(Laimi dihlak) Adam Pahnihnak Si Dingah Thlacam Hna Usih

CIM Caan Hmannak (March 1, 2009)

Caantlaitu: Ngun Thawng Lian, Tokyo, Japan
Thawngtha bia chimtu: Pu Mang Bik, Ottawa, Canada

Bawipa dawtnak, Velngeihnak le hnangamnak cu zumtu dihlak kan cung ah athar in hmun tthan ko seh. Caantha a kan pe tthan tu kan Bawipa a min ka thangthat.

Psalm 48 "Bawipa cu alian a ngan i fak piin thangthat awk asi; kan Pathian khualipi chungah le atlang thiang cungah thangtthat awk asi"

Psalm 34 "Bawipa cu a zungzal in ka lawmh lai, amah thangthat cu a ngol in ka ngol lai lo."

Nihin thawngtha bia a kan chimtu cu Pu Mangbik, Canada Lai Khrihfa bu hna ihawikomhnak ah chungttuan tu asi. India ram Bharat Bible sianginn in a awn hnu ah Rangoon ah Bible lecturer a rak ttuanmi asi. A chungkhar he Ottawa khua, Canada ah an um. Atu bantuk in caan akan pek piak khawh caah lunglomhnak nganpi kan nei. Kan dihlak caah Bawipa nih thlua kan chuah piak ko seh.

Thawngtha bia kan ihrawm hlan ah Esther Lalnunpuii nih 'Tuarnak zong hlawknak' timi Pathian thangthatnak hla asak mi ngai ta hna usih.

Pu Mangbik:

(Laimi dihlak) Adam Pahnihnak si ding ah thlacam hna u sih
(Rom 5:12:1 Corinthians 15:45)

Khrihfa kan si kan ti tikah Jesuh a zum mi, Pathian a zum mi kan si kan i ti nak a si . Patthian kan zumhnak le Jesuh kan zumh nak a hrampi cu Bible cathiang hi a si ko. Kan zumhnak hi Bible ah a hngat mi a si. Zei ca tiah hi kan Bilble cathiang i a tial mi vial te hi Pathian thaw chuah hnawh mi a si. Adik dih mi asi ti kan zumh hmasa hnu lawng lawng ah Jusuh kan zumhnak le Pathian kan zumhnak hi sullam a ngei hnga. Bible hi a cheuchum lawng in zumh khawh a si lo. Kan duhnak lawng chim i kan pom khawh lo mi paoh hnawn khawh zong a si fawn lo. Bible hi a palh mi a um bak lo ti kan pom hmasa a hau. Seh in ca an namhnak le minung kut tial palh sual mi um kunkaw Pathian kan zumhnak le Jesuh kan zumhnak ah a kan pial ter kho ding palhnak cu a um hrimhrim lai lo ti zong kan pom a hau fawn.

Laimi phun Khrihfa kan sinak hi kum 100 leng a si cang nain Khrihfa kan sinak ah “adal” tuk mi zumhnak ah kan nung sual hnga maw ti hi phan a um ngai ko. Thawngtha bia chimtu (Evangelist) tampi nih Bible chung ai tialning tein Biatak a kan cawn piaktu zong tam pi an um ve ko. Sihmanhselaw cawnpiak tu micheukhat an kan cawn piak ning ah Jesuh kong le Pathian kong, Dawtnak kong cu an kan chimh an kan cawnpiak lengluang ko nain Bible Cathiang chung a tial ko mi “Sualnak cu mipa pakhat thawng in vawlei cungah hin a tlung i .....” (Rom 5:12) ti mi Adam sual nih a kan runhnak kong cu an kan cawn piak tung fawn lo in minung pumpaak mimal sual nak kha kan sualnak asi ko ti hna in an kan cawn piak. Sualnak a um lo ahcun khamhnak zong um a herh hnga lo. Jesuh zong kan herhnak a um hnga lo. Khrihfa si zong a herh hnga lo i Pathian zumh zong a hau hnga lo. Misual kan si ti kan pom khawh hlan lo cu khamhnak kan herh zong kan i thei kho hnga lo. Minung sualnak kong le Pathian khamhnak kong a zum lo mi nih cun mi cawn piak ding ah i awt ding kan si lo. Cuvebantukin a ngaitu zong nih kan rak cohlan hna awk an si ve lo. Zei raung ah kan ti ahcun Kan Cathiang chung ai tial mi cu misual mi minung kha Khamhtu Pathian nih a khamhnak thangtha bia a si caah a si.

Kan Bible hi a hramthawk (Genesis)in khuaruah har thil cangmi (Miracles) in a thok mi asi Johan laarnak (Revelation) khuaruahhar thil (Miracles) thiamthiam in a dong. Genesis Dal (I) nak hi vawlei cung ah khuruah har bik mi asi ko. Mah nih hin minung le zeizong vial te sertu Pathian a sinak zong a langhter. Pathian nih “umseh” a ti i thil a hung um thluahmah mi nak in khuaruah har ding thil dang zeihmanh a um lo. Cathiang chung a tial mi a si caah kan zumhawk a si ko. Kan Bible hi Khuaruah har thil cang mi in a khat. Pathian nih Abraham a auhnak , Moses nih Egypt ram in Judah sal tang pawl a chuah pi hna nak in Jesuh a chuahnak , mithi a thawhternak, mizaw adam ternak, a thawhthanak , van a kai nak le Paul lung thlenning le Johan nih laarnak a hmuh mi vial te hna hi khuaruahhar lawng te an si ko. Hi khuaruahhar thil vial te hi kan Cathiang ah ai tail mi an si caah kan zumh dih awk an si ko. Cawnpaiktu cheukhat nih cun a zeimaw zawn ah minung fimthiamnak lei in heh tiah hrilhfiah ai zuam mi pawl zong an um len tawn caah tih anung ngaingai. Khrihfa kan zumhnak ah Khuaruahhar a cang mi thil a umlo ahcun Jesuh zong a um hngalo i Pathian kan zumh mi zong hi ruahchannak zeihmanh kan ngei hnga lo.

A luan cia mi kum 2/3 hrawng ahkhan North America Lai Khrihfabu chungah buainak tampi a rak chuak. Khrihfa bu zeimawzah ai thenhmal dih. Aruang cu chim ding tampi an ngei cio ko lai nain a kan hruaitu hna nih hin thlarau lei kong chim ah an kan daithlanh deuh ruangha tizong hi zumh a um ngai. Thlarau lei in Khrihfa bu a kan hruaitu tu ding Pastor pawl nih vawlei lei kong deuh ah an thazang tamtuk an chuah a si ahcun Khrihfa bu dirhmun a fel kho bal lo. Aluan cia mi kum2/3 he tahchunh ahcun nihin ni North America Lai mi Khrihfa bu cu a dai deuh ngaingai cang. Pastor a ngei mi Khrifabu an um ve bantuk in Pastor reprai angeilo mi Khrihfa bu zong tam pi an um ve. Pastor reprai angeilo mi Khrihfa bu sin ah cawnpiak tu nan vat lawn tikah vawlei lei bu (Organization) kong chim nak in kan nunnak ah a herh mi dawtnak , toidornak le Khamhnak kong te hna rak kan cawn piak hna seh ti hi kan saduh thah a si ko. Thlarau kong cawnpiak lo in bu (organization) kong hna an kan ceih pi ahcun Khrihfa bu a mah te a umciahmah ko mi cawnpiak tu Saya hna an kal bak in Khrihfa bu chung ah “ri” an kal tak. Mah cu "i” nih cun Khrihf Bu a ngan a dam ter ti lo. Khrihfa bu a zaw. A zaw cang mi Khrihfa bu cu a damh a har tuk cang. Saya pawl kal tak mi a “ri” ning te in cheu thai hi a hmabak ah a cang tawn. Khrihfa bu chung ah thlarau kong chimnak caan ka ngei ti lo. Khrihfa bu kong ah kan buai tuk i thlarau kan sung sual lai ti hi thin a phang ko. Pastor nih hi ban tuk in thil a cang ti hmanh an thei men lai lo. An tuah hram mi zong a si theng lem lai lo nain a chuah pi mi a theipar tu kha kan hun langhter mi cu a si.

Washington D.C i an chim cuahmah mi ngakchia nu te kut cung ah Bible cacang ai tial an ti mi tu hna hi kan Pastor pawl nih thlamtling te in kan hlathlai piak hna sehlaw ti hi duh a um ko. Pathian riantuan nak cu khuaruahhar thil in a langh tawn caah Pathian nih Laimi sin ah theihter a kan duh mi thil hi a um lai lo ti hi chim khawh a si lo. Zumh huaha lo in kan um ahcun kan i sunghnak tu a si lai ti hi thin a phang ko. Jesuh nih khuaruahhar thil a tuah lio zong ah khan a zum lo mi tampi an hei um ko i nihin ni thil a cang mi khuaruahhar thil kong zong ah a zum lo tu si ve ding cu duh aum lo ngai.

Khrihfa a si mi paoh nih vancung in a ra mi Adam pahnihnak si hi kan itinh cio caah kan sungh nak hngalo Pathian nih achimtu le angaitu kan dihlak lam ding ah kan hruai zungzal ko seh. Amen!

Mangbik
Canada

Theihternak: March 1, 2009 ni CIM caan hmannak kan tarmi a si.