Easter Sunday

CIM Caanhmannak (12th April, 2009)
Easter Sunday

Caantlaitu : Ngun Thawng Lian, New Delhi, India

Bawi Krih ah Zumtu nu le Pa hna,

Thihnak in atho than i misual mi hna kan caah khamhnak akan siam piaktu kan Bawipa Zisuh Krih a min thangthat si ko seh. Pathian dawtnak, velngeihnak le daihnak cu zumtu dihlak kan cung ah athar in um than ko seh.

Nihin cu Zumtu hna kan caah nisunglawi khun ni asi. Kan Bawipa Zisuh Krih thihnak in a thawhthannak ni asi. Kan Bawipa nih a kan pekmi teinak ruang ah bawipa cu thangthat chinchin hna usih.

Psalm 103 "Maw ka nunnak Bawipa cu thangthat tuah! Ka sining vialte a min thiang cu thangthat tuah u! Maw ka nunnak Bawipa cu thangthat law zeitluk in dah zaangfahnak a ngeih kha philh hlah. Ka sualnak vialte kha a ka ngaihthiam i ka zawtnak vialte kha a ka dam ter; thlan chung in a ka khamh i dawtnak le zaangfahnak he thluachuah a ka pek; ka nunnak cu thiltha in a khah ter i cu caah mupi bantuk in ka no peng i ka thawng."

Nawlnak:
Bawikrih ah zumtu u le nau hna: Nihin thawhthan ni ah thawngtha bia chimtu ding ah kan sawm mi nih caan a hmang kho hoi lo. Zarh 2 hlan kan in kan sawm i, lungtho tein a kan cohlan. Tuzing ceo ah asi khawh than lai lo nak kong thawng a van ka thanh. Thawngtha bia chimin khual lam ka um lio asi caah caan ai tetkhawt tuk pin ah Internet duh poh in hmannak caan ka nei kho ti lo nain, caan tlolhnak cha cun tiah tawite in Pathian bia iruah ti nak nei ding in atanglei ca hi ka van tial.

I Kor 15:56,57 "Thihnak nih faknak pek khawhnak hmual a neihmi cu sualnak in aa laak mi asi isualnak nih a thawnnak cu Nawl bia in aa laak mi asi. Asinain kan Bawipa Zisuh Krih thawng in teinak a kan pe tu Pathian cu thangthat si ko seh."

Bawi Zisuh Krih vulei a rat i raithawinak nganbik misual hna kan caah a tuah nak nih aa timh chih mi tiah min ka bunh.

1. Sualnak ruang ah chiatserhnak kan cung ummi dihter nak
Rom 5:12 chung ah mi pakhat thawngin vulei ah sual a lut i sualnak nih cun thihnak a chuahpi nak le mi vialte cung ah hmual a neihnak kong kan hmuh. Cu chung cun kan mah tein kan luat khawhlo lio ah Zisuh Krih nih kan caah rai a thawi i, cu sualnak nih a chuah pi mi thihnak le vanchiat le chiatserh nak phun kip chung cun khamhnak a kan siam piak.

John 10:10 chung ah mifir cu fir duh le thah duh le hrawhduh ah arat nak kong kan hmuh. Cu cu kan ralpa Setan nih zumtu hna kan cung ah aa timhmi asi. Asi nain, kan Bawipa Zisuh Krih cohlannak thawngin cu vialte chung cun khamh kan si. Bawi zisuh Krih Raithawinak ruang ah a chuakmi Pathian dawtnak ruang ah Pathian humhimnak kha a fale kan caah kamh zungzal kan si fawn.

Cu caah cun, chiatserhnak chungin khamh kan si cang i thlachuahnak hmun ah chiah kan si cang, Bawi Krih thawng in.

2. Sualnak chung in a kan khamh hnu ah Thlachuahnak hmun ah a kan chiah
Pathian dawtnak cu sualnak chungin a kan khamhnak lawng si loin, khamh kan sinak chan cu Pathian thlachuahnak vialte hrawmh chih ding ah asi. Bawi zisuh kan zumhnak thawngin Fa ah a kan cohlan lawng si loin thiltha vialte a kan hauh piak i thlachuahnak ro vialte co ding ah a kan timh piak.

3. Krih thawhthannak nih cu thlachuah vialte cu tehte a langhter
Kan Bawipa Zisuh Krih thihnak in a thawhthan nak hi zumtu vialte kan zumhnak hrampi asi pin ah kan caah tehte nganpi asi. Cu cu teinak nganbik asi i, kan nih zong teimi si lo in teitu kan si ve. Teitu hna cu, ralchia ding an si lo i, tla hmemhnuam in a um ding zong an si fawn lo. Krih thawngin teitu kan si ve caah teitu bantuk in a nung ding kan si. Rithainak i nunnak hna hi teicia mi hna nun asi i, ziaza thatnak le mibawmh duhnak le nunsiannak i nun hna hi teitu hna nun zia pakhat zong asi ve.

4. Thlachuak mi hna nun
Pathian nih zumtu viate caah timhmi a neih mi pa 3 cu 1. Teinak nun i nun 2. Aa lawmmi Inchungkhar 3. A nungmi Krihfa bu hna an si. Pumpak cio kan nunnak ah thothan mi, teitu bantuk in nung ding kan si i a kan duh piak fawn. Aa lawqmmi inchungkhar hi hmuh awk an har ngai te, Krihfa lak hmanh ah. Nain, kan Bawipa nih a kan duhsak piakmi asi. Cun, kan Krihfa bu cio hi a nung i fa tampi a hringmi le damnak hmun si ding hi kan Bawipa nih a kan duh piak. Cu nunnak hna cu Thawhthan thawnnak hmual an si. Cu cu pumpak cio kan nunnak ah hram aa bunh nak hnga Bawipa nih thlau kan chuah piak ko seh.

Upatnak nganpi he:

Ngun Thawng Lian
Camp New delhi
India

Theihternak: Easter Sunday (April 12, 2009) ni CIM caan hmannak kan tarmi a si.