Zumhtlak Khrihfa

CIM Caanhmannak ( 22nd Nov., 2009)

Caantlaitu : Ngun Thawng Lian, Japan

Thawngtha chimtu : Saya Thomas Cung Bik, USA

Bawi Krih ah hawidawt hna,

Kan Bawipa Zisuh Krih minin nan kut kan tlaih hna. Pathian Dawtnak, Velngeihnak le Daihnak cu nan zapi cung ah hmun tthan ko seh.

Psalm 96: 1-3 "Bawipa cu hla thar in thangtthat uh! Bawipa cu hla in thangtthat u, a kan khamhnak thawngttha kha nifa tein chim u. Miphun hna sinah a sunparnak kha thanh u, mi vialte kha thil lianngan a tuahmi kha chim hna u"

Psalm 84 :1,2 "Maw Lianngan bik Bawipa , zeitluk in dah na biakin cu ka duh! Cu ka i um cu ka duh hringhran! Bawipa Biakin chungtual cu ka ngai hna. A nungmi Pathian cu ka nunnak dihlak in hla in ka thangtthat."

Hawidawt hna, nihin thawngtha bia a kan chimtu cu Saya Thomas Cung Bik, USA asi. The Lutheran Theological Seminary at Philadelphia, USA ah (PhD student in Old Testament) Biakam hlun lei in doctor acawng lio. Miding fel asi pin ah ahmet tein Pathian a ttihmi asi i miphun a dawtu zong asi. Nai teah Laitlang ah a va tlung, Pathian nih Inchung dawhte zong thlachuah a pek. Kan lawmhpi hringhran. CIM ah ruahnak le thazaang a kan pe lengmang tu asi. Thawngtha bia he kan sinah caan a hman tthan khawh caah lawmhnak nganpi kan nei.

Thawngtha bia kan ihrawm hlan ah 'Blessed be the Lord God Almighty' timi Bawipa thangthatnak hla ngai hna usih.

Saya Thomas Cung Bik:

CIM ah thawngtha chimnak caan sunglawi ka hmuh caah Pathian min ka thangthat; cun caan a ka petu kan upale cungah kaa lawm.

Baibal relnak: Matthai 25:14-30; Biathlam 2:10

Zumhtlak Khrihfa

Matthai 25:14-30 hi Jesuh nih a chimmi bianabia a si. Mipa pakhat nih a sinum pathum kha, anmah le an thil ti khawh ning hoih in, phaisa 5000, 2000, le 1000 tiin a phawt hna i, khualtlawnnak ah a kal tak hna. Thong nga pek a simi pa nih phaisa cu a lehthal i, a dang 5000 bak a hmuh. Thong hnih pek a simi pa nih phaisa cu a lehthal ve i, a dang 2000 bak a hmuh. Sihmanhsehlaw, thong khat lawng pek a simi pa nih cun vawlei ah khor a cawh i, a bawipa pekmi phaisa cu a phum.

Mipa (an bawipa) a rak kir tikah a auh hna i, zei tin dah phaisa an hman ti kha a hal hna. Pakhatnak pa nih cun 10,000 a rak chuahpi. Cu tikah a bawipa nih “zumhtlak saltha” a ti i, “thil fate ah zumhtlak na si caah thil nganpi caah tuanvo kan pek lai” tiah a thangthat. Pahnihnak pa nih 4,000 a rak chuahpi. Cu tikah a bawipa nih cun “zumhtlak saltha, thil fate ah zumhtlak na si i, thil nganpi caah tuanvo kan pek lai” tiah a rak thangthat ve. Sihmanhsehlaw, pathumnak pa nih cun 1000 te lawng, a rak pekning tein a chuahpi. Cu tikah a bawipa nih “zumhtlak lo sal” tiah a rak mawhchiat. Ziah na karh ter lo, a rak ti.

Pathumnak pa kong kan theih tik paoh ah, kan mawhchiat colh tawn. Minung a si caah, a mawh lo ngai ve, tihi kan philh lo awk a si. Hipa a mawhnak belte cu a tinco mi a karhter lomi zawn ahkhan a si.

Zei ruangah dah phaisa a karh tertu hna kha an bawipa nih “zumhtlak” tiah a ti hna hnga? Kan tuanbia nih cun karhnak (thiltha lei in) a chuahpitu kha “zumhtlak” a ti hna. (karhnak = zumhtlak kan ti ko lai). Phaisa zeizat an chuahpi ti nakin, an comi phaisa kha zei tin dah an tuah timi ah zumhtlak sile silo cu aa hngat ti kha kan hmuh khawh. Kan pahrang hoih in zei tluk in dah kan i pekchanh ti kha a biapi, ti kha a lang. Jesuh nih an thilti khawhnak kha tha tein a hmangmi kha zumhtlak tiah a ti hna.

Zumhtlak sinak kong he pehtlai in thil pahnih chim ka duh: Pakhatnak, minung le minung karlak ah zumhtlak sinak le pahnihnak ah, Pathian he kan i pehtlaihnak ah zumhtlak sinak.

Minung le minung karah zumhtlak sinak:

Nihin ah zumhtlak sinak timi kan chim tikah, midang cungah fahnak kan tuah lo, midang kan hleng hna lo, ti tiang lawng kha si loin, kan thil ti khawh tawkin midang caah kan nung maw ti kha chim duh deuhmi a si.

Minung le minung karlak kan ti tikah, pakhatnak ah, kan chungkhar ah zei tin dah kan i pehtlaih ti kha, ruat hmasa hna usih ti ka duh. Chungkhar ah nuleva karah zumhtlak kan si maw? Kan vale, kan nupi le zei tluk in dah kan lawmhter hna lai? Kan ti khawh tawkin kanmah he aa pehtlaimi cungah thiltha tuah i zuam kha Jesuh nih a kan cawnpiak duhmi cu a si ko. Nulepa le fale karah zumhtlak kan si maw? Kan nule kan pale caah thil tha tuah kan i zuam maw, tihi kan ruahthan a hau. Tuah aa zuammi si ding kha Jesuh nih a kan duh piakmi cu a si.

Kan hawidang he kan i pehtlaihnak ah zumhtlak kan si maw? Kan thil ti khawh nak kha midang caah kan hmang maw? Kan hman deuh tikah thil tha tam deuh kan chuahpi ko. Kan lakah harnak a tongmi an um tikah kan bawm hna maw? Kan thil ti khawh nak kha midang caah kan hman tikah cucu Jesuh nih zumhtlak a timi cu a si.

Kan Khrihfabu he kan i pehtlaihnak ah zumhtlak kan si maw? Chungtel sawhsawh si lawng kha a za lo. Zumhtlak a simi, aa pechanmi kan si a hau. Khrihfabu a thannak dingah zei tluk in dah ka tuah khawh ve lai timi lungput kha “zumhtlak” a simi lungput cu a si. Khrihfabu nih a kan pekmi tuanvo ah zumhtlak kan si ding zong a biapi ngaingai.

Kan ram le kan miphun cungah tah zei tluk in dah zumhtlak kan si, ti zong ruah ngai a hau. Ka dawt ti sawhsawh lawngin a za hrim lo. Thil tha chuahpi i zuam a hau. Pumpak nih kan thil ti khawhnak zawn aa dang cio lai. Kan thil ti khawhnak aa dang ciomi kha kan hman cio ahcun cu nih cun thil tha a chuahpi lai. Kan ram ca zong ah damnak a si lai. Phundang in kan chim ahcun zumhtlakmi kan si ah cun thil tha kan chuahpi khawh ko lai.

Pathian he kan i pehtlaihnak ah zumhtlak sinak:

Pathian nih nunnak le damnak, tuan khawhnak le thilti khawhnak a kan pek. Cucu amah caah nunnak dingah an si. Midang caah nunnak dingah an si. Pathian cungah zumhtlak zei tin dah kan si lai? Thil tampi chim awk a um. Nain, atu tan ahcun pathum te ka chim lai.

Pakhatnak, thlacamnak nun ngeih in Pathian sinah zumhtlak kan si a hau. Thlacamnak cu Pathian he i pehtlaih a si. Pathian he i pehtlaih lengmang kha Pathian duhnak a si.

Pahnihnak, Pathian biaknak ngeih peng nakin Pathian sinah zumhtlak kan si a hau. Zei tluk tha in dah Pathian kan thangthat lai, kan biak lai tihi ruah ngai a hau. Kan nunnak hi amah sunparnak caah hman ding kha a kan duhpiakmi a si. Phundang in chim ahcun, zumhtlak kan si ding kha a duh.

Pathumnak, Pathian rian ah i telnak in Pathian sinah zumhtlak kan si a hau. Pathian rian hi a phunphun a um. Kanmah le kan zawnah tuanvo an kan pekmi paoh kha tha tein kan tuah ahcun cucu Pathian rian felte tuah a si ve ko. Khrihfabu thanchonak dingah zei tluk in dah kan i tel ti kha Pathian rian caah zei tluk kan i tel ti he aa khat ko. Midang nih Pathian an nunnak ah aa phuan ko an hmuh le an hngalh nakhnga, zei dah kan tuah lai?

U le nau hna, Pathian nih cun a thil ti khawhnak (a fat asiah, a ngan a si ah) kha a hmang i, midang caah le Pathian caah aa pumpe mi kha zumhtlak tiah a ti. Biathlam 2:10 ahcun “Thihnak a si hmanh ah ka cungah zumh awk tlakte in um ko u, cun nunnak sui luchin kha kan pek hna lai” tiin kan hmuh. Zumhtlak mi si hna usih.

Kaa lawm.

Thomas Cung Bik

Philadelphia

Theihternak: November 22, 2009 ni CIM caan hmannak kan tarmi a si.