Khrihfa cu Baibal Cathiang Kan Si

"Khrihfa cu Baibal Cathiang kan si" timi hla hi Rev. James Biak Peng nih a phuahmi a si. A tha ngaingai. Cun video i hmanthlak hi kan Laitlang (Thantlang le Thlantlang lam i thlakmi) hmanthlak an si i, na zoh rih lo ahcun zoh ve hmanh, hla ngaih pah in.

Jonah Cauk Reltinak

Tuzarh thawkin zarh khat ah voi khat a siloah voi hnih lengmang Jonah cauk kong tial ka tim. Phundang in chim ahcun, Jonah cauk hrilhfiahnak tial ka tim i, ka tialmi tete kha ka hun tar tawn lai. Ka tinhmi cu hmailei ah cauk tein chuak kho te seh tihi a si. Tutan ahcun Jonah kong hmanthlak an suaimi tampi a ummi lak ah a tanglei hna hi ka hun tar. Hmanthlak zohin Jonah kong midang nih, a bikin, hmanthlak suaitu nih a fianning kha hmuh khawh ngai a si. Kannih nih tah Jonah kong ah kan mithlam in kan suai tawnmi hi zei bantuk hmanthlak dah a si ve? Hmanthlak pakhat nih chim duhmi tampi a ngeih tawn. Asiloah, chim duhmi pakhat tal cu a ngeih tawn. A tanglei hmanthlak hi pakhat hnu pakhat in duhsah tein zoh ve hmanh.

Chin National Day

Theihternak: Rungcin pu Cinte nih a tuah i, Rungcin biaruahnak ah a kuatmi kan tarmi a si.

Obama Inauguration Hmanthlak

Tuni President Obama Inauguration hmanthlak tlawmpal ka tar. Hi hmanthlak pawl hi BBC ta ka lakmi an si :).

A tanglei hi President Obama biakamnak a tuah lio a si:


Hi Bible hi Abraham Lincohn nih biakamnak a rak tuah lio i a ra hmanmi a si.


Vice President Biden nih a lawmhpi lio:


Hi zat taktak mipi hi an chuak:


Aretha Franklin nih hla a sak i cu zong cu a tha taktak:


A tang zong hi:


Hi bantuk hi cu vawlei tuanbia ah a um than ti hnga maw ti awk in a um.


A tang zong hi. Laimi zei zat dik an kal kho ve :-)


Ramhun hlun George Bush le a nupi Laura Bush le nihin in President tuan dingin biakamnak a tuahka President Obama le a nupi Michelle Obama.


President Bush cu tuni cun a rian a dih cang caah a umnak ah kir dingin an thlah lio a si.


Biakamnak a tuahnak hi US Capitol ah a si. A tanglei hi biakamnak le biachimnak a ngeih dih hnuah, White House lei i an kal pah a si:


A tanglei zong hi:


Vawleicung fidi an cang ko. Zoh an dawh ngai.

A Fawi Lo

A fawi bak lo. Na mawh lo, ka ti colh uh. Nan ka ti colh lo ahcun, coka ah ka kal lai i, rawl ka va ei ta lai hih! :) Blog i catial hi a fawi pah dingin ka rak ruah nain a rak fawi bak lo. Mi lungtluanh hrim pei a rak har tuk hi, ka timhmi cu a si lo nain :).

Ka vun phuan ko lai, Kum Thar kan phanhka a si ko zong ah. Nai kha Lai Rawn nih tha tein a ka chawn lo. Zei ruangah dah a si hnga aw, tiah ka ruat. Lai Rawn hi nai hrawng a zei dik a ti ko, ka ti i, ka rian le tam pah kaw, hal caan zong cu ka ngei lo. Hi ti a ummi hi cu, kan ngakchiat lio i an rak chim tawnmi "dah lo zu a ri" timi khi a si rua, ka ti ko. Zei dik aa ei sual i a si bak lai, tiah ka ruat i, ka lungre a thei pah. Nain, atu ca ka tial lai te ah kan i chawn i, atu cu ka hna a ngam cang.

Ka lung a hung fiang, zei ruangah dah a ka chawnh duh set lo timi. Amah nih a theih lem lai lo caah, phuang ko ning. Columbus lei Khrismas ka va hmannak ah sacek kan ei; ka eimi cu hihi a si tiah hmanthlak ka tarmi kha, mah kha a rak ka hngar ko cu ee. Cu ruangah cun, dah lo zuu a ri i, a rak ka chawnh lo kha a rak si ai :-)

Mah kha cu um cang ko seh. Blog i catial hi a fawite ah nan ruah men lai. A fawi taktak ko. Mah duhmi paoh tial ko ahcun. Nain, a fawi lo, a fawi lo. Tialmi a sau deuh le, a reltu nih lanh tak a si. A tawile rel tlak a si lo ti a si fawn. Ummm . . . kaa ngol hnga maw, ka ti pah. Nain, ka ngol ahcun Lai Rawn le Papum catialnak hmun an ngei ti lai lo ti ka phang fawn. Cun, keimah lila zong tialnak hmun ka ngei ti lai lo si :-)

Ka philh deng. Na blog ka rel tawn, tiah vei timi khua i a ummi kan farnu nih a ka ti. Ka umnak ahcun Jan 6 a si cang nain, anih umnak ahcun Jan 5 lawng a si rih. Nizan le tuni bak kan i chawn :) "Nizan" ka vun ti paoh ah, anih ca i nizan cu, kei ka caah cun nizan-tihni kha a si ai. Caan kong kan chim paoh ah, kan buai deng. Aize, zei set a si lomi ka tial hoi hih. Tial kaa timhmi ka tial tan tim ah, ka philh ai. Ka lo ka lo. Tar lei kan hun panh hin cun lung te hi a lo eh. Ruat thiam ko uh :)

Atu zong hi zoh hmanh uh, nan lung tluanh kaa tim rua nain, ka ti kho lo hih. Nain, nanmah cio zong zei hlei hlah, ka tialmi paoh nan hei rel phut ko hi mu :) Ka duhmi paoh ka tial lai ka ti nain, nan ral kan tih pah hna rua, tial ding hrim a chuak bak lo, a fawi lo, a fawi lo :)

Matupi le Bungtla Tisor - 2

Nizan ka tarmi ahcun Matupi khua a lang dih lo. Atu zong a lang dih kho lo nain, tam deuh cu a lang. Kan hei hmuh khawhmi thlanglei ah a zuangmi lam a thlanglei bik i bo te i inn tlawmpal a ummi khi UTS (Union Theological Seminary) Matupi i Baibal Sianginn a si. 1998 ka rak phanh lio ahcun thli fak tukin a rak hran caah Sianginn canphio le hreh pawl a rak choih dih i, an remh cuahmah lio a rak si. Ka chimmi nan hmuh thiam lo le, ka thei ve lo. Kei cu ka hmuh khawh ko :)

Bungtla Tisor aa dawh hringhran

Bungtla Tisor hi cu khoika paoh ah chuahpi ngam ding bak a si.

Thal lio i, Bungtla Tisor ah ti i kholh cu a nuam bak lai :)

Fingtlang cuanh ah lung a leng, Pathian sermi kan Laitlang.

Matupi le Bungtla Tisor

Nizan ah Matupi ka hawipa nih Matupi khua le Bungtla tisor le a dang hmantlak pawl a ka kuat. Cu chung cun pali ka hun tar hna. Matupi khua hi May 1998 ah ka rak phan bal. Cu lio zong cu a ka theihter than. A tanglei hi Matupi khua a si. Kan hmuhmi pinlei zong ah inn tampi an um rih.

Bungtla tisor hi aa dawh taktak. Matupi ka rak phanh lio ah kal i va zoh, ka duh ngai nain, nikhat lawng kan caam caah caan a um lo. Matupi khua in a hlat lo caah, lamhlat lawng in ka rak hmuh.


A tanglei tlang hi a min a ka chim lo i, ka thei lo. Matupi ram ah a ummi a si ve. Kan Laitlang hi a rak i dawh hrim ko.


Matupi ram ah a ummi tiva pakhat a si. Laitlang ah cun tiva kal i ngahring dawi kha a rak nuam tuk. Hawile he tiva i rak tlonlen ti kha philh awk a tha lo. Aw tak ah, nan zuam ahcun tuzarh zarhteni ah kan kal hna lai cu. Nu pawl nih sei le sawngbawm i put u law, pa nih sur kan i put ve lai. Tal zong kan in kalh piak hna lai :-)

Hakha Khuahlun Biakinn A Kang

Kum tampi rianh in an sakmi Hakha Khuahlun Biakinn cu November 24, 2008 chun lai ling ah a kang. A kanghnak a ruang set theih a si rih lo. Transformer in a si rua an ti. Hi a kangh lio ahhin aho hmanh an um lo. Kachin pawl an tlawng hna i hawikomhnak an ngeih lio a si, an ti.

Hi Biakinn hi 2005 ah an luhmi a si caah an hmannak hmanh a sau rih lo. Tuzan hi Khrihfabu cu a hngilh hmanh an i hngilh kho lai lo. Mitthli he an um lio a si lai. A tanglei hmanthlak zoh ah ngaih a chia tuk. Pathian sinah thlacam piak cio hna usih.

Biakinn A Hmailei


Lamhlat in


A Hnulei in