Zeitluk In Dah Na Lianhngan Ko!

CIM Caanhmannak (27th December 2009)

Caantlaitu: Ngun Thawng Lian, Japan

Thawngtha Chimtu: Rev. Dr. C. Duh Kam, USA

Bawi Krih ah Zumtu nu le pa hna,

Caantha akan pe tthan tu Bawipa min thangtthat si ko seh. Pathian Dawtnak, Velngeihnak le Daihnak cu Zumtu nu le pa nan dihlak cungah hmun tthan ko seh. Kum 1 chung kan nunnak hna Bawipa nih Lam a kan hruai i 2009 cu kan liam tthan lai. Aluancia caan kan zoh ah cun Bawipa Dawtnak hi chim cawklo asi ko. Bawipa kan thangtthat. CIM caan hmannak zong ah thawngtha bia a kan chimtu kan Pastor te, kan Hruaitu hna dihlak cung ah lawmhnak nganpi kan nei. Carel tu pumpak cio nih ihlawknak nganpi kan nei cio lai tiah ka zumh. Kumthar lei zong Bawipa kut ah kan nunnak ihlan than hna usih law CIM zong tluang tein kan kal khawh peng nak lai thlacamnak in ibawm lengmang hna usih.

Bible relnak:

Psalm 90 Vs. 1, 2:

"Maw Bawipa, nangmah cu kan Inn na si zungzal! Tlang an sem hlan le vawlei kha na ser hlan in nangmah cu zungzal in, hramthoknak zong um lo, donghnak zong um loin Pathian na si."

Vs. 17 "Bawipa kan Pathian, kan cungah na thlachuahnak cu um seh law kan thil timi kip ah khua awng kan pemh ter ko! Kan thil timi kip ah khua awng kan pemh ter ko!"

Nihin thawngtha bia a kan chimtu cu Rev. Dr. C. Duh Kam, Pastor (Chin Baptist Mission Church, USA) asi. Zapi nih kan ibochan peng mi le Bawipa nih Tukhal ttha a kan pek mi asi. Theihternak zong tam kan tuah ti lai lo. Thawngtha bia akan chimh tthan nak cung ah Lunglomhnak nganpi kan nei. Upatnak he kan don.

Thawngtha bia kan iruah hna hlan ah Bawipa Na Dawtnak cung ah Kaa lawm ti mi hla te hi rak ngai cio uh.

Rev. Dr. C. Duh Kam:-

Zeitluk in dah na lianhngan ko!

Bible relnak: Khi tikah Job nih Bawipa cu a leh i: “Nangmah nih zeizong vialte na tuah khawh i Na tinhmi cu donh khawh a si lo ti kha ka hngalh. Sihmanhsehlaw ka hngalh lo mi thil lianngan kha ka chim hna i Kei i hngalh awk khuaruahhar tuk a si mi kha ka chim hna.” (Job 42:1-3)

Lunglawmhnak:

2009 kum chungah a hnu bik zarh, kum thar 2010 kan luh lai te ah CIM hruaitu Pastor Ngun Thawng Lian sin in Thawngttha chimnak caan ka hmuh caah lunglawmhnak nganpi ka ngei. Hnu lei caan le hmailei caan zoh a herhnak caan ri a si caah “Zeitluk in dah na lianhngan ko!” ti mi bia hmang in thawngttha chim ka duh.

Biadawmhnak:

Christmas ni phanh lai temmam December 20, 2009 Zarhpini cu Des Moines, Iowa ah a ummi Chinmi zumtu hna sinah hman ding in kaa tiim. Christmas lai khualtlawn cu ka sia a rem tuk lo. Ka khrihfabu zong ka sia a herh. Nain, Chin Baptist Church, Des Moines, Iowa cu Chin Baptist Fellowship of America ah an i tel kum a si i kum a liam hlan ah va tlawn lo cu a ttha lai lo tiah timhlamh cia tein kaa thawh. Baltimore Washington International Airport in December 18 (Friday) ah kaa thawh i Chin Baptist Church, Milwaukee, Wisconsin zumtu hna ka tlawng hmasa hna. Zan ah Khrih chuahnak thawng ttha ka chim. A thaizing Zarhteni cu Pastor Ronald Charles le a khrihfa upa pali he Des Moines, Iowa lei ah kan kal. Mid-America ah a ummi Chin khrihfabu pariat in upa hna cu thih le ngaihchiatnak caan ah zohkhenhnak buu ngeih kan herh tiin tonnak ngei ding in an rak ra cio hna. December 20, 2009 Zarhpini ah “Mid-America Chin Khrihfa Zohkhenhnak” cu an ser. An meeting ah an ka sawm ve caah, phunghram le phungtteng suainak ah ruahnak zong ka hei cheuh pah ve hna. USA an phak nak kum hnih chungah mithi pahnih an ngei. Minung pakhat thih ah $10,000 cu a hau. An lungretheih ning kha chimpit taktak a rak si. Cu caah, a tu bantuk in zohkhenhnak an sermi cu thinlung phurh rit vialte a kan chawng kho ding mi rianttuannak a si. Baptist Church, Des Moines, Iowa kan cam chung Zarhte zan le Zarhpini chun ah thawng ttha kei nih ka chim. Laimi muihmai thar he Christamas lawmhnak caan ah i ton cu a nuam taktak. Khuaruahhar ngai in ka ruah mi an um len.

Khrih Thawng Ttha a rak kan phurhtu siangbawi vialte hi a tu Chinmi kan umnak Mid-America ah a chuak i Lairam ah missionary ah thlah mi an si:

1. Chinmi kan siangbawi hmasabik Rev. Arthur Carson cu Columbus City, Iawa ah August 6, 1860 ni ah a chuak. Mrs. Laura Carson cu Coming City, Nebraska ah September 28, 1858 ni ah a chuak.
2. Dr. Erik Hjalmar East cu Styrestad, Sweden ah February 2, 1866 ni ah a chuak. Kum 20 a si ah 1885 kum ah USA ah a rak pem. 1886 kum ah Khrih ah hrintharnak a hmuh caah Lutheran Church in Baptist Church ah aa tthial. October 1895 ah Chicago, Illinois ah aa tthial. Louisville, Kentucky khua Southern Baptist Theological Seminary in May 1901 ah Bible a cawng chuak. University of Kentucky in June 25, 1901 ni ah M. D (Doctor of Medicine) kha a hmuh tthan. A nupi Mrs. Emily Johnson cu Chicago, Illinois khua mi a si.
3. Dr. John G. Woodin cu Iola, Kansas ah July 27, 1883 ni ah a chuak. A nupi Bessie Woodin cu Mendota, Illinois khua ah February 20, 1883 ni ah a chuak.
4. Dr. Chester Strait cu Glenwood City, Wisconsin kha ah December 21, 1893 ni ah a chuak. A nupi Mrs. Florence Talbot Strait cu England ah a chuak nain, St. Paul City, Minnesota khua in Registered Nurse degree a hmu.
5. Rev. Franklin O. Nelson cu Minneopolis, Minnesota khua ah November 30, 1909 ni ah a chuak.
6. Rev. Dr. Robert Johnson cu Chicago, Illinois kha ah May 1, 1915 ni ah a chuak. Mrs. Elizabeth Johnson cu Decatur, Illinois khua ah October 24, 1916 ah a chuak.

Christmas lai zarh i Des Moines, Iowa kan tlawn lio ah kan siangbawi hmasabik Rev. Arthur Carson a chuahnak khua Columbus, Iowa khua pawng kan phak ahcun thinlung phun dang ngai in a um. Mid-America ah Laimi ka rak phan. A tu cu khrihfabu pariat tluk kan um cang. Mid-America ah a ummi American Baptist Churches pawl nih a thar in kan siangbawi te hna cu anmah nih an rak thlah mi an si kha an van theih. Chin khrihfami hna cu an tuhmi Thawng Tha thlaici an si tiin an ruah. Hruaitu upa nih lawmhnak thar an ngei.

Khuaruahhar:

Rev. Arthur Carson le Laura Carson nih Lairam an rak phaknak in kum 100/110 a tlin bak ah kan siangbawi te an chuahnak ti le ram ah a tu bantuk in Chinmi khrihfabu in kan rak dir kho. USA ram kip ah khua kan sa. Vawlei cung ram tthangcho kip ah kan phan. Khrihfabu in kan dir kho. Pathian ram kauhnak caah tampi rian kan ttuan khawh cang. Rawlttaam tihal in khua a sami kan miphun hawi hna kan bawmh khawh hna. Pathian Thawng Ttha kan chim kho hna.

Pathian khuakhanning hi theih khawh a si rak si lo. Khuaruahhar taktak a si ko. Siangbawipa a chuahnak khua Columbus, Iowa pawng kan kal lio ahcun, kan thinlung in, “Siangbawipa, hi tluk ram ttha kaltaak in Lairam ah zohkhenhtu ngei lo in ril fawnghlei zawtnak in na nunnak a liam ko cu!” ka ti. Khrih kawhnak aw cu an theih tikah to khawh men a rak si lo.

Ka thinlung in a chuakmi hla cu “Zeitluk in dah na lianhngan ko!” ti mi hi a si. A chan lai ah phungchim thiam Swedish pastor Rev. Carl Boberg nih 1886 kum ah biazai a rak ttialmi a si. Siangbawi Dr. East a chuahnak Sweden ram ih nichuah thlanglei fing le tlang dawh a len lio ah ruahlo pi in minthla a lek, khua a tur, thli ruah fak nawn in a sur khawh ah tleu pul in ni a tlang tthan. Thingkung cung ah va te an zuan i an aw dawh in an onh len kho kha a theih. Pathian hmai ah khup bil in “Bawipa Pathian, na tuahmi thil vialte hi ka ruah tikah ka lung nih a phan lo” tiin thla a cam. Pathian thilser hna nih Pathian sunparnak an langhter mi kha a hmuh. Bia dang in kan chim ahcun, David nih “Van nih khin Pathian sunparnak a langhter i a tuahmi thil kha a kan hmuhsak (The heavens are telling of the glory of God; and their expanse is declaring the work of His hands)” a ti bantuk kha a si (Ps. 19:1-2).

Kei ka caah cun, kan Lairam fing le tlang kan len tawnnak ka ruah tikah le Pathian nih Chin miphun hi dirhmun ah a kan chiahmi cu khuaruahhar tuk a si ko.

Pathian nih aa tinhmi cu dawnh khawh a si lo (Job 42:2):

Kan Bible relmi ah Job nih Pathian cu, “Zeizong vialte nangmah nih na tuah khawh, Na tinhmi cu dawnh khawh a si lo ti kha ka hngalh, tiah a rak ti. Job cu harnak in hneksak a si. A phawrhlawtnak le a ruamkainak le Pathian a dohnak vialte kong ah ngaihchihnak fakpi in a ngei. Pathian nih leivanhuap (universe) pi lawng si lo in, kan nunnak zong a uk, a kan dawt ti kha a hngalh. Pathian nih aa tinhmi cu dawnh khawh a si lo tiah a ti.

Pathian nih kan miphun caah a ruahmi a um. Kanmah pumpak cio kan caah tinhpiakmi a kan ngei. A kan dawt cio. Kan miphun caah le kan pumpak cio caah Pathian nih aa tinhmi cu a tling cuahmah ve cang.

Kum hlun 2009 chungah kan nunnak cio ruat usih. A rauh hlan ah kum thar 2010 chungah kan lut cang lai. Pathian nih a kan tinhpiakmi chungah aa ttawm kho mi si i zuam usih. Pathian nih kan caah khuaruahhar a tuahmi hna hi ruat hna usih. Ruat setmat ahcun Swedish pastor Rev. Carl Boberg bantuk in Pathian hmai ah khukbil in Pathian cawnglawm tlak hrimhrim kan si.

Thluachuah halnak:

Pathian nih Kum Thar lawmhnak kan dihlak cungah tlun ter ko seh!

C. Duh Kam

Theihternak: December 27, 2009 ni CIM caan hmannak kan tarmi a si.