Nain . . .

November 4 cu US tuanbia ah, cun vawleicung tuanbia ah ti chih ko usih, roling mi ni a si. Minak nih US ramhun thimnak ah teinak a hmuh tikah a mak ko. Minak pawl hrim cu an chunmang a tling tiin an i lawmh tuk ah a mitthli a tlami an tam. Philh lo dingmi vawleicung ramhun thimnak pakhat a si hrim ko lai.

President Obama hi mi za taktak cu a si. A bikin mipi nih an herh tukmi THLENNAK kong a dirpitu le tuah aa timmi pa a si tikah mipi nunnak ah atu tiang cu ram a ngei hrim ko. Vote a thla khotu sining law keimah zong nih McCain nak cun vote ka pek deuh ve ko lai.

President Obama kong ah a phunphun in, biavai a chuak. Obama hi Khrih a dohtu Anti-Christ a si ti te hna. Muslim a si ti te hna. Ralhrang pawl he pehtlaihnak a ngei lai ee ti te hna. A phunphun in an ti. Ramhun cuhnak thawkka lio ah a pastor pa kong ah mawh an phurh len. Nain, atu ahcun Khrihfa a si lo ee a ti te hna an um hoi. Thil hnu hmai tha tein tuak loin mi chim paoh ah aa fumi an tlawm lo.

US ramhun si dingah thim a si cang ko. Let awk a tha ti lo. Amah hi Khrihfa a si lo a timi zong nih anmah cio tah Khrihfa cu an si cio maw, Obama Khrihfa a si lo ahcun, ti zong i hal ve an hau. President Obama hi pa za cu a si. Khrihfa zong a si fawn; Muslim a si lo. Anti-Christ zong a si lo. Ralhrang lei tang zong a si lo. Cucu philh lo awk a si. Catialtu pakhat nih cun, ralhrang lei a tangmi hmanh va siseh law, zei dah a poi. Ralhrang pawl nih amah a kan uk chung cu, harnak an kan pe lai lo, a tha lei lai tiah serhlei phun in a chim.

President Obama nih zei tluk in dah, atu bantuk chawlehnak lei ah harnak a um lio, mipi hnabei dong in an um lio ah, thlennak a tuah khawh lai ti hi a si. Amah zong nih a timi cu keimah hi ka bochan hlah u, nangmah kha i bochan u, kan tuan ti hna lai ti a si. Minung a si caah tlinlonak cu a ngei ko lai, a ngei hrimhrim lai. Mipi bia a kamhmi hna zong a zei maw tiang lawng a tuah khawh lai. A zapi cun a tuah kho hrim lai lo. Cucu minung phung a si.

President Obama a duh lomi nih an chimmi cu um cang sehlaw, amah a tanhmi pawl nih an i uar tuk tikah messiah hmuh in a hmu tiang an um. US kong an rak kan chimh ah, an phaisa hrim ah IN GOD WE TRUST timi a um caah, Pathian nih thluachuah a pek khun hna ti a si. Nai ahcun IN OBAMA WE TRUST tiah ca a tarmi zong an um. Hi hna nihhin Obama hi minung a si ve ti an philh rua.

President Obama nih zei tluk in dah thlennak a tuah khawh lai timi cu tuanbia nih a chim te lai. Pa za cu a si tak ko. Mipi cu ruahchannak a pek ngai tak ko hna. Nain . . . nain . . . Obama cu Pathian a si lo. Obama cu minung sawhsawh, kanmah bantuk a si ko tihi philh lo a hau.