Palm Sunday

Palm Sunday

Biahmaithi

Tuzing canah hmunkip ramkip ah a ummi hna dawtmi laitlai hna nan sinah CIM tawlrel nak thawngin thawngtha i ruah ti nak cantha ka hmuh khawh caah kai lawm tuk hringhren. Nunnak a kan pe tu Pathian min ka thangthat cu lawng si lo in thawngtha ai hrawmmi dawtmi hna nan zapi cungah lunglomh nak chim cawk lo ka ngei ko.

Tuzing kai thimmi Cathiang cu Matthai 21: 1-11 a si.

5“Zion fanu cu va chim u law, ‘Na siangpahrang cu nangmah lei ah a ra lio, Amah cu mi nunnem a si i laa cu a hun i cit, Laa note a hun i cit,’ va ti u,” tiah a timi tlinternak caah khan a si. 21:5: Zek 9:9 6Cucaah a zultu kha hmaiah cun an rak kal i Jesuh nih a chimh hna bang khan an tuah. 7Laa le a fate kha an ratpi hna i an puan kha an danh hna i Jesuh cu aa cit. 8Mi tampi nih an puan cu lam ah khan an phah hna i a cheu nih thingnge kha an sam hna i lam ah cun an phah ve hna. 9A hmai i a kalmi hna le a hnu in a zulmi hna cu an bu ning piin an au i, “David Fapa cu thangtthat ko u! B awipa min in a rami cu Pathian nih thluachuah pe ko seh, Pathian cu thangtthat ko u,” tiah an ti. 21:9: Slm 118:25-26

Hi kong hi Thawngttha cauk pali nih an zaa pi in an chim dihmi a si. A chim belte phundang deuh cio in an chim. Matthai nih hin laa cu a pi he an um tiin a kan chimh nain, a dang nih cun citbal lo mi laa fate a si tiin an chim. Cun ai dang ngai rih mi cu Johan thawngttha chungah cun Lanhtak puai a kal pah ah sunglawi ngai in Jerusalem ah a luh hi a si tiin a chim. Nain Lanhtak puai a kal pah a si tiah thawngttha dang a ttialtu nih an chim lo. Johan thawngttha ah mipi nih Jesuh Khrih an sunhsaknak zong hi zeidang ruang nakin Lazaruh thihnak in a thawhter mi, a tuahmi thil khuaruah har ruangah, mipi nih Jesuh Khrih cu khuaruah har a tuah khotu a si tiah an ruahn ak i, cu nih sunlawihnak pek duhnak thinlung ngeihter hna dawh in a ttial. Phundang in chim ah cun, Johan ttial ning bantuk a si ahcun Lazaruh a thawhternak ruangah Jesuh cu mi nih an sunsak kan ti khawh. Thawngtha ttialtu pali hna nih phundang ngai in an chim cio nain an zapi nih an langhter cio mi cu Jesuh Khrih nih a nun chungah a ton ballo mi sunlawihnak a hmuh tihi a si.

Luka thawngttha nih a kan chimh bantuk in Jesuh Khrih hi kum 30 a tlin in rianttuan a thawk tiah hei ruat usih law, Johan thawngttha nih Jesuh Khrih cu Jerusalem i lanhtak puai ah voi thum a kal a ti caah kum thum rian a ttuan tiah kan ruah khawh. Hi kum thum chungah zei tik hmanh ah a ton ballo mi mipi sinin sunlawihnak a ton hi atu bantuk thawhtthan lai zarh hi a rak si. Atu zarh bantuk ahhin sunglawi ngaiin Jerusalem khua chungah a rak luh kha a si. Johan thawngttha a chim ning hi a tuanbia umtuning he i tlak deuh dawh in a um. Aruang cu Lanhtak puai hi kum khat voikhat an tuahmi a si i Izip ram saltan nakin a luattertu hna, anmah lei ah a ttangtu Pathian luatternak theihpengnak ca dingah an tuah tawn hi a si. Cun Judah miphun a kum a tling cangmi pa paoh cu i tel phung a si. Cucaah Bawi Jesuh le a zultu hna nih an eimi a hnu bik zanriah kha Lanhtak puai zanriah a si tiah kan ruah a si ahcun, hi caan hi Lanhtak puai caah an i timhtuah lio caan a si ti cu el awk um tuk lo in kan chim khawhmi a si hnga. Jerusalem khua chungah mi an tam lio bik caan zong si dawh a si fawn.

Ruah lo awk a ttha lo mi cu hi tluk mi tam lio caan le Lanhtak puai an i timhtuah lio caan ah hin zei caah dah mipi nih Jesuh Khrih sunlawihnak an pek hnga timi hi a si. Hi kong he pehtlai in Matthai 21:5 ah kan hmuhmi Profet Zechariah nih a rak chim chungmi bia (Zech 9:9) hi zoh lo awk a ttha lo. La note cit in Bawi Jesuh Khrih cu mipi hmai ah a chuah tikah Judahmi cu Synagogue in an biaknak kong lam ttha tein a cawngmi an si caah a ra lai dingmi Messiah muisam an suai ciami sining chungah Jesuh Khrih hi a rak i khumh kho. Judahmi nih a ra lai dingmi Messiah tiah an hngahmi cu tthawng ngai in an ram i hruainak ah midang kut tang an umnak chungin a chanh, chuahtu hna a si lai tiah an rak ruah. Cu zumhnak cu an pi an pu, an nu an pa chan piin an rak i ngeih cangmi a si. An harnak chungin a khamh khotu ding hna Messiah hngak in an nun lio caan ah Biakam Hlun chung profet hna nih an chimchungmi Messiah muisam he Jesuh Khrih an hmuh tikah sunlawih lo awk an ttha lo. A taktak cu Jesuh Khrih an dawt ruangah si lem lo in anmah an i dawt caah an bochanmi pa thangtthatnak an pek a rak si deuh. An puan zong an phah piak, cu leng ah an au i an conglawmh. Bawipa min in a rami cu Pathian nih thluachuah pe ko seh tiah an ti. An ti awk hrim a si. Zeicatiah an harnak chungin a chuahtu hna ding tiah an ruahmi a si.

Khuaruah har ngai a simi cu, a aumi mipi thotho nih zarh khat hrawng a rauh tikah amah cu vailam cungah that ko uh tiah an au tthan. An ruahning bantuk in Bawi Jesuh Khrih nih Judahmi hna cu Rome uknak chungin khamh loin amah tu Rome cozah tangah biacaih ding a si tikah sualnak a ngei lo ti an theih ko nain vailam cungah that ko uh tiah mipi cu an au.

Nihin kan nunnak ah teh zei ruangah dah Pathian kan biak? Kan biakmi nih rumnak, lianhngannak, thiamnak thluachuah a kan pek lai ti ruahchannak kan ngeih caah maw Pathian kan biak a si loah zei ruang ahdah Khrihfa hi kan si hna hnga? A pa orhlei kam ah sunglawi ngaiin a tthumi Bawi Jesuh Khrih he umtti kan duh a si ahcun vailam a pumi Bawi Jesuh Khrih zong kan zulh ngam a hau ve. Lamphawk rumro in Khrihfa si kan duh a si ahcun kan biaknak hi kan thinlung a remhtu si loin kan thinlung a hrawktu a si ko lai. Rianttuan a kan feltertu si loin thathut a kan cawnpiaktu a si sual lai.

Dawtmi u le nau hna, mi lianngan a simi, a tthawngmi, mi khamh khotu Bawi Jesuh cu sunlawih tu a ngei, a si nain a der thawmmi, san tlailo sining in an hmuhmi Jesuh Khrih cu a zultu hna hmanh nih an zaam tak dih i an hlawt dih. A ngaingai ti ah cun minung hna nih hin kan tthawn lio ah cun bawmtu kan herh cio lem lo. Bawmtu, dawtu ttha taktak kan rak herh cu kan thazaang a der caan, san kan tlaih lo caan tu hi a rak si ko. Sunglawi ngai in kan nunnak kan hman khawh lio caan ah sunlawihnak kan herh cio men lai lo nain, ruahchannak kan ngeih ti lo tikah le chawntu hmanh kan ngeih ti lo lio ah hin thazaang pek kan herh bik lio caan a rak si ko.

Judahmi an rak i palh diam nak zong hi zeidang ruangah si loin anmah suai ciami chungah Jesuh Khrih cu an rak khumh i cu an suai ciami chungah Jesuh Khrih sining a luh khawh caan paoh ah thangtthatnak, sunlawihnak an pek. An suai ciami sining chung i a luh khawh lo caan a phak tikah cun that ko uh ti tiang in an rak au nak a si. Laimi Khrihfa nih kan ruah tthan deuh ah a ttha rua tiah ka ruahmi cu kan biakmi kan Pathian hi khamhtu a sinak lei lawng in kan lak peng i tuaringtu a sinak lei zoh kan huam tawn lo. Bawi a sinak lei i nunpi kan huam ngai nain sal a sinak lei i nunpi kan duh lo. Pathian cu na theihnak tia lawng a si lai lo i ka theihnak tia lawng hi a sining a si bal lai lo. A serchommi minung nih a sining kan theih dih mi Pathian siseh law biak awk zong a tlak hnga lo. A lianngan tuk mi a thil tuahmi vialte zong hi kanmah kan theihnak tia lawngin ri kan khiah piak a si ahcun kan biakmi Pathian hi a hme tuk sual hnga.

Serchom mi minung menmen kan si caah kan biakmi Pathian a sining taktak cu kan thei kho bal lai lo i, kannih kan rian tu cu sermi kan si i theih i sertu Pathian cu kanmah duhning chungah khumh si loin a duhning le a kan tinh piak mi chung tuah a nung kho mi kan si khawh nak hnga Pathian nih thluachuah kan pee cio hram seh.

Vanlam ah Bawipa hnu ngamh ngai in zulh kan duh ahcun vailam tah a pu i thlanti he harnak a tuarmi Bawipa he kan kal hmasa a hau ve lai.

Pathian bia le a sining tampi theih nakin theihmi tlawm te i nunpi a ttha deuh. Pathian bia hi a chim in chim thiam si loin nunpinak lei ah kar hlang cang hna u sih.

Pathian nih kan zapi ca ah thluachuahnak kan pek piak hram seh.

Biak Tha Hnem

Theihternak: Sayama Biak Tha Hnem nih CIM ah March 16, 2008 ah a rak chimmi kan tar thanmi a si.