Khrismas caan sunglawi a naih chin lengmang tik ahhin thinlung mitthlam chungah hlanlio a luancia mi kum 2000 renglo lio ah tihphannak lakah Egypt ram lei panh in a rak zammi chungkhar hna an hungcuang. Nihin ni ah cun lawmhnak puai ah kan hman hna nain hlanlio Khrismas a rak si lio tuanbia ruah ah ngaihchiat mitthli tlaknak tuanbia a si.
A caan hi mui zaan ah si dawh a si. Joseph cu aa hngilh cuahmah lio ah “Tho law na dawtmi na nupi le na fapa himnak caah Egypt ramah zam pi hna,” tiah Bawipa Vancung mi nih a rak chimh. A fa pa, a chuak ka mi te, a dawtbik mi a nupi, a nau ngeihnak hmanh a sau rih lomi zampi ding a si. A thinlung chungah biahalnak tampi a rak um ve ko lai tiah ka ruah. Israel miphun hna caah cun Egypt miphun cu dawtu an rak si bal lo. A hremtu hna, sal ah a tlaitu miphun, Israelmi fa an ngeih tikah fapa paohpaoh thah dih dingin nawlngeihnak a rak hmangmi miphun an si. Kan himnak le kan luatnak ding taktak hmun a si ngai hnga maw cu? Zei harnak dah lampi ah kan ton khawhmi a si? Ka dawt bikmi ka nupi le ka fapa hi zampi lo ah tah zei dah kan innchungkhar ah a tlung ding a si hnga? Khua zaza ruat in mit cung tang chin lo in Jospeh cu chungkhar pabik a si bantuk in khua a rak ruat ve len ko lai. Ziah hmundang deuh le ramdang deuh si loin Egypt ram thengtheng ah Pathian nih a kan zamter hnga, a si kho ngai hnga maw cu hlanlio pipu hna saltannak le retheihnak ram panh than ko lai cu . . . .
Zei a si hmanh ah thimding hmun hlei a um ti lo. A chungkhar caah an himnak ding hmun a dang a um lo khua a ruah ve tikah Egypt ram dah ti lo hmundang kalnak an ngei ti lo. An hmanding mi thilri, timtuah in dawtmi chungkhar hna nunhim lainak ruah ah thatho lo ngai in Joseph le a chungkhar rual cu an rak i thawh. Nau ngeih kaa, thazang ngei lo a dawtbik a thaisung nu le a fapa nih zei hngal lo in pabik lam hruainak zul in kik lengmang le thirh lengmang in an rak kal lio ahhin an hmailei kong ah chim khawhmi zei hmanh an rak ngei ve hrim lai lo. An himnak ding maw an nunnak a dihnak ding hmun dah a si hnga ti an thei kho lo. Nain fian ngai dawh an simi cu Bawipa nih a umpinak hna hi si dawh a si.
Nawlngeihnak thutdan chuh lai phang in a nawlngeihnak a hmunh khawh nakhnga ding ah khua a khangtu Herod zong a lung a mit ve ko lai. Zei cah tiah mi fa cu chim hlah a fapa le hmanh pei a rak thah hna cu. Mah chungchuak fa le hmanh a zuahlo mi pa nih zei paoh a tuah hi a mawh hrim lo. Mipi thatnak ca ding khuakhan a har ngai bantuk in mipi rawhralnak khuakhan zong hi a fawimi a si hrim lai lo, a thluak a fak ve ko lai. Zei paoh ah amah nawlngeih ri a lonhtu paoh thah, thawl, phuah a hmangmi nih cun zei ti cun dah mi pakhat a thatnak le a santlaihnak cu a hmuh khawh fom ti hnga. Ka tluk sual hna lai kaw ti phan bu cun mi thatnak hmuh a fawi ti lo. An sual kawl le a sinin aa hlatnak ah kalter lawnglawng kha anih a rian biapi bik cu a si ve ko. Anih a tar deuhdeuh, a fimthiamnak, a theihnak nih a phan lo deuhdeuh, no nawn thangthar nih fim deuhdeuh, an thluak a than lio si deuhdeuh tung kaw thah le nawn ti dah lo ah zei tuahning ding dang um dawh a si ti lo. A lung si a vang hringhran ve ko lai a nawlngeihnak chuh lai phan ah. Mi hrawhhralnak ding kong a ruah ah Herod zong a lungre a theih caan a si.
Cunglei fial ning in riantuan lo ah rianphuah a tongding mi le harnak a tong colh dingmi Herod ralkap pawl zong cu Bawi Jesuh kawl in kum hnih tang hngakchia paohpaoh, Bethlehem le a pawng kam khua vialte vainam har in mi an thisen luanter hi an duh bik mi rian cu a si hrimhrim lai lo. An nunnak humhaknak caah an i thimmi riantu a si ve ko lai. A daw cukmak mi nufa tang an vun then hna ah an thinlung mei a alh ve hrimhrim ko lai. Cunglei phungnih cun nenh ve hna kaw thimding hlei an ngei ve ti lo. Duhnung tukmi Pathian thluachuah fapa thatha thah thluahmah an si ko. Ral tuknak ding ah training pekmi hna kut cu duhnung tukmi le sualnak ngei lo hngakchia no hna thisen chuahtu ah an cang dih. A fak hringhran ko. Thim awk a tha lomi rian, a tha lo ti theih ko bu in pumpaw cawmnak caah mitchinh a haumi rian a tuanmi Herod kuttang riantuantu hna nunnak hi mu.
Kan theih khawh lomi cu Egypt ram ah a zammi chungkhar hna lampi ah le an phak kaa ah zeitluk in dah harnak an ton ti hi a si. Chungkhar thar a dirhmi an si bantuk in nifa an pum pawcawmnak ah le an himnak caah nu le pa cu an re a thei hringhran ko lai. A fiang ko mi cu an holh, an nunphung, an biakmi aa lawh lai lo caah zei tluk in dah miram dang ah holh theih lo, mah nunphung le biaknak a si lomi hna sinah um hi a va har ve hnga? Cu lawng a si lo, a thli ten a lutmi an si caah rammi nih an theih hna ahcun an caah harnak fak pi a chuak kho ding a si fawn. Cu thil vial te cu an rak ton, an rak tuar. Cun an ton an tuarmi harnak vialte cu an nunnak himnak ding caah a si. Egypt ram hi ram tha le ramrum bik zong an rak si lo, a dawtu bik hna ram zong si dawh an si fawn lo i, an nun nuamhnak bik ding ram zong si dawh a si hlei lo. Nain Egypt ram ah cun an him.
Chungkhar tling, dam tein Herod a thi cang tiah vancungmi nih a chimh than hna tikah an dawtmi an chuahnak ram an rak panh than. Thil tha lo cu zungzal a hmun kho lo. Tuanbia nih kan nunning cio a chim te ko lai. Herod nawlngeihnak zong cu a rak dong ko. Thil hmanmi kan tuah ruang le kan dirpi ruangah zei ton kan ton paoh ah kan ning a zah awk a si lo. Kan i tlaihmi a hman paoh ah cun kan dir ngam ding a si. Kan i nuamhnak hmun paoh hi kan himnak hmun a si lem lo. Caan tampi cu kan i thimlo mi hmun si ko hmanh sehlaw cu kaa hmun zong cu kan himnak hmun a rak si tawn ko. Minung tampi nih an chim ruangah thil hi an hman tiah ti khawh a si lo bantuk in minung pakhat lawng nih a dirpi ruang zong ah thil hman lo a si tiah ti khawh a si fawn lo. Bawi Jesuh thahnak ding zong ah zapi lungtlinnak an lak ko nain a hmanmi a si ve lo kha kan philh lo awk a si. Nawlngeihnak ngeih cu a tha. A sinain cu nawlngeihnak cu riantuan ti hawi le mipi damnak caah a si awk a si. Duh paoh in ngeihmi nawlngeihnak hman ding a si awk a si lo. Zei ruangah dah kan ram ah nawlngeitu a rak si balmi nih hin an nawlngeihnak chuh lai an tih tiah cun an duh paoh in an nawlngeihnak mi cungah an rak hman caah anmah bantuk in mi nih an cungah tuah ding an celh tawn lonak hi a si. Cucu minung lungthin put a si lo. Saram lak ah natum khi nawlngeihnak cuh a hmang vemi an si. Amah nih a uk khawh lomi natum he cun an i rem kho lo. An nawlngeihnak chuh lai an sian tawn lo caah an i su tawn i a caancaan ah cun an nunak tiang a liam tawn. Mah sining he aa tlukmi minung hna he rian a tuanti kho lomi cu natum lungput ngeimi kan si ve tinak a si ko hnga.
Phunglam suai tik zongah kanmah nih kan celh ve tung lo dingmi kha midang zulh ding caah kan suai piak hna awk a si lo. Na tuah khawh vemi na caah a tha vemi cu aho ca paoh ah a thami thil an si ko hnga. Nangmah nih na caah na duh ve lomi midang tuahter le tuanter cu minung thinlung put a si lo. Ningcang tein rian na tuan ko ah cun nangmah nak a thiammi an chuah ding zong ah na tih hlei hna ding a si fawn lo. Nangmah nak santlai lomi he lawng riantuan khawh i nangmah nakin a thiamsangmi he rian na tuan khawh lo ahcun khuaruah awk tlak ngai a si hnga. Herod lungput cu a si. Midang caah kum 60 cu pensen lak ding a si tiah phung na rak tuah tungah cun nangmah caan a phak tik zongah na zulh ngam ve ding a si. Zulh ding phung le lam ngeih cu a tha ngaimi a si. Amah belte a minung zoh in kan zulhmi phung le lam kan thlen lengmag ahcun cucu ruah awk ngai a si. Herod thinlung nih kan ram a uk, Herod lungput nih biaknak lei kan i hruainak a hrawh theu tawn. Herod lungput nih kan biakmi kan Pathian mui a chiatter i kan ram a zawtter.
A sual tukmi Herod kut in sullam ngei lo thihnak cha cun a nuam lem lomi Egypt ram zam kan i thim cu kan mawh lo. Duhnak bik hmun kan i thimkhawh tung lo ahcun kan himnak ding hmun kan kawl cu kan palh cio lai tiah ka ruat lo. Bawi Jesuh Khrih zong nih Egypt ram ah himnak a rak hmuh ko.
No comments:
Post a Comment