Sunday, April 12, 2009

Tih Hlah Uh, A Tho Than Cang!

Baibel relnak: Matthai 28:5-7, 20
Vancungmi nihkhan nu cu a thawh hna i, “Nan thin phang hrimhrim hlah u. Vailam tahnak thing i khenhchih mi Jesuh nan kawl ti kha ka hngalh. Amah cu hika ah hin a um ti lo, a chim bantuk te khan, a tho cang. Ra u law an chiahnak hmun hi ra zoh hmanh u . . . nan sinah a zungzal in, caan dongh tiangin ka um lai,” tiah a ti hna.

1. Nan thinphang hlah u! A tho tthan cang.
Kei hi chuah ni tuah ka uar ngai. Ka chuah ni a ka theih piakmi cu, ka chungkhat ruah in ka ruah colh hna. Ka hawile pawl an chuah ni zong theih ka zuam. A caan ahcun kan Bawipa Jesuh Khrih a chuah ni maw a biapi deuh, a thawhthan ni ti biahalnak a um theo. A chuah ni tiah ka ti tawn hna. A caan ahcun a thawhthan ni ka ti fawn hna. Ka hei chim duhmi cu, kan Bawipa Jesuh Khrih hi rak chuak hlah sehlaw, tuni bantuk hi kan tuah hnga lo. Rak chuak ko hmanh sehlaw, zei hmanh tuah hlah seh law, kan sualnak chungin kan khamh hlah sehlaw, cun, hei thi in nung than ti hlah sehlaw, tuni bantuk hi kan tuah hnga lo. Cu caah a chuah ni zong a biapi i a thawhthan ni zong a biapi tukmi a si. Cu caah, a chuah ni le a thawhthan ni thil cangmi, a kaphnih in zoh ti usih ti ka duh.

Jesuh Khrih a rak chuah lio ah, vancung mi nih, tukhal hna kha “nan thin phang hlah u” tiah an rak ti hna (Lk 2:10). Jesuh Khrih a ruak thlan i va zoh dingin a kalmi nu hna kha vancung mi nih “nan thin phang hlah u” an ti hna (Matt 28:5; Mk 16:6). Kan Bawipa Jesuh Khrih a chuah le a thawhthan ni, a biapi tukmi ni pahnih ah, vancungmi nih an chimmi cu “nan thin phang hlah u” ti hi a si. Tukhal hna cu vancung mi nih “nan khamhtu Bawi a chuak cang” tiah an chimh hna. Nu hna cu vancung mi nih, “nan kawlmi Jesuh cu a tho cang, hika ah a um ti lo” tiah a ti hna.

Vancungmi nih nan “thin phang hlah u” tiah an timi hi sullam a ngei tuk. Kan thin phan tikah kan zaw. A nuam tuk lai tiah kan ruahmi hmanh ah, thinphannak kan ngei, lungretheihnak kan ngei. Thinphan lo nak dingah cun ttihmi thil kan ngeihmi kha phan awk a um lo ti kha a si bik ko. Cu nih a langhter mi cu, Jesuh cu kan sinah a um. Kan ttihmi a kan dohpi ti kha a si. Ruahchannak a ngeimi kan si. Jesuh nih an sinah aa langh tikah nan sinah daihnak um ko seh, a ti lengmang (Jn 20:19, 21, 26)

2. Immanuel Pathian a si. A tho tthanmi Pathian a si.
A chuah lio ah Immaneul tiah kawh a si. A thawh tthan tikah kan sinah a ummi Immanuel a sinak a lang tthan. Kan caah a chuakmi Immanuel Pathian cu thihnak nih a tei lo i nithum hnuah a tho tthan cang. A thawhtthan lawng hmanh si loin kan sinah/chungah a um. A zungzal in Immanuel a si peng.

Jesuh Khrih a thawhthan ni ah, minung pahnih cu Emmaus timi khua lei ah an kal. An kal pah ah Jesuralem i a cangmi Jesuh Khrih a thawhthannak kong cu an i ruah pah. Thinphannak, hnabeidonghnak, ngaihchiatnak le vailamtahnak nih an lung a fah ter tuk hna i an sin i Jesuh a kal ve hmanh kha an hngal kho lo. Zei caah dah an hngalh khawh lo ti kha Jesuh nih a hun hngalh tikah an bawipa a si kha a hngalh ter hna. Jesuh a si ti an hun hngalh tikah cun, anih cu a lo diam.

“A lo diam!” “Khuazei ah dah a kal?” Baibal cawnnak i aa telmi pakhat nih a hun ti. Baibal cawnnak ahcun Baibal lei thiam sang zong tampi an um, Khrihfa lei hruaitu tampi, Khrihfa upa, mino upa, nu upa hna zong an i tel. Nain, an zapi in an dai dih. Cu ti an daih dih ko lioah cun khuate pate nih, “Khoika a kal keimah nih ka theih,” tiah a hun ti. An zapi in theih an duh cio. “Khuazei ah?” Micheu cu an ni hrulhhralh. An ruahmi cu “Vanram ah” a ti ko lai ti a si. Asinain, mipa nih a hun chimmi an theih tikah an nih zong an dai dih: “An chungah a lut!”

A si hrim. Jesuh Khrih cu a tho than cang, lungkhar zong aa ong cang i, a cawngtu pawl zong an tli dih cang. Nain, Amah cu kan chungah a um. A tho tthanmi Jesuh cu vancung ah lo diam a kai i, hi vawlei he pehthlaihnak a ngei ti lomi a si lo; vawlei minung hna kan sinah thlarau in a ummi i, kan sining aa hrawm vemi Pathian tu a si deuh. Van i a kai dih tikah, a zultu hna cu Jerusalem lei ah an kir. An bawipa he an i then tikah an ngaihchiat ding a si nain, lunglawm tein an kir ti tuin kan hmuh. Baibal lei a thiammi nih an timi cu, an i lawmhnak a ruang cu pumsa in i then hmanh hna selaw thlarau in an sinah a um caah a si.

Biafunnak: Jesuh Khrih cu minung (misual) khamhtu, thihnak nih a tei lo i, a tho thanmi a si. Cu nih a kan cawnpiak chinmi cu, kan biakmi Jesuh Khrih cu mi khamh kho a si lawng siloin thihnak a teitu, a zummi hna zong thih khawh lo nak hmun ah a kan hruaitu le ruahchannak a kan petu a si, ti hi a si. Cu caah, kan Cathiang nih cun, “Nan thin phang hlah u” zei cah tiah “Bawipa cu thihnak nih a tei lo i, a tho than cang” i “ruahchannak a ngeimi nan si” tihi Thawhthannak kong kan chim tikah a kan chimhmi cu a si. Cun, kan Bawipa Jesuh nih a ti rihmi cu, a zungzal in cang dongh tiang kan umpi hna lai, ti a si.

Theihthernak: 2008 Easter Sunday ah Chin Baptist Church, Dallas ah ka chimmi ka hun tar. Thaizing hi Thawhthan Ni a si i, CIM caan hmannak tar ka duh caah, atu tuan deuh ah ka tarnak a si.

No comments: