Chin National Day

Nihin cu Lai Miphun Ni a si. Hmun kip ah nuam tein hman cio timh a si. Kei belte cu khoika hmanh ah kaa tel kho lai lo. Ka umnak khua ah an tuah ve lo cu ta :) :) Lai Miphun Ni tuahnak hmun i aa tel khomi cu hngar nan um ngaingai.

Lai Miphun Ni cu kum dang bantuk in Pu Ceu Hlun nih a website (Robawm) ah a kan tuahpiak than, tukum zong. Nan len rih lo sual ahcun HIKA ah leng te uh.

Nikum Lai Miphun Ni zarh ah CIM ah thawngtha chim an ka fial i, ka chim. A zuammi nih HIKA ah rel khawh a si. Cu ahcun ka chimmi cu Laimi hi mi tlawmte taktak kan si. Pathian nih kan umpi hlah sehlaw, nihin ni tiang kan dir kho hnga lo. Pathian nih Laimi a kan umpi caah a si, cucu philh hna hlah usih ti kha ka chimmi cu a si.

Lai Miphun Ni kan tuah tikah Lairam caah zei dah thathnemnak kan chuahpi khawh lai timi kan ruah/tinh chih hrim a hau. Philhlonak sawhsawh men a si ahcun sullam a ngei tuk hnga lo.

Uico Lam Hnok

Kan Laiholh ah "Uico lam hnok" timi a um. Hihi phungthluk bia cu a si rua lo dah. Chimbia sawhsawh deuh a si rua tiah ka ruah. Ka palh hnga dek maw? Hi biafang hi Lailei lo a rak kal balmi nihcun kan fiang kho ngaingai cio ko hnga tiah ka ruah fawn.

Zingka in lo kal kan i thawh i uico nih a kan dawi ve tawn. Hi ui hi midang ui an si bal lo. Kanmah uite an si tawn. Lo lam kan kal pah ah lamthluan chuakin hmailei an tlik thulh, hnulei an rak tlik thulh, lamchak ah an kai thulh, lamthlang ah an zuan thulh, minung an kan lawmh i an kan zuanhnawh thulh, an kan liah thulh, lam lai ah an bawk thulh, an bao thulh i, mineng thla in an um tawn. Cuticun lo kan phan i naidem pakhat khat ah an lei an i chak i chunnitlak an bawk huar tawn. Thawh khawh zong an si ti lo. Dawi khawh zong an si ti fawn lo. Asinain, zanlei lo lam tlun kan i timh ah anmah timhin an i tim ve tawn i, minung nak hmanhin an i nuam deuh tawn. Minung cu chunnitlak lo kan thlo i, kan tlun tikah tih thing maw, zil le mai ti bantuk maw, seikhat le paiper khat in kan phorh tawn. Retheih le thabat in kan kal lioah zei ngaingai a tuah lomi uico nih chuk le cho in an choiper i, lam kal thiam loin an kan tuah tikah"cu ngai ui, lam na hnok cu" tiah rak zai hnawh a si tawn (Umm! Kalemyoh kan uitum Rocky kha ka ngai). Cucu "Uico lam hnok" tiah an chim tawnmi biafang a um.

Chan aa thleng tuk cang i ui ngaingai he lo lam kal kha atu hi a um ti hnga dek maw? Uico zong cu Laimi nih a sa kan ei fawn cang i, lo lam a hnoktu ding khom an va um ve ti hnga dek maw?

Perhkalh

Theihternak: Pu Perhkalh nih Lai Forum le Rungcin ah February 17, 2010 ah a tialmi kan tarmi a si.

Na ThinLung Tha Tein Veng

CIM Caan hmannak (14th February, 2010)

Bawi krih ah Zumtu Nu le Pa hna,

Pathian dawtnak, Velngeihnak le Daihnak cu nan dihlak cung ah hmun tthan ko she. Caan tha a kan petu kan Bawipa Zisuh Krih a min ka thangtthat. Nai chunghrawng thawngtha chimnak ka rak thlah kho lo I ruahzia rak ka thiam hram uh. Pumpak in ca a ka kuami le zarh fatin te thawngtha bia a rak rel lengmang tu Nu le Pa hna, thlacamnak in akan bawm lengmang tu Hawikom dih lak, thawngtha ka thlah khawhlo zarh chung vialte kan laklawh ngai hna ti zong ka theih. Ka lung attha ve hrim lo. Hi hnu tu pehtlai thliahmah te’n kan zuam khawh lengmang nak lai thlacamnak in kan Bawm cio uh ti zong kan sawm hna.

Baibal Caanthim:

Phungthluk bia 4:23 “Na lung kha ttha tein veng tuah, zeicahtiah cu ka cun nunnak cerhti kha a put.”

Na ThinLung Tha tein Veng

Pathian bia nih kan lungthin iveng ding in a kan chimh. Aruang cu cuka chung cun Nunnak Cerhti aput caah asi. Hebru holh ah ‘tot-saw-aw’ timi biafang ahman i cucu ramri tahnak (Boundary or Geographical Term) ah an hman mi biafang asi. Cu nih a langhter mi cu lungthin nih hin zeitluk zau khi dah ahei huizau I cu chung cun zeibantuk dah a luangchuak mi an si? Phundang chim ah cun, kan lungthin umtu nih hmailei kan donghnak tiang bia a chah ti khawh asi hnga! Kan rian, kan inchungkhar etc.. vial te tiangin.

Pathin bia nih kan lungthin rian a ttuannak achim mi, atawinak in zoh tti hna hmanh usih.

Khuaruahnak ah

Phungthluk bia 23:7a ah “Mi nih athinlung in aruah bantuk in amah zong asi ve” (Pro 23:7 For as he thinketh in his heart, so is he: KJV) (Lai Baibal ah aa ttial lo caah Mirang ta ka van ihlan duak)

Zumhnak ah

Rom. 10:10a “Zeicahtiah kan lung in kan zumh I Pathian he iremnak kan hmuh.”

Kan bia-ka ah

Rom 10:10b “Kan ka in kan chim I khamh kan si.”

Kan khuaruahnak hi zumhnak ah acang I zumhnak cu biaka ah achuak tawn. Cu vialte cu kan lungthin in hram arak ibunh mi an si. Nihin I Vuleicung mithiam hna le a hlawhtling taktak mi hna hi Zumhnak chungkhar chung minung an si lo na tein, an hlawhtlinnak biathli hna an chim tik ah zeidang silo in, Pathian bia principle ah an rak Ibunh diam cang! Tahchungnak ah..Khuaruahning hman le tha or atha lei kap I khuaruah pengnak (Positive thinking), zumhnak/ an zumhmi ah fek tein dir ahauhnak, Hmurka thlum al abia pit nak etc… bantuk hna hi an hlawhtlinnak muru an si nak kong an chim lengmang. Cu vialte cu lungthin in hram aa thok mi an si hna caah, afale hna hlawhtlinnak lam zawhter a kan duhtu Pa Pathian nih kan lungthin thurhnawmh ter lo le, kilven tthat ding hi a kan duh piak nak an si.

Kan thinlung hi kan nunnak laimuru zong asi i Pathian bia in itharchuah peng kan herhnak zong asi. Zisuh krih hi Khamhtu le Bawi I kan cohlan tik ah Lung bantuk in a hak mi kan thinlung kha Titsa bantuk in a nemmi lungthin in thlen ding ah Pathian nih a kan timh colh. Cun, kan ngaihchiat tik zong ah kan lungthin ah thazaang pek le tthawnter akan duh. Asina’n, kan thinlung iven ding tu cu kan mah mawhphurhnak asi ve. Kan iven khawhnak hnga ding ah Pathian nih hriamnam, a bia (Baibal) akan pek fawn. Cu lam cu David nih fiang tein a theih ve tik ah Ps. 119:105 “Na bia cu ka ke caah Mei-inn asi, ka lam caah Ceu nak asi” tiah a ti.

Lungthin aa veng lo mi kan si sual ah cun, zeidah kan si lai ti cu ruahnak sawh hmanhin tuaktan fawi te asi. Lunghtin duhnak poh kan zulh ah cun thihnak le rawhnak hna nih a kan hngah cia. Zeitik dah ti lawng khi asi ko? Cu ti titik ah, Vanchiat a tongmi poh lugthin aa venglo mi an si ti duhnak asi hrim loh. Lungthin kan iven lo ruang tu ah acaan lo piah Vanchiat le puicimh nak nih akan nenh khawh nak kong tu asi deuh. Cu lam chung in kan luat khawhnak hna Pathian bia nih ralrin a kan pek nak tu asi fawn.

Bawi Krih ah zumtu dihlak Pathian minin lungthin aa veng kho mi cio kan sinak hngasaduhthahnak he ka bia ka dongh ter.

Upatnak he,

Ngun Thawng Lian

Japan

Theihternak: February 14, 2010 ni CIM caan hmannak kan tarmi a si.

Happy V-Day!

February 14 cu V-Day a si. Vawleicung ram tampi ahcun February 14 a si cang. Dawtmi hna sinah dawtnak langhter ni a si caah thil pahnih tuah cio awk a si. Pakhatnak, a kan dawtu hna, an dawtnak ruah than. Pahnihnak, kan dawtmi hna sinah dawtnak langhter. V-Day hi ngaknu tlangval ca lawngah a si lo. Dawtmi le dawtu a ngeimi minung vialte caah a si. A tanglei Hniang Hniang le Merry Lynn hlasakmi hna hi ngai ve hmanh.

A Hmunmi Dawtnak (Satu: Dawt Hlei Hniang)


Dawtnak Hmunseh (Satu: Merry Lynn)


Lung Duh A Comi Hna (Satu: Lal Cung Awi & Dawt Hlei Hniang)

Cin Cin

Kawlram 2009 Melody World hlasak zuamnak ah pahnihnak a kan hmuhpiaktu Cin Cin hlasak lio a si. A thiam ngaingai. Laimi biaruahnak group ah thawng a thanhtu Pastor Mang Hre cungah kan i lawm.

Nihin Rawl: Zohkhenh Lo

Mi pakhat khat nih a rualchan kha a zohkhenh hna lo ahcun, cun cu nak hmanh in biapi deuh a simi cu,

a innchungkhar kha a zohkhenh hna lo ahcun,

amah cu zumhnak a hlawmi, Pathian a zum lomi nak hmanh in a thalo deuhmi a si.

- 1 Timote 5:8

Zei Kong Hen Dah Ka Tial Lai?

Zei kong dah ka tial lai? Tial ding ka hngalh tung lo. Tuni cu mah nih cun a ka buai ter. Ka hawile pawl nih le an thil thar cawkmi he an buai khim. Lai Rawn nih mithman thar te aa cawk i, aho te a kan hmu ti lo.:) Pa Pum nih bicycle aa cawk i aa cit lengmang an ti.:) Kawi Chan nih US um lio ah mawtaw i cawk ah a tha a ti i, nai ah aa cawk.:) Aho hmanh ca tial fial awk an tha lo. Tial loin maw kan um kun lai?

Voidang ahcun tial ka duhmi le tial dingmi tampi ka ngeih tawn tung, atu tan vial ziah tial ding hmanh ka hngalh hnga lo, tiin khua a ka ruahter. A hnu bik ca ka tialmi zei tikah ti ka zoh i zarh hnih deng a rau cang. Elaw, ka fiang, ka fiang. Ka tial lonak a sau caah, tial ding ka hngalh lo a rak si ai. Tuni cu ka tial phut lai. Ka tial lo ahcun, tial ding ka hngal chin lai lo. A hnu ahcun, keimah le keimah hmanh ka hngal te lai lo.

Minung kan nunnak ah kan ton lengmangmi thil pakhat cu a si. Thil pakhat cu kan tuah deuhdeuh tikah kan thiam chin i, a tha chin fawn. Kan tuah lo deuh tikah tha lakin tuah ding cu chim hlah, tuah menmen hmanh a fawi ti lo. Nai ah kan hawipa he bia kan i ruah. Mah nu khi a hlasak ngaih a nuam tuk, tiah Laimi hlasatu pakhat kong a ka chimh. Cu nu cu a ngakchiat in ka theih le hngalh ngaimi a si. A ngakchiat lio, ka mitthlam ah ka suai. Hlasak a rak i domh ka, ka hngalhmi a si. Guitar he sak zong a rak thiam set lo. Sak taktak hlan ah voi tampi sakter hmasat a rak hau. A cheu nih, hlasak a zuam tuk i a si ko, lungre thei bak a si, an ti. Nain, a duh vemi, a zuam vemi a si i, nihin ahcun keimah hrim zong nih ka uar ngaimi hlasatu pakhat ah aa chuah ko. Hla cu a sak deuh, a thiam deuh, a aw zong a tha deuh, a sak deuhdeuh, a sak ning a thiam, aw chuah a thiam chin i, atu ahcun min hngalhmi pakhat (Laimi chungah) ah aa cang.

Pathian nih hin pahrang cu a kan pek cio. Pakhat le pakhat belte kan i dang. Hlasak thiammi an um. Guitar tum thiammi an um. Hlaphuah a thiammi an um. Cu hna lakah cun kei bel ka tel lo :) Nain, hla ngaih cu ka zuam ngai. Carel pah hmanh ah hla i chuah a hmangmi ka si. Hlasak thiam siseh, guitar tum thiammi siseh, hla phuah thiammi siseh, pehzulh tein an tuah lo ahcun, an hnawl kho. Cucu, minung phung a si. Nain, pehzulh tein an tuah, an i zuam ahcun an thiam chin lengmang. Min thatnak tiang a coter hna. "Hla" kong in tahchunhnak kan chimmi a si. A dang kong zongah cu bantuk thiamthiam a si ko. Kan tuahmi thil kha pehzulh tein kan tuah, cun lungum tein kan tuah ahcun a tha chinchin lai. Tuah chap ding kan hngalh chinchin ko lai.

Thil pakhat tuah tikah a thawk cu a fawi ngai, nain a pehzulh belte a har. Pehzulh khawh i zuam a hau. Atu zong hi tial than khawh dingin ka tial chih phut. Catial zuammi nih pehzulh tein catial kan hau. Carel zuammi nih pehzulh tein kan rel a hau. Kan ngol tikah kan hnawl. Kan thangcho ti lo. Cun, tuahmi ah i biatak a biapi ngaingai. Aize, zei kong hen dah ka tial lai, ka ti nain hi zatzat ka tial ko. Catial ding na lung chuahmi a um ahcun, tial phut. Cun pehzulh i zuam. Carel na duhmi a um ahcun rel phut. Cun pehzulh i zuam. Thil pakhat tuah na duhmi a um ahcun tuah phut. Cun pehzulh i zuam. Pehzulh tein thil tuah khawh hi a biapi. Pehzulh tein a tuah khomi cu mi ah an i chuah deuh ko.

Caledonia

A tanglei hla hi a tha kho tuk, ka ti. "Caledonia" timi hi Scotland ram tinak a si. Hlacuang in an auhnak a si. Atu a satu hi Lisa Kelly a si i, Celtic Woman i hlasatu pakhat a si. Celtic Thunder le Celtic Woman an phu hnih ning in ka uar ngai hna.



A tanglei a nolhnak hrim nih hin "Lairam" kong a ka ruahter ngai:

Let me tell you that I love you
That I think about you all the time
Caledonia, you're calling me, now I'm going home
But if I should become a stranger
Know that it would make me more than sad
Caledonia's been everything I've ever had

Lai Rawn nih a Thih le a Nun aa Hngal ve ti lo

Chanchia lak nun si, khuasak tintuk nak caah ruah a si. Riantuan pah cu si, retheih thabat cang ah cun computer zong kau zuam a si ti fawn lo. Cu kar lak ah Khrihfabu kong riantuan pi an hau pah rih, sizung ah e, zung ah e tiah mi bomh a hau mi sin caan pek a hau pah rih. Mah ca hi zei cadah a si tiah inn ah a rak pu mi zazat an si. A caancaan ah (a herhngai mi ca a si tawn nain a caancaan ah cun cawngia hna an si hoi). Chungkhar din ei ding tuaktan a si rih. Khat lei in sizung kal le sibawi ton ding ka si pah rih fawn. Dangkhat lei in lailei thawngtheih a hau rih fawn. Lailei nih vun fial mi tam nawn lak ah pakhat hnih tal kai zuam kho hnga maw ti a si rih. Chungkhar hna dam set lo le bangah cun loh bak a si cang ko . . . cu ti le cu ti cun a si i a tu hi Lai Rawn cu a thih le a nun aa hngal ve ti lo. Bibik, vun sik law a thei hnga maw? A theih rih ko ah cun a nung rih tinak a si hnga i a theih ti lo le a nung ti lo bia a va si te ko hnga? . . . . hehehehe . . .