Pathian Nih Mifim Bik Nakin Mifim Deuh A Timi Cu

CIM Caan hmannak (21st March, 2010)

Caantha a kan pe tthan tu Pa Pathian min thangthat si ko seh. Bawipa Dawtnak, Velngeihnak le Daihnak cu thawngtha aa hrawm kho mi dihlak cung ah hmun tthan ko seh.

II Peter 1:3-4 "Pathian sunparnak le tthatnak ihrawm ve awk ah a kan ko tu kan hngalhnak thawng in Pathian ttihzah in nun awk ah kan herhmi thil vialte cu amah Pathian tthawnnak lila nih cun a kan pek. Cu ticun a ngan ngaingai mi le a sung ngaingai mi laksawng a kan kamhmi cu a kan pek i cu laksawng a kan pek mi thawng cun a kan hrawkhral kho tu vulei pumsa duhnak chung hin nan luat kho lai i Pathian sining cu nan ihrawm kho lai."

Nihin thawngthabia a kan chim tu cu, Chicago Chin Baptist Church ah Pastor a ttuan lio mi Pastor Danny Bawi Thianhlun asi. Laitlang a khua cu Hakha asi i, a pa Hakha, a nu sopum asi. Cawnnak lei ah Evangel Bible College, Yangon in B.A (Theology) a awn hnu ah Trinity International University, Chicago ah M.A (Christian Studies) a cawn pah lio asi. Kum25 fai tlangval no te asi i, Bawipa rian ah ipumpek nak a neihnak le Pathian a duhnak le Krihfa bu a hruai nak cung ah lawmhnak nganpi kan nei. A rianttuannak ah Bawipa nih umpi zungzal ko seh.

(Danny Bawi Thianhlun)

Thawngthabia kan ihrawm hlan ah 'Bawipa ka zeizong' timi Pathian thangtthat nak hla ngai ta hna usih. (NB: Acunghmanthlakhi gmail a hmang mi nih cun nan hmu lo kho men).

Pastor Danny Bawi Thianhlun:-

Lunglawmhnak Biatawi.

A hmasabik ah hi bantuk Pathian pekmi caan sunglawi ah CIM nih caanttha na kan pek ve caah Pathian cungah le ttuanvo ngeitu upa nan cungah lunglawmhnak tampi ka ngei. CIM rianttuannak ah kan Biakmi Pathian nih thluachuahnak pe chin ko seh.

Thawngttha Chimnak

Tuni ruah tti dingah ka thimmi Pathian Biathiang cu Phungthlukbia (30:24-28) a si lai.

“Thil hme tete pali vawlei cungah hin an um, Sihmanhsehlaw cu hna cu, a fim bikmi nak hmanh in an fim deuh: Cu hna cu hihi an si: Hngerhte, a tthawngmi an si lo na i an rawl tthal caan I aa khonmi; Saveh, a der ngaimi a si ko na i lungkua chung i a inn a sami; Khaubawk, siangpahrang ngei a si lo na i a rualrual in a kalmi; Ttehral, kut in tlaih khawh a si ko na i siangpahrang inn ah khua a sami.”

Biatlangtar ka duhmi cu “Pathian nih mifim biknak in mifim deuh a timi cu” ti a si lai.

Vawlei cungah minung, nang le kei, nih kanmah le umnak hmunhma, dirhmun le pawngkam zoh in mifim tiah kan timi hna an um. Keimah hi Hakha khua ah a chuakmi ka si i kan rak umnak hi Auto Sang, Dawrthar ah a si. Kum khua in ka rak ngakchia deuh lio ah cun ka hawi le he lentecelh pah ah bia kan rak ruah i biaelnak tete zong kan rak ngei tawn. Cu hna chung ah ka philh khawh lomi cu “ Kan sangah a ho dah / a ho pa dah a fim bik?” ti hi fak nawn te in biaelnak kan rak ngei bal. Kan umnak sang i a ummi kan pa le hi midang sang he tahchun ah cun an cel hi a kua khunmi an lo. Kan mah ngakchia deuh lio i kan rak ruah khawhmi cu cel ngau/ kawng poahpoah hi mifim khuaruah kho deuh ah kan rak ruah tawn hna. Kan hawipa pakhat nih hringtu a pa hi kan sang ah a fim bik tiah a rak ti i cu ruangah cun kan rak I vel dih deng hna. Kan sanglak ah a pa a fimbik tiah a rak tinak sullam cu mi dang kan pa le he tah chun ah a pa hi a cel ngau cem caah a pa cu a fimbik a rak ti nak a si. Cu ve bantuk in vawleicung khuaza ummi minung hna nih hin mah lei dirhmun cio in a ho dah a fimbik timi hi an rak ruah cio. Nang le kei hi tuni ah a ho dah a fimbikmi a si hnga ti hi biahalnak kan tuah hna sehlaw Sianginn sang a kai i minung pekmi dikari (Degree) lawng zoh in maw kan tah lai? A siloah biachim thiamnak le a dangdang thil ti khawhnak in maw kan tah lai? Tuni tiangah vawlei cungah a fimbikmi cu Solomon Siangpahrang a si ti a si i Cathiang zong nih cu ti cun a kan cawn piak tthiamtthiam. Sihmanhsehlaw Solomon Siangpahrang nak in kan Biakmi Pathian mithmuh ah a fim deuhmi an um. Vawleicung a fim bik nak hmanh in an fim deuh tiah Pathian bia nih a ti. A ruang a um lai dah. Pathian nih a fimbik nak hmanh in a fim deuh tiah a timi hna cu

I. Hngerhte

Hngerhte hi Pathian nih a fimbik nak hmanh in a fim deuh tiah a tinak a sullam cu

1. Mah dirhmun aa thei. (Mah dirhmun hngalh lo hna hi ttih a nung tuk. Mah le mah dirhmun a hngal lomi cu mifim an si kho lo.)
2. Hmailei kong kau caah lungfim tein timhmi a ngei. (Tinhmi ngeih lomi cu an rawk lai. Khuatuak tan lo hna hi hawi lawh khawh lo nak a si.Nangtah tinhmi na ngei maw?)
3. A tha a thu lo. ( Tinhmi ngeih ko bu ah a tha a thu mi hna cu thil pi pa an ttuanchuah kho lo. Pathian hmai ah fih a nung tuk. Ttuan lomi cu ei lo siseh titu Pathian a si. Lai mi tthanchonak a ka dawntu kan ral a si fawn.)
4. Teimaknak a ngei. (Teimaknak ngeih lo cun mi tei khawh a si lo i mi tangah um peng nak a si.)

II. Saveh

Hi ka zawn I Saveha ti tik ah in Saveh poahpoah siloin Kawl Baibal ca chungah cun (shanphayung) Saveh ti ah a ti. Hi Saveh hi a dang Saveh nak in a thazaang der khunmi a si ti kha sawh duhmi a si. Sihmanhsehlaw hi tluk zaangdermi saram ko hi Bawipa nih a fimbik mi nak hmanh in a fim deuh tiah a ti nak cu.

1. Mah sining dirhmun aa thei. (Thilchia a hran i ttek a tlak tik ah a nunnak caah amah le mah himnak aa pe kho lo timi kha fiang tein a theih.)
2. Him nak a pe kho tu kha aa thim thiam. (Thihnak thlichia le harnak a ton tik ah amah le mah a khamh khawh lo kha a theih tik ah himnak pe kho tu, a mahnak in a hak deuhmi lungpi tangah khan aa dawr. Lai mi nih kan himnak lungpi cu Jesuh lawnglawng a si.)

III. Khaubawk

Pathian nih minung a kan chimhrinnak le a ka cawnpiak mi thil hna hi zoh tik ah khua caan ah cun nih zong a chuak i khuaruahhar zong a si. Pathian nih Khaubawk cu a fimbik mi nak hmanh in a fim deuh tiah a ti hoi tthannak cu.

1. Hruaitu ttha ngeih lo zongah rualremnak he khua an sa. (Rualremnak hi tthawngnak a si i rualremnak umlonak ah cun an ttio tawn. Lai phungthluk ah “Unau rualrem lo cun ttio nak a si” ti a si. Lai mi nih kan herhbik mi le kan herh zungzalmi cu rualremnak a si.)
2. Tinhmi an ngeihmi an ttuanchuah khawh nak ding caah lung rualremnak he hmai ah an kal. Hruaitu ttha ngeih ko bu i rualrem lo nak in cun hruaitu ngeih lo zongah rualremnak he rianttuan tti hi a ttha deuh.
3. Entaunak zei hmanh a um lo.

IV. Ttekral

Ttekral hna cu a fim le fim lo hmanh kan ruah ballomi thil hme te a si. Pathian nih a fimbik nak hmanh in a fim deuh tiah a ti tik ah hin ttekral paoh paoh in a ti lo. Pathian mit hmuh ah a fimbik nak in a fim deuh tiah a timi ttekral phun cu.

1. Mah thazaang in umnak inn aa sak kho mi a silo nain sui le ngun he sakmi inn ttha siangpahrang inn ah khua a sami. (Hi lei ah a hmun dingmi a um lo. A hmun dingmi cu Pathian bia le Pathian duhning in a nungmi hna lawng an hmun lai. Nihin kan umnak inn ttha lo ttha kan timi hna hi zungzal umnak ah an ttha lo. Mah tein zungzal a hmunmi inn ka ni sak khawh lo hmanh ah minung nih sak lomi Pathian sakmi Van Sui khua Siangpahrang Jesuh inn tu ah um ding in I thim ve hna usih.)
2. Siangpahrang inn khawika paoh ah siloin Siangpahrang inn hmanh ah a cunglei hmun ah hmunhma a la mi. (Nang le kei zong hi vawlei kan umnak hi a hleihluak tuk in tlaih chan lo in cunglei Vanram tu khi tlaihchan deuh hna usih.)

Cucaah cun dawtmi u le nau, nu le pa hna, Pathian nih mifim bik nak in mifim deuh tiah a timi cu mah le mah dirhmun/ sining aa hngal. Tabulbal in khua a sa lo. Hmailei caah lungfim tein le khuaruat bu tein a caah a ttha mi khuakhannak le tinhmi a ngei. Tinhmi a tak i a can khawhnak lai thathu lo tein teimaknak he rian a ttuan. Ttihnak le phannak, harsatnak le buainak nih a phak tik ah khawi ka ah dah ka zam lai i a ho sin ah dah himnak ka hmuh lai tiah a theih I Lungpi Jesuh chungah aa dawr. Khrihfa bu chungah le a minung hawi hna he rualrem tein khua a sa. Mi cungah ziar ngeihnak lungput a ngei lo. A hmun lomi vawlei nak in zungzal a hmun mi Van ram tu kha a tlaihchan deuh cu lei hoih cun khua a sa.

Bawipa mithmuh ah a fimbik nak in a fim deuhmi kan si khawh nak lai kan zapi te cungah kan Biakmi kan Pathian nih thluachuahnak kan pek piak ko seh.

A Rian Thiangah,

Danny Bawi Thianhlun

Chicago Chin Baptist Church

Theihternak: March 21, 2010 ni CIM caan hmannak kan tarmi a si.