FEAR in F-E-A-R ah

Atu lio cu December 2019 ah Tuluk ram Wuhan in aa thawkmi COVID-19 ruangah lungrethei in kan um. COVID-19 hi a karh a ran ngai caah le chawnh zong a fawi tuk caah minung kan thin a phanter khun. Vawleicung ngandamnak lei a kan hruaitu WHO (World Health Organization) nih cun ram khat chung lawngah a cangmi a si lo i, vawleipi a culmi phun a si caah COVID-19 cu pandemic an ti.

Atu ca ka tial lio ah hin kan vawlei ah 938,923 nih virus an i ngeih ti a si. Cu chungah a thimi 47,314 an si cang i, a dammi 195,416 an si. Hihi hngalh khawhmi cazin a si. An check khawh hna lo caah theih rih lomi, theih lo lan dingmi pa zeizat dik an si rih lai. Atu lio ahcun US ah hi rai nih a phanhmi an tam bik. Minung zong tam tuk kan thi te lai, tiah an zawndamh chung cang. Hi COVID-19 nih hin ram 203 a cul cang. Kawlram zong ah rungrul hmuhmi 16 an phan i, cu chungin pakhat zong a thi cang.

Hi lio ah mah nunnak thap in rian a tuanmi sibawi pawl, nurse pawl le a dangdang tampi an um. Hi hna hi an re a thei khun. Zaangfak zong an si. An caah thlacampiak an hau. Cun hi damhnak (cure) le khamnak (vaccine) caah rian a tuanmi scientist le a dangdang tampi an um. Cu hna ca zong ah thlacam a herh. Tuan ah damhnak an hmuh i, an chuah khawh nakhnga thlacam cio kan hau. A cheu cu an chungle an thih tikah ruak hmanh hmuh le thlah khawh an si lo, lung a fak tuk lai. Cu bantuk lio ah, cunglei nih ralrinnak tuah cio dingin zulh awk an timi zeirello in a ummi tampi an um. Cu lakah biaknak lei hruaitu zong an i tel. Hi hna pawl caah, an lungfim i, rammi tha an si nakhnga, anmah ruangah hi rungrul a karh chin nakhnga lo thlacampiak an herh.

Kan tih cio, an tih cio. Cucaah, kan thinlung ah tihnak (fear) timi hi a khat. Kei hi tah rungrul ka ngei sual hnga maw ti tihnak, rungrul chawnh ka si sual lai ti tihnak, hi pul (rai) hi an kham kho sual lai lo, kan thi dih sual lai ti tihnak, peh ahcun a tam tuk rih. Hi lio ah Khrihfa a simi nih FEAR (tihnak) hi zei tin dah kan ton lai i, kan tei lai ti hi a biapi ngaingai. Tihnak (fear) nih cun a kan phanh cang, kan hrial kho ti lo. Nain, zei tin dah kan tei khawh lai? Zei tin dah kan nun hrawktu a si sual nakhnga lo, kan um lai? Baibal kan rel tikah "tih hlah" (do not fear [asiloah] do not be afraid) hi tampi kan hmuh. Jesuh a rak chuah hlan ah vancungmi nih "tih hlah" an rak ti i, Jesuh a thih i a thawh than hnu ah vancungmi nih "tih hlah" an ti than. Baibal chung i hmun tampi ah "tih hlah" timi kan hmuh. Hi nih hin minung cu tih a hmangmi kan si, tihnak hi kan ton lengmangmi a si kha a langhter. Hi tihnak (FEAR) hi zei tin dah kan ton lai. Tihnak timi FEAR cu a dang F-E-A-R in kan thlen lai, kan tei lai. A si kun ah, F-E-A-R cu zei dah a si?

F = Finding (hmuh)

E = Encouragement (thazaang peknak/laknak)

A = the Almighty (Lianngan Bik Pathian)

R = Redemption (Tlanhnak/khamhnak)

Cucaah F-E-A-R (Finding Encouragement in the Almighty's Redemption) i a sullam cu Lianngan Bik Pathian i a tlanhnak (khamhnak) ah thazaang i lak ding, tinak a si. "R" hi tlanh (redeem) in a rami a si. Biakam Hlun ah redeem (go'el) ti a si. A sullam cu tlanh ti kha a si i, mah chung chuak a si loah, chungkhar pakhat khat nih harnak an ton tikah, aa naihmi nih cu a harnak chungin chuah asiloah tlanh tinak a si. Tahchunhnak ah, midang sinah leiba tam tuk a ngei, amah tein aa cham kho ti lo, cucaah sal ah tlaih ding a si. Nain, tlanhtu nih a leiba a champiak, a luatter. Cucu "tlanh" timi cu a si. Israel mi hna Babilon i sal an taan lio ah Pathian nih "keimah cu nan Tlanhtu ka si," a rak ti hna (Isaiah 44:14; 43:14; 44:6, 24; 49:7, 26). Salm catialtu zong nih, "Ka kaa chung bia hna le ka lung chung ruahnak hna cu, nangmah cohlan awktlak si ko hna seh, maw Bawipa, ka lungpi le ka tlantu," tiah a ti (Salm 19:14).

Himnak taktak cu BAWIPA lawng nih a kan pek khawh. Cu BAWIPA khamhnak (tlanhnak) kha kan thazaang ah kan i lak ahcun, tihnak nih duhsah tein a kan kal tak ko lai. Asiloah, tihnak cu kan tei khawh lai, a ton zia kan thiam deuh ko lai.