Prophet Rian Tuantu Nu: Numit in Mark 14:3-9 Relnak 4

Mark 14:3-9 nih Zeidah a kan Chimh?

Rawl an ei lio ah khan minu pakhat a runglut: Mark cauk nih cun Simon, thinghmui pa innah rawl an einak hi si dawh in a chim. A sinain Johan cauk chung ahcun hi lio caan hi Mary te inn ah si dawh in a langh ter. Hi ka zawn ahhin Johan thawngtha tialtu hi hman dawh deuh in a um. Zei catiah Zisuh Khrih chan lio ahhin khual an ngeih tikah an inn i a luh cangka a si lo ah rawl einak i a thut tik ah zihmui cu inntek nih an rak toih tawn hna an ti. A sinain W.L.Lane nih a ti ve ning ah cun puai can a phak tikah upat pek an duh mi hna kha Judah miphun pawl nih zihmui an toih tawn hna a ti. Mark 14:1 kan zoh tikah Lanhtak puai le Thilnu phulhlo changreu puai nihinh lawng aa duh cang a ti mi kan hmuh. Cucaah Mark tialning zong hi an phung ning si dawh a si ve thotho ko. Mark le Johan thawngtha tialtu hna nih a hmunhma le an langhter ning aa lo lonain an chim veve mi cu Zisuh Khrih cu rawl a eilio ah pakhat nu nih Zihmui a toih titu cu fiangten an langh ter veve ko.

Zihmui thabik phun a rak i put;Bible thiampawl nih an zumh ning ahcun hi zihmui phun ni nard zihmui phun a si lai an ti. India ram nih an tuah mi a si an ti. Pliny the Elder i a chimning ah cun hi bantuk zihmui phun hi chungkhar ro a si a ti. An pi le nih an nu le sinah an roh tawn hna i an nu le nih an fanu le sinah an roh chin tawn hna an ti. An chan lio ah hin denarri 300 man a si i denarri pakhat cu pacak mi nih nikhat rian a tuan man he aa tluk mi a si an ti. Cucaah hi nu nih hin a kumkhat riantuan mi man he aa tluk mi zihmui thabik cu a dawtmi a Bawipa caah a hman tinak a si.

Thawlkha a khuai i Zisuh lu ah khan a bungh; Mi sawsawh i an ruah mi nih an inn ah an tlun hna ahcun zeimaw zat lawng an thuh tawn hna. A sinain mi lianngan deuh ah an ruah mi hna tu cu a caah thawlchung zihmui cu a dihlak in an hman tawn an ti. An ruahning ahcun a hmedeuh mi caah a lianngan deuh mi ca i hman cia mi cu hmanthan phung a si ti lo tiah an rak ruah. Hi nu nih hin cu zihmui cu a za ten a bungh a ti tik ah Zisuh Khrih hi mi lianngan a si nak kha a langhter mi a si lai tiah micheu nih cun an ruah. Cheukhat ve i an zumhnak ahcun a thawl a khuai timi hi zeidang a si lo Zisuh Khrih a thih lainak ding kong a langh ter chung mi a si tiah an ti ve. Zei catiah cun zihmui an rak hmanning zoh tik ah si dawh bik a si lai tiah an ruah. Zihmui cu mi ruak tuammuai nak caah a hlei in an hman tawn an ti. Ruak ah an thuh tawn hna. Thlan i an chiah tik hna ah a dur cu an khuai ta tawn i mithi pum an chiahnak thlan ahcun an chiah chih tawn an ti.

An chimning cu aa lolo ngai hna nain a pahnih in si dawh an si veve ko. Zeicatiah Zisuh cu Pathian fapa a si i a lianngan mi pa a si. Cu lawnghmanh si lo in misual kan aiah thihnak tiang a ing tupa a si ko. Cucaah a min tial hmanh a tong lo minu nih a tuah mi thil hi tha ten kan zoh tikah Prophet rian a tuantu nu a si tiah kan ti khawh. Prophet nu tiah minbunh a tong lo mi nu a si ko nain a ngai te tiah cun Zisuh Khrih a sining taktak le a tuar laimi kong a rak thei chungtu a si ko.

Cherhchan- 1. William Barclay, The Daily Study Bible: The Gospel of Mark (Bangalore: Theological Publications inIndia,1975),326.
2. William L.Lane, THe New International Commentary on The NT: The Gospel of Mark (Grand Rapids: William.Eerdman Publishing Company, 1974), 492.
Thaizing ah biatlang kawm nak ka rak tar than te lai.