Thursday, June 11, 2009

Filipi

Filipi cakuat hi Paul nih Rom khua i thonginn chungin 61-63 CE kar ah a rak tialmi a si. Filipi khua hi khua phundang ngai a si. Rom cozah ralkap pensen cangmi pawl an umnak khuate phun khi a si. 42 CE i ramchung ral lio ah Rom ralkap a rak tuanmi cheu khat nih pension can ah ram (land) an rak ngah i, cu an ngahmi ram cu Filipi le pawng hrawngah hin a rak si. Thessalon khua i nichuah lei ah a ummi a si. Filipi khua i Khrihfa hna hi ralkap hlun pawl le an chungkhar hna si dawh an si.

Paul nih hi khua hi 50 CE hrawngah, a voihnihnak thawngtha chim a khual tlawn tan ah, thawngtha a rak chimh hna. Filipi Khrihfabu hi Paul nih a dawt ngaimi le Paul riantuannak zong ah a bawm ngaimi an si.

A cakuat tungtlang zohin Paul nih zei ruangah dah hi cakuat hi a tial ti cu a fiang ngai ko:
1. Kuttlaihnak le Lunglawmhnak Chimnak (1:1-11)
2. Paul nih thonginn chung i a sining kha a chim (1:12-26)
3. Khrih thangthatnak hla (1:27-2:16)
4. Paul nih hmuh than a duh hna (2:17-3:1a)
5. Cawnpiaktu hmanlo i ralring hna uh (3:1b-4:1)
6. Lungrual dingin forhfialnak (4:2-9)
7. Filipi Khrihfabu nih an bawmhchanhnak le a lunglawmhnak (4:10-20)
8. Thluachuah Peknak (4:21-23)

Hi Filipi cakuat cu Paul le Filipi i a ummi a hawile hna kong a si. An i pehtlaihnak ah pakhat le pakhat an i bawmhchanhnak kha a lang. Paul nih dawtnak in thawngtha a chimh hna i, annih zong nih dawtnak in a riantuannak ah an bawmh ve.

No comments: