Nizan kha Philadelphia i a ummi Bibik le Sanno, cun Princeton in ka hawile (Yaw le Pann) tiah Baltimore lei kan va tlawng. American kan hawinu motor in kan kal. Mah kan hawi nu cu Kawlram ah cachimh lei in mission rian a rak tuan, a tuan lio, a tuan rih lai, mi a si. Kawlram lei in US ah ca a rak cawngmi a kan dawt, a kan zohkhenh tu kan nu ngaingai khi a si. Princeton le Philadelphia ah sianginn a kaimi kan zate nih kan nu ah kan i ruah i, kan i hngatchanmi kan suttung a si ko.
Baltimore hi New York, Chicago le Los Angelis te pawl bantuk in US min ngei khua a si lo kan ti ko lai. Zeicatiah, a khua hi a cunglei khua tluk cun a ngan in minung an tam rua lo ka ti Nain, a khua hi a nuam phun khi a si. Lennak ding hmunhma a tam, um nuam te khi a si ko. Nizan cu Aquirium (nga hmuh saknak) ah kan len hnu ah Thai Restaurent ah rawl kan ei hna. Thai rawl cu a tam ngai caah, duh le duh lo awk zong thei hua ha loin, pakhat hnu pakhat kan teh. Lai holh in ma kha a thaw deuh rua pakhat nih a vun ti, pakhat nih kei hmakphek ai tel mi cu ka ei kho lai lo hi, a vun ti. Mipi nih ar ngai in an kan zoh. Ziah! Kan pum rua ai za pah caah a si kho men ka ti, nain anmah nakin a ngan deuh mi pakhat hmanh kan i tel lo. A si deuh rua lo. Ka theih cang! Laimi kan si, Lai holh kan holh caah a si. America mi kan si lo caah phun dang deuh in an kan zoh a si kho men. Aww! Nain!
Genesis nih vawlei cung miphun poahpoah hi Bawipa mui keng in sermi lawngte kan si a ti. Laimi zong Pathian mui kengin sermi kan si ve. Laimi kan si i Lai holh kan holh lio ah Bawipa ai lawm ve ko lai. Laimi kan si hi kan i lunghmuih khawh ahcun, Pathian zong aa lung hmuih ve ko lai. Shan hlasak thiam Sai Htee Saing kha Kawlmi pawl nih cun "taing-yin-ta a-tan-wee" caah kan duh an ti. Cun, "ka-ru-naa a-tan" a ngei an ti. Sai Htee Saing nih tlangcungmi ka si caah kaa lawm a ti. Laimi zong nih Laimi ka si caah Bawipa kaa lawm ti ve hna u sih.
No comments:
Post a Comment