Pathian cu sertu a si. Pathian nih van le vawlei a sernak ah “Bia” (logos – Gk; dabar – Heb; Word – Eng) a hman. Genesis 1 kan zoh tikah Pathian nih a Bia in zeizong vialte a ser ti kha kan hmuh. Phundang in kan chim ahcun, Pathian Bia ah thawnnak a um. Sernak vialte hi Pathian thawngin a cangmi an si. Bia hi Grik holh cun logos ti a si. Grik mi hna an ruahnak zongah hin bia hi a rak biapi tuk ve. Bia (logos) thawngin zeizong thil hi a cangmi an si tiah an zumh. Johan Thawngtha tialtu pa nih a hramthawk ah Bia a um, cu Bia cu Pathian he an um ti, cu Bia cu Pathian a si i hi vawlei ah pumsa in a hung lang (titsa a cang) tiah a ti (Johan 1:1).
Pathian nih a mi hna he pehtlaihnak zongah a bia a hman. Biakam Thar kan zoh tik zongah Jesuh Khrih nih bia hmangin thlichia a daihter, khuachia a thawl, mizaw a damh hna, khuaruahhar thil tampi a tuah. Bawi Jesuh Khrih kha sual an phawt lio ah khan “Messiah ka si aa ti” tiah an puh. Mipi bia ruangah (a bik in, Judah hruaitu hna bia ruangah) Bawi Jesuh zong an thah. Cucaah bia hi a biapi tuk. Bia ah hin thawnnak a um. Kan chimcangmi bia lak than awk a tha ti lo.
Pathian le Jesuh Khrih nih cun an bia kha vawlei sernak le minung kan thatnak caah an hman. Joseph Stalin nih cun, “Bia cu hriamnam a si,” tiah a rak ti. A hman ngai. Pathian nih zeizong vialte sernak ah a hmanmi hriamnam cu a Bia a si. Jesuh Khrih zong nih thawngtha chimnak ah siseh, mizaw damternak ah siseh, khuaruahhar thil tuahnak ah siseh a bia a hman ve. Bia cu hriamnam tha tukmi a si caah a hman thiam ahcun bawmtu tha ngai a si. Sihmanhsehlaw, a hman thiam lo ahcun rawhralhnak a chuahter khawh. Cucaah, Laimi nih hawi he kan i pehtlaihnak ah, kan bia hman kan i ralrin ngaingai a hau.
Bia nih thil tamtuk a tuah khawh. A ngaihchiami pa a hnemh khawh bantukin, a lung aa lawm komi pa kha a ngaih a chiatter khawh thiamthiam. Midang lung a lawmhter khawh i, fahnak zong a pek khawh. Nitin nunnak zongah bia lo cun nun khawh a har. Ni khat ah hin minung pakhat nih holh fang hi tamtuk chim khawh a si. Micheu nih cun bia (holh) cu fimnak hmuhnak ah an hman. A cheu ve nih cun minthannak ah an hman. Cachimhnak ah an hman, ca kong ceihnak zongah an hman, ramkhel kong ceihnak zong ah an hman. Mifimmi nih cun thanchonak le thatnak ah an hman. Sir Robindranath Tagore nih cun, “Mifim caah cun bia kaa khat hi a za ko,” tiah a ti.
Laimi nih bia kan hman biknak pawl zoh tikah, mi kong ceihnak, mi thangchiatnak le mah i chimthiamnak ah kan hman. Bia hi le thawnnak a ngeitukmi a si fawn. Cucaah, fahnak atu le atu a kan peknak hi a si. Kan bia chimmi ah ralrin deuh kan hau. A herh lomi mahca zong a tha hnem lomi, thinlung a kan then kho mi, miphun le midang fahnak a pe kho mi bia chim kan i sum a hau. Kan bia hi ralring tein kan hman i, miphun sersiamnak ah kan hman ahcun a kan thanchopi lai. Nain, kan thiam lo belte ahcun lungfahnak a chuahpi lai, kan miphun kan hrawh sual lai. Bia chim i suum deuh cu kan herh ngaingai. Thil tha sernak ah bia hman i zuam hna usih.
No comments:
Post a Comment