Negative le Positive

Atu lio ah chim lengmang mi biafang pahnih cu "positive" le "negative" an si. Thawngpang (news) kan bawh i, an thanh tikah "an zapi negative an si" an ti ahcun thawngtha a si i, kan tha a nuam tuk. Nain, "positive cu zat an si" ti ahcun kan tha a dih, kan uai dih. Lungretheih a zualter. Cucaah, atu lio ah theih kan duh lo bikmi pakhat a simi cu "positive" timi biafang hi a si men lai dah. Positive le negative biafang hi an hmannak hoih in sullam dang ngai an ngei. Kan thi maw, a dangdang maw kan i check tikah "positive" a si sual lai ti cu kan phang. Na result (a phi) a chuak i negative na si, ti ahcun tha a nuam tuk. Cucu, keimah lungfian tawk in ka chim ahcun, ngandamnak kong i result ahcun "negative" a si ahcun phan ding a um lo tinak a si. 

COVID-19 kong ah an check hna dikah negative an si timi thawng theih kan duh. Negative cu thawngtha a si. Nain, minung thinlungput ah negative (a tha lo lei in) thil tampi hmuh a hung si. Aho dah hi zawtnak hi a ngei hmasa bik, aho nih aho dah a chawnh i, zeizat dah a chawnh cang hna. Amah ruangah a si, tiin mawhchiatnak a hun tam chin. Cun, huatnak a hun karh. Cu lawng hlah, tihnak le thinphannak nih kan nunnak a hun den chinchin. Thaizing zei dah kan lawh cio lai ti ruah ah, si a vang, lungre a thei cio. Miphun aa cawh in umnak ahcun annih phun le kannih phun tiin i remlonak le thleidannak a karh. Biaknak pakhat le pakhat i hmuh thiamlonak zong a hun i tenh chih ve. Kawlram ah cun Khrihfami le pumhnak in tampi an i chawnh tiin Khrihfami cungah hmuhthiamlonak a ngeimi zong an hung karh. Cucaah, cozah lei zong nih huatnak a karh sual nakhnga lo, thawngthanhnak ca zong an chuah. Negative thil tampi a chuak. Hi lei kapin khua ruah deuhdeuh tikah, thinlung a caw chin lengmang. 

Cucaah, zawtnak kong ah siloin, kan tonmi chungin positive a simi tete zong hi ruat pah chih hna usih. Cu nih cun kan nun a kan bawmh deuh lai. Keimah pumpak in atu lio innchung ah kan i erh lio ah, kaa hlawkmi (positive) le ka tha a nuamhter tu thil tampi lakah tlawmpal langhter ka duh. Nanmah cio zong nih "comment" ah rak chap cio ulaw, kan nunnak caah tlawmte tal bawmtu a si lai, tiah ka zumh.

• Ka nun rihmi, ka thaw ka chuah khawh rihmi cungah Pathian sinah lawmhnak a ka chimter. Chungkhar he caan tampi ka hmang kho. Baibal rel tinak, thlacam tinak, lentecelh tinak, movie zohtinak ti bantuk caan zong kan ngei kho. 
• Online in phungchim thatha le biachim thatha kan ngai kho. Ca thatha an kan tialpiak i, rel a nuam. Theihhngalhnak tampi kaa chap tiah ka ruah.
• Ka rak ruahnak nakin kan pawngkam ah midang cungah zawnruahnak a ngeimi an rak tam. Midang cungah thil tha tuah a duh i, a tuah zong a tuah taktak mi tampi an rak um. Cu nih cun, ka thinlung tampi a damter. 
• Kan mino tampi nih khua le ram zawnruahnak an ngeih ning hi lunglawmh lo awk a tha lo. An i pekning hmuh tikah lung a hmui tuk hringhran. Kan khua le ram anmah nih atu in an kan hruai cang caah, hmailei ahcun kan ram cu a nuam chin ko lai ti ka ruah ah, ka tha a nuam tuk. 

Kan ton cuahmah mi ah lungretheihnak tam hmanh sehlaw, hi chungin Pathian thluachuah rel khawh zong i zuam hna usih. COVID-19 ah cun negative si hram usih law, kan nunnak ahcun positive khuaruahnak le thiltuahnak aa nunpi mi si hna usih.