CIM Caan Hmannak

CIM Caan Hmannak (December 20, 2009)

Caan tlaitu: Saya Ngun Thawng Lian

Thawngttha chimtu: Pastor Khar Ling

Zumhnak ah Nu le pa hna,

Pathian Dawtnak, Velngeihnak le Daihnak cu pumpak cio nan cung ah hmun tthan ko seh. Mi vial te kan caah khamhnak siam piak ding in Vulei ah a ra i Dawtnak in Nunnak a kan pe tu Kan Bawipa Pathian min sunlawih chin si ko seh. Ni hin ah thawngtha bia aa hrawm mi dihlak cung ah X'mas lawmhnak um ko seh.

Isaiah 9:6 "Kan caah hngakchia pakhat a chuak! Fa pa pakhat pek kan si! Amah cu kan uk tu Bawi asi lai. Amah cu khuaruahhar, fimchim tu, athawng mi Pathian, Zungzal hmunmi Pa, Daihnak Bawi ti asi lai."

Luke 2:11 "Tuzan hrimhrim ah hin nan khamhtu kha a chuak cang - Krih Bawipa cu."

Nihin thawngtha akan chim tu cu Pastor Khar Ling, Philipine Chin Christian Fellowship ah Hotu attuan lio mi le M.Div a cawng lio mi asi. Laitlang akhua cu Surngen asi, CCOC ah kum 2 le CMC ah kum 2 tiang thawngtha bia chim in a rak ipempe mi asi. Surngen Baptist Church zong ah kum 2 leng tiang Pastor a rak ttuan. Cawnnak lei ah CCC in B.Th le atu ah M.Div a cawn lio asi. CIM ah Lawmhnak le upat nak he kan don.

Thawngtha bia kan ihrawm hlan ah Hika hla te hi ngai ta hna usih. Chin Baptist Mission Church, DC choir an si. Hark' The Herald Angel sings zong hi rak ngai te uh. Hi tu hi cu Mirang an si.

Pastor Khar Ling:-

Luka 2:7; Matt. 1: 21.

Puan in a zual i caw rawleinak kuang chungah khan a thlim; riahnak khualbuk ahkhan an caah hmun a um lo. Fapa a hrin lai i a min ah Zisuh na sak lai—zeicatiah a mi kha an sualnak chungin a khamh hna lai.

Khuaza vantoiah a ummi CIM bember sinah thawngtha chimnak caantha ka hmuh caah Pathian sin, tuanvo ngeitu le ca reltu nan dihlak cungah ka lawm ti langhter ka duh. Tawite in ka chim ko lai. Ka vuikhatnak a si caah le Christmas thawngtha a si caah sau chim ka timh lo.

Zisuh chuakcamtuak caan tha hna kan hung phan than i lawmh a um hringhran. Hi caan lio ahhin micheu cu mah le chuahkehnak khua cio ah tlun cio a si i chungkhar cio hmunkhat ah i tawn khawh bik caan le i nuam bik caan a si. Cun mi cheu cu tleicia zunngai in caan a hmanmi kan um tawn. Mi cheu cu hawi bang thilthar kan izalh khawh lo tikah ngaichiat le beidong ngai in kan um tawn. A ngaingai ti ahcun Zisuh Khrih chuakcamtuak caan sunglawi hna ahcun i lawmh tuk ding le inuam tuk ding deuh kan si. A ruang cu Zisuh Khrih cu a mi hna an sualnak chungin khamh dingah a ra mi a si. Kan sualnak horthuk chung in mah tein a khamh khawh lomi khamh dingah a ra mi Messiah cu thangthat si ko seh. Remnak le daihnak zong a kan phorh chihtu a si caah lawmh chinchin hna u sih.

Pathian nih a fapa ngeichunh a kan pek cu Dawtnak le zawnruahnak a sangbik a si. Christmas caan ah mitam pi kan i lawmh i kan in nuam lio ahhin khat leiah fapa ngeihchun a kan petu kan Pathian lungput kan philh sual lo ding hi i ralrin tha a si. Christmas kan ti lengmangmi hi Zisuh Khrih nih a mah nunnak humhak lo bak in a nun a kan hrawmh caan le a nunnak dihlak, a singning dihlak a kan pek caan a si. Cu caah Christmas caan ahhin Khrih zultu tha hna nih cun mi dang caah kan sining le kan nun kan hrawmh hleikhun caan ah kan hman awk a si.

Socrates hi thawngah an thlak i thah ding a si lioah a fim tuk caah thah taktak an sian lo le an ngamh lo caah a thattu lila nih zaam an fial i an hnek kho lo. Cu caah an thah taktak ve. A thih hnu kum 200 ah Epictatus nih a timi cu, “Socrates nih a thihnak in a nunnak taktak a khamh. Zeicatiah tlik in a taksa nunnak cu fawite in a khamh khawh ko nain rak tli sehlaw a pum nun a humhaktu pa sawhsawh a si hnga i Socrates taktak cu a thi diam cang hnga. Asinain a pum nun humhak loin bia dik tu a tanh caah a thih hnu nihin tiang Socrates cu a nung peng ko”, a ti. Mah nun humhak lo pa a sinak nih nihin tiang a nun ter tiah kan ti khawh.

Chim duhmi cu Zisuh Khrih chuakcamtuak ahhin mah caah si loin midang ca tuah i pek caan tu kha a si deuh. Cucu Zisuh Khrih vawlei a ratnak sullam pakhat a si. Dawtmi Khrih zultu hna tu kum Christmas caan ahhin na caan, na sining le na ngeihchia chawva in na Khirhfabu, na hawikom, na innpa chakthlang hna cungah zeitluk in dah nun na sian i na pek khawh. Mah nunnak humhak rihmi kan si sual ahcun le, pek lei i timh loin hmuh lei lawng kan awrh rih ahcun Christmas sullam he kan in hlat tuk rih tinak a si hnga.

Herod siangpahrang nih Siangpahrang thar a chuak lai, ti a theih tikah; a thin a phang i kum hnih tang ngakchia tampi a thah ter hna. Nawl ngeih i cuhnak nih hin Christmas naute cu hmunhma a pe kho ballo i, buainak le ngaichiatnak lawng a chuah ter tawn. Nawl ngeih duh tuknak nih a chuak termi lungput a si tiah kan ti khawh. Zeicatiah mah nih nawl ngeihpeng kha a duh caah a si. Hi bantuk Herod lungput nih Messiah cu tawn khawh lo in a tlolh tawn. Sihmanhsehlaw lungnemnak le toidawrnak tu nihcun Christmas naute cu hmunhma a pek i an caah Khrihchuakcamtuak sullam a ngei.

Ca reltu Khrih zultu hna kan dihlak in Naute Zisuh Khrih he kan in tawn khawh i, Khrih ratnak sullam ngeiter chintu kan si cio naklai mah nun humhakmi si loin le Herod bantuk lung put si loin lungnemnak le toidornak lungput sining he Khirhchuakcamtuak caan sunglawi hman ti cio hna u sih tiah kan sawm hna.

Nan dihlak cungah Christmas daihnak le remnak leng cio hram ko seh!

Khar Ling

Theihternak: December 20, 2009 ni CIM caan hmannak kan tarmi a si.