Cyclone Nargis Pinlei Ah

March thla ah Cyclone Nargis timi nih Kawlram thlanglei a den caah, minung tampi nunnak a liam. Khua tampi cu a tlau in an tlau lan. Mi tampi cu an chungkhar nih an thih tak hna i, anmah lawng a luatmi an si. Atu tiang hi, cu bantuk harnak a tongmi hna cu, bawmh hau in an um peng rih ko. Hi hnu zong ah saupi bawmh hau an si rih lai. Kawlram ah thlichia le tilet nih minung sing khat le thawng sawm nga (150,000) tluk an nunnak a liam ter hna. March thla chung thiamthiam ah, Taluk ram ah li aa hnin ciammam i minung tamtuk an thi.

Cu kong he pehtlai in mi tampi nih an hmuhning an chim cio. Kawlram a cozah a that lo caah Pathian dantatnak a si kho men, tiah a ruat zong um a si. Micheu nih cun, minung nih kan ruah khawh mi pinlei thil an si, an ti ve. Hi Nargis kong ah ruahnak a phunphun a chuak. Harnak a tongmi hna kong ruah tikah lung hrim a fak tuk.

Cu tlukin, harnak kan minung hawi nih an ton lio ah Pathian dantatnak a si, a timi ko hi an poi tiah ka ruah. Pathian nih Kawlram dan a tat tiin cun ka zum hrim lo. Pathian hi minung hna palhnak a kawlmi a si lai ti cun ka zum lo. Sihmanhselaw, minung kan si caah hi thil a cangmi hi lungfian kan i harh. Kan thei kho lo.

Ruah awk a ummi cu: Pathian nih sual ruangah dantat siseh law, ziah ralkap bawi pawl an thih lo? Zei thei lo, sualnak zong a tuah lomi ngakchia tampi an thih kun? A thimi hna nakin, atu i kanmah a nungmi hi kan tha deuh hlei maw? Zumhnak kong in chim usih law, Khrihfa tampi an thi ve. A thimi Khrihfa hna hi kanmah nakin an zumhnak a der lai ti cu ka zum hrim lo. Hi thil a cangmi kong ah, minung kan ruah phanh lo a si, lung a fak ko ti lawng chim khawh a si. Cu kong ceih len nakin zei tin dah miharmi, harnak a tongmi hna hi, kan bawmh khawh hna lai ti tu kan ruah deuh ding le, kan i ceih deuh ding a rak si.