauk hna hi Biakam Thar lei hrilhfiah a tialtu tam deuh nih cun “minhlenmi” (pseudonymous) tiah an ruah. Minhlenmi tiah ruah chih rihmi cu 1-2 Piter, Judas, Jeim, le Biathlam hna hi an si. Asi ahcun “minhlennak” timi cu zei dah a si? Hlan lio ca an tialning kha hngalh kan hau.

Hlanchan vawlei ahcun siangngakchia nih an saya (cawnpiaktu) nawlcawn an cawng. Mah tein ruahmi lawng kha a za hrim lo. Siangngakchia cu an sayate i an ruahnak kha an cinken ter (memorize) hna i, anmah kha an sayate an si ti bantuk khin cucu an nolhter tawn hna. Tahchunhnak ah, Paul siangngakchia nih cun Paul nih a ruah bantuk in khuaruah a cawn lai i, Paul nih a chim bantuk in chim a cawn lai. A sianginn kai a dih tikah a saya i min in a chim khawh lai. Aho hmanh nih “Paul nih a chim” ti tikah zei an ruat lai lo. A ngai ti ahcun, cu ti cun tuah dingin ruah deuh cu a si.

Cu caah, caan a hung kal deuh tikah, Paul siangngakchia hna nih Paul a thih hnu ah, cucu an pehzulh i, thil sining thar pawl ahkhan Paul min in an chim i, ca an tial. A cunglei ca hna hi Paul siangngakchia hna lakah hram rak bunhmi si dawh a si i, an tial tikah Paul min in an rak tial. Chanthar siangngakchia nih cun hihi lihchim a si tiah an ruah ko lai. Nain, hlanchan mi hna caah cun, cucu tuah tawnmi a rak si.

Cu caah, chanthar fimthiam (scholar) nih cauk kha minhlenmi (pseudonymous) tiin an chim tikah, chim duhmi cu, hi cauk cu minthangmi saya pa min in a siangngakchia nih a tial ti nak a si. Paul nih a tial ti tawnmi kha minhlenmi an si kan ti tikah atu hi kan chimmi hi ruahchih in chimmi a si.

No comments: