Friday, January 29, 2010

Lai Rawn Khoika Dah A Phanh?

Lai Rawn hi a tlau bak ko. Ca zong a tial ti lo. Zei ko nih dah a tem hnga? Tuni cu Lai Rawn hi kawl lo ahcun a tlau thai sual lai tiah heh tiah ka kawl. Nihin kan vawlei cu khuate bantuk a si, an timi hi a hman pah. Sau hmanh ka kawl lo, ka hmuh colh ko.

Nain, minung ngai hi kan i thlen a rang tuk. Ka rak theih le hngalh mi Lai Rawn a lo ti lo. A rak i thleng ngaingai. HIKA ahhin ka hmuh i, ka lau ko. :-) A tlawmpal ah HIKA ah ka va hmuh than. Minung ngai te kan i thlen a ranning hi ka ti. :-)

Cun, HIKA ah ka hmuh than hoi. Ziah mah tluk in aa thlen manh hnga, nikhat chungah tiah ka buai :-) US ram phanh hnuah cun mawtaw mawngh thiam hrim a hau rua, HIKA ah a mawngh lio zong ka va hmuh. Tlawmpal ahcun HIKA ah ka va hmuh i, ka lung a ka hrawh ngai. Zei tin dah Lai Rawn hi lungfim lakin kan tuah khawh hnga aw, ruahnak kan pek cio uh :)

Wednesday, January 27, 2010

10,000 Tlinnak

Dinnak: Zei Tin Na Ruah Ve?

Vawleicung milurel hi an karh tuk cang caah vawlei thil chuah (natural resources) nih a kan za ti lai lo, cucaah hmailei kum 100 hrawng ahcun mangtam a tam chinchin lai tiah mi cheukhat nih an ti. Ruah tikah a si kho ngaimi thil an si. Vawleicung milurel a tam bik a rak simi Tuluk nih fa tampi ngeih lo dingin policy a tuah, nain India le Muslim pawl nih fa tam tuk hring hna kaw, vawlei milurel kan karh thiamthiam ko. Cu hmanh ah, Muslim pawl an karh ning hi a rang tuk ti a si. Hmailei caan tlawmpal ahcun vawlei milurel ah Muslim hi Khrihfa nakin an tam deuh te lai tiah cheukhat nih an ti. A si kho ngaimi thil a si ko. Nain, vawlei milurel an tam le an tlawm kha hi ka ah tial duhmi taktak cu a si lo. Muslim pawl hi zeicadah hi tluk rangin an karh hnga ti zong kha chim duhmi a si fawn lo. Nupi tampi ngeih ahcun an karh ko lai ta. Chim duh taktak mi tu cu a dang a si.

Magid hi Saddam Hussein i chungkhat, cun Saddam chaan lio ah uktu bawi pakhat a rak si ve. Kurd, Shia le Sunni tiah Iraq ah an um. Magid le Saddam hi Sunni phun an si. Shia pawl hi Irag milurel i mitam (majority) an si. Kurd le Sunni pawl hi mitlawm deuh an si. Nain, Iraq uknak kha Saddam kut cung a phanh hnuah Kurd pawl hi tampi an rak thah hna. Cun, Shia pawl zong thahnak an rak tong ve. 1988, 1991, 1999 hna ah khan Magid le Saddam nih tam lak te an rak thah hna cu a si. Kum an liam, caan an liam, thil sining an i thleng ve. Cuticun, 2003 a phan tikah US nih Iraq cu a tuk. Saddam nih WMD a ngeih caah a si an ti, nain an hmu lem lo. Cun, an hmu ti lem lai lo. Nain, Iraq kan tuk hi a sualnak a um lo tiah Bush nih a chim, a ruang cu Saddam le Magid nih an rammi (Shia le Kurd) pawl tamtuk an rak thah hna caah a si. Afganistan an tuk lio 2001 in nihin tiang Osama cu an tlaih kho lo, nain Saddam le Magid tu cu caan kar te ah tu fano bang an tlaih khawh colh ko hna.

Cutincun, Saddam kha Iraq Court nih thihnak thong (sentenced to death) an pek i an rak thah. Nizan ah Magid hi an thah ve. Magid an thah tikah, rights group pawl nih sual an phawt ti a si. Cun, Iraq mipi cheukhat nih sual an phawt an ti ve. Mah hihi leh rulh (revenge) a si an ti. Nain, a rak thahmi hna i chungkhat nih cun an lung a tling ngai ti a si ve. An mawh lo ti awk in a um ve ko. Jesuh nih na ral kha va daw hna a ti tikah Jesuh nih zeitindah a va hmuh ve hnga ti hna khi a herh le herh lo in ka ruat. Jesuh cu hal awk tha ti hlah kaw, keimah ruahnak tu chim ka duh. Zumtu pakhat dirhmun incun Magid (Chemical Ali) an thahmi hi ka lung a tha lo ngaingai. Kan minung hawi van thah ngaingai cu lung a tha hrim lo. Nain, ka ruah chihmi tu cu, Chemical Ali an thahmi nih sullam a ngeihter ngaimi pakhat cu, 1988, 1991, le 1999 lio i amah nih a rak thah i lei dai tangah a um cangmi hna caah "JUSTICE" (dinnak) hi a um rih ko ti kha a langhter. Cucaah, Chemical Ali an thahmi hi teirulhchamnak (revenge) si loin, JUSTICE nih a hei chuahter mi thil tu a si tiah ka ruah ko. Cun, vawlei i uktu thalo pawl (Than Shwe phun) caah ralrinnak petu tha a si ka ti fawn. Nang zei tin na ruah ve?

Pa Pum
Princeton

Saturday, January 23, 2010

Nang Zei Dah Na Hman Bik?

Minung nih thil kan tuahmi hi phun thum in a um. Phun khatnak cu kan mit (eyes) le kan thinlung (heart) in a si. Cu ahcun, hmuhnak, lungfiannak, thimnak, dawtnak, ruahnak, manngeihternak ti pawl hi an i tel.

Phun hnihnak cu kan ka, kan hna, kan hmur, kan lei, kan or, le kan ha hna in a si. Cu ahcun, chimhnak, theihnak, hlasak, biakam, chiatserh, biangaih, biathiam, daih, tah ti bantuk hi an i tel.

Phun thumnak cu kan kut, kan ke, kan kutdong, le kan kedong hna in a si. Cu ahcun, kalnak, thutnak, dirnak, donghnak, limnak, le tialnak ti bantuk hi an i tel.

Mi pakhat nih thil a tuah tikah a cunglei i langhtermi chungin a zei maw kha a hman ti nak a si. Atu hi ca ka tial caah phun thumnak ka hman, cun ka ruahnak le hmuhning ka langhter ah phun khatnak zong ka hman thiam.

Nang zei dah na hman bik? Kei nih tah zei dah ka hman bik? Zei bantuk hman ahdah a that bik lai, ruah awk tlak ngai a si.

Thursday, January 21, 2010

Nihin Rawl: Ka "Ngu" Sual

Tuni cu voidang tawn bantuk in ca ka rel. Ka carel ding a tam i, ka ba pah. Baibal lei thiamsang a simi Karl Barth kong ka rel. Tlawmpal ah, ka ngu diam ko. Ka lung zong a fim set lo. Ka hlauh tikah, ka lung ah a chuakmi cu kan Baibal ah "ngu" timi hi zei bantuk caan ah dah a rak um ve hnga, ti a si. Ka kawl i, a tanglei hi ka hmuh hna:

Cun zohhmanh, innka a cawngtu cu changvut kha a thian i sihmanhsehlaw a ngu i aa hngilh ai; cucaah Rekhab le a unau Baanah cu a thli tein an lut.
- 2 Samuel 4:6

Israel hupphengtu cu a ngu bal lo i aa hngilh bal lo.
- Salm 121:4

Ahohmanh a bami an um lo, ahohmanh a rilmi an um lo, ahohmanh a ngu i aa hngilhmi an um lo. Taisawm a dormi pakhat hmanh an um lo, kedan hri a catmi pakhat hmanh an um lo.
- Isaiah 5:27

Nupi ṭhi tlangval cu a rauh caah ngaknu hna cu an ngu i an i hngilh.
- Matthai 25:5

Tlangval pakhat a min Zutikhas an timi kha thlalangawng ah khan a ṭhu i Paul nih ngol loin a chim lengmang caah cun a ngu chin lengmang ve i a donghnak ah cun hngilh taktak tein aa hngilh i inncung dot thumnak cun vawlei ah a tla. An vung char i a thi ko.
- Lamkaltu 20:9

Ngut lo ding caan i ngut a rak poi ning cu a cunglei cacaang hna nih an chim. Cun, kan biakmi Pathian cu zei tik hmanh ah a ngu bal lomi le aa hngilh bal lomi a si zong a kan cawnpiak. Kan biakmi Pathian hi ngut hmangmi hei siseh law? Nain, kan Baibal nih cun Pathian cu a "ngu" bal lo a ti.

Wednesday, January 20, 2010

Tuesday, January 19, 2010

Thatnak Tuin

Korean move ka zoh i, cu nih cun vawleicung thil umtuning fiang ngaiin a langhter. A nu sinin a pa a rak chut tu, a nu-ei teirulh cham a duh tikah, zei sualnak a ngei lomi amah a nau cia tu harnak le fahnak a pek. Cun a nu caah ka lehrulh hna a ti nain a nu lila lungrethei in a tuah.

Midang nih kan cungah thatlonak an tuahmi kan lehrulh hna tikah kan i nuam hlei lo. Ngaihchiatnak le lungretheihnak tu kan i sawm. Kan cungah an tuah cangmi cu let than awk a tha ti lo. Midang cungah kan tuah cangmi zong let than awk a tha ve lo.

Fahnak a kan petu kan lehrulh tikah zeihmanh a thei lomi, pehtlaihnak zei hmanh a ngei lomi, an chungkhar cungah fahnak kan tuah theo tawn. Thatlonak kha thatlonak in kan lehrulh tikah thatlonak a ngan chinchin mi a hrin.

Midang nih a dang midang cungah thatlonak an tuahmi kong ah a chim le a rel cu a fawi ngai. Sihmanhsehlaw, kanmah zawn ah thil a hung chuah tikah cun thil har ngai ah a cang. A chim le a rel hi cu thiam le ti khawh cio a si. Nain, a tuah taktak belte cu thil fawi a si lo. Kanmah le kanmah midang cungah kan ngeihmi lungput, thil thalo kan cungah an tuah(sual)mi zei tin dah kan leh tawn ti hi ruah a hau.

Ka cungah thatlonak timh buin an tuahmi si loin an tuah sualmi hmanh ngaihthiam dingah ka harh theo. Mi thangchiat hi a tha lo ti cu, ka chim ko nain, keimah zong zei hlei hlah. Ka tuah theo tawn. Ka theih than, ka lungfim tikah cun ka rak chim cang. Let awk a tha ti lo.

Jesuh nih a kan cawnpiakmi cu a nem tein thil tuah kha a si. Nemnak (non-violence) hi hriamnam tha bik cu a si ko. Thatlonak kha kan tanh lai lo. Nain, thatlonak cu thatnak in tei khawh kan i zuam lai. Thatlonak tuahmi cu zei tik hmanh ah thuh awk a tha lo. A hun lang than tawn. Jesuh nih cucu fiang tukin a hngalh. “Lehrulhnak” hi thatnak in a si lawngah hmailei lam a tluang lai.

Sunday, January 17, 2010

Haiti Lihnin Kong Ah

Atu lio i Haiti rammi nih an tonmi thil cu, zapi theih a si. Li aa hnin ruangah minung tam tuk nunnak a liam. Atu tiang fiang tein an theihmi a thimi milurel hi a tlawm ti lo. A thimi hi 200,000 tiang cu an phan te men lai, tiah an ruah. An tonmi thil kong thawngpaang ngaih le hmanthlak hmuh tikah thinlung a kuai. Ngaihchia tuk a si. Maw Van law, ti lawng a tang ko.

UN le US cozah zong nih biatak tein bawmh dingin an zuan hnawh colh hna. US President pathum President Clinton, President Bush, le atu lio President Obama nih heh tiah bawmh dingin mipi an hruai hna. Anmah lawng hlah, ram kip in an zuan hnawh cio hna. Organization tampi nih an zuan hnawh colh ve hna. Biaknak bu pawl nih an zuan hnawh colh ve hna. Cu lakah cun, American Baptist Churches zong an i tel. Atu lio ahcun, a nung rihmi kha zei tin dah kan bawmh hna lai ti le, inn cimhmi tangah a nungmi, chanh awk tha an um hnga maw tiah biatak tein an i zuam lio a si. Laimi biaruahnak zong ah, Laimi nih i tel khawh i zuam ve hna usih, tiah an ti. Harnak a tongmi hna bawmh hi Pathian duhnak zong a si.

Hi bantuk harnak thil vawleicung ah a can tikah, a tlangpi in, minung phun hnih hmuh khawh an si. Phunkhat nih cun, zei ruang ah dah hi thil hi a can, a chuah, (why) ti hngalh an duh i, cu kong ahcun an buai. A dang phunkhat nih cun, atu hi zeiruang ah (why) timi ceih caan a si lo, zeitin dah (how) kan bawmh khawh hna lai, ti i zuam a herh, an ti. Nai ah TV in phung a chim tawnmi Pat Robertson nih "Haiti mi hna nih hi harnak hi an i sawmmi a si" tiin a chim. HIKA ah zoh khawh a si. Mipi thin a phawh tuk i, US a cozah lei i biachimtu pakhat nih cun "stupid" tiah a ti. Molh taktak a si. Minung tampi an thih i, harnak le ngaihchiatnak in an khah lio i, an sualnak ruangah ti cu, Pathian ka zum a timi kaa in a chuah ding hrimhrim a si lo.

Pat Robertson lawng hi, atu bantuk in a ruatmi a si lo. Kawlram i Cyclone Nargis ruang i mi tampi an nunnak a liam lio ah Kawl cozah cungah Pathian nih dantatnak tlunter a duh i a si lai tiah a ruatmi le a chimmi zong an um. Cun Tuluk ram ah li aa hnin i mi tampi an thih lio ah, Actress minthang Sharon Stone nih "karma" ruangah a si hnga maw tiah, a chim i, Tuluk mipi an thin hung tuk ti a theih tikah ka palh tiah a nawl than hna. Hika zawn ah biahalnak a ummi cu: Harnak a tongmi hna nakin kan tha deuh maw, kan ding deuh maw? Khrihfami nih cun, cu ti cun ruah ding a si lo. Pathian hi dantat hmang rumro in kan hmuhmi hi, a ngandam lomi zumhnak le hmuhning a si. Baibal tha tein kan rel lo caah si tawn fawn.

Cu caah, hawile hna, Haiti nih hi bantuk harnak an ton tikah, zeiruang ah timi kong ah a buaimi si loin zeitin dah kan bawmh khawh hna lai, ti tu hi kan lungput a si awk a si. Hmailei zong ah kan vawleicung ah atu bantuk thil hi, an cang rih ko lai. Zumtu nih cun zeitin dah harnak a tongmi, ngaihchiatnak a tongmi caah thazaang kan si lai, tihi kan dirpi deuh awk a si. Kan chawva in kan telpi khawh hna ahcun cucu duh a si; nain, kan chawva in kan telpi khawh hna lo hmanh ah kan tuah khawhmi a um. Cucu an caah thlacamnak hi a si.

Thursday, January 14, 2010

Nihin Rawl: Bawipa Thatnak

Maw BAWIPA Pathian, nangmah nih kan caah thil tampi na tuah; nangmah bantuk ahohmanh an um lo.
Nangmah nih lam thatha tampi khua na kan khan piak.
An dihlak in chim i tim ninglaw a chim hmanh ka chim cawk hna hnga lo.
- Salm 40:5

Wednesday, January 13, 2010

Nihin Rawl: Lam Thar asiloah Nun Thar

Lam thar kan ti zong, nunnak thar kan ti zong ah an chim duhmi aa khat ko. Tharnak kong kha an chim veve. A tanglei Baibal caang hna nih "thar" kong a kan cawnpiakmi hi a sullam ruat buin rel kan sawm hna:

Nawlbia thar kan pek hna: pakhat le pakhat i daw u. Keimah nih kan dawt hna bantuk hin pakhat le pakhat nan i dawt awk a si.
- Johan 13:34

Va kal ulaw biakinn chungah khan va dir tuah u, cun mi zapi kha hi nunnak thar kong kha va chim hna u.
- Lamkaltu 5:20

Hi bel hi ka tuah tiah nangmah hmai ah ka ti khawh: Keimah cu Lam thar a zulmi ka si . . . i cu ti ning cun kan pupa hna Pathian cu ka biak.
- Lamkaltu 24:14

Ti chung i hnim kan vung si ah khan amah he vui ti kan si a si i a thihnak ah khan kan thi ve; cu bantuk thiamthiam in Khrih cu Pa sunparnak nih a thawhter bang khan kannih zong nunnak thar ah kan nung ve lai.
- Rom 6:4

Sualnak thilnu hlun cu nan chungah rian a tuan. Nannih cu a tharte in rawhmi changreu nan si nakhnga cu thilnu hlun cu hlonh u. Khrihfa nan si bantuk in nannih cu thilnu telhlomi Lanhtak puai changreu cu nan si.
- 1 Korin 5:7

Mi zeihmanh hi Khrih he an i pehtlaih tikah cun mi thar a si; a nunning hlun kha a lo cang, nunning thar kha aa thawk cang.
- 2 Korin 5:17

Tuesday, January 12, 2010

Himnak Bawi A Si

A tanglei hla hi a sullam zong a tha, a hla aw zong a tha, hlasatu zong a thiam tuk ka ti. Na ngaih cia a si zong ah ngai than rih ko hmanh, a tha chin in na theih lai.

Monday, January 11, 2010

A Hram le A Nge


CIM Caanhmannak (10th January, 2010)

Caantlaitu: Ngun Thawng Lian, Japan
Thawngtha chimtu: Dr. Van Hmun Lian, Japan

Bawi Krih ah zumtu dihlak,

Pathian dawtnak, velngeihnak le daihnak cu zumtu dihlak nan cung ah um ko seh.

Psalm 128:1,2
"Bawipa a ttihmi cu mi lunglawm an si, a nawl a ngai mi cu mi lunglawm an si. Rian na ttuan tik ah nangmah pawcawmnak khin na hmuh lai i na lung aa lawm lai i khua awng na pem lai".

Nihin thawngtha bia a kan chimtu cu Dr. Van Hmun lian asi. Kawlram ah sianghlei ruun a cawn dihin Philipine ah M.Div le Doctor of Ministry a awng. Achungkhar (nupi le fanu) he Tokyo ah an um. Laitlang a khua cu Tlangpi asi i Thantlang ah a tthangmi asi. Thawngtha bia a kan chimhnak cung ah lawmhnak nganpi kan nei. Bawipa nih kan dihlak caah thlachuah pe ko seh.

(Dr. Van Hmun Lian)

Thawngtha bia kan ihrawm hlan ah 'Bawipa ka thinlung mit au ter' timi Pathian thangtthatnak hla ngai ta hna usih.

Dr. Van Hmun Lian:-

Tukum 2010 voihninhnak Pahian ni ah maivan thawngttha hrawmttinak ah thawngttha chimnak ka hmuh caah, kan biak mi kan Pathian cung ah le thawngttha chim a ka fial tu, careltu nan dih lak cung ah lunglomhnak chimcawklo ka ngei.

Tu chun can ah nan sin ah ruah tti awk ka duhmi atlangtar cu, a Hram le a Nge (Root and Branches) ti asi lai.

Baibal ca kan rel hmaisa hna lai,

“Israel mi, Jakob tefa hna cu thingkung bangin hram an thla lai i an kuhkulul lai i an par lai. Vawlei cu an tlai kha a khat dih lai” Isaiah 27:6

“Pathian Pennak cu zei he dah aa lo, kan ti lai? A sullam langhternak ding ah zei tahchunhnak dah kan hman lai? Vawlei cung thlaici lak I a hme bikmi antam ci bantuk asi. Mi nih an I lak I vawlei ah an tuh; cun tlawmpal hnuah a hung tthang I thlaihring kung lak I a ngan bik ah a cang. A nge kha a ngan pipi an si caah vate kha an ra I a thladem ah bu kha an ser” Marka 4:30-32

Kan Laimi mi tampi hmurka in ka theih tawnmi bia pakhat cu, “Laimi le Khrihfa cu a tthenkho lomi kan siti hi asi” Asi ttungah, Laimi kan umnak hmun pohah, Khrihdawtnak alanghtertu maw kan si, Khrih mui achiattertu le Khrih zumhnak lei ah a donhkhantertu dah kan si ti hi, tuchun can ah kan ruahawk asi cang ti ah ka ruah.

Kan relmi baibal cang i a langternakduhmi hen pehtlai in chim ka duhmi cu, minung kan umnak (exist) cu, minunghna nih tefa an rak ngeih ruangah cu tefa hna nih tefa chin an rak ngeih ruang ah asi ko. Cu ve bantuk cun, Khrihfabu asiloah khrihfa mi kan tthancho kan ti lai maw, kan hmunhkhawhnak (exit) zong cu kan biak mi Pathian rian kan ttuan ruang ah asi ko. Biadang deuh in kan chim asi ah cun, Khrihfa ka si kan i ti ttung ah cun, Pathian penank karhter ding le Pathian nih tuah uh tiah a kan fialmi rian ttuan kha a biapibikmi asi ko. Kan mah ca lawng ah nun ding kan si ti lo (Matt 6:33; 28: 18-20). Keimah pumpak kazumhning ah Khrihfa kasi ati ve mi nih cun, Pathian dawtnak le a vel kha kan umnak hmun pohah kan chimding le kan phuanding asi. Cu lawng cu si lo in, kan nunning le kan ziaza zong nih Pathianfa kan sinak kha kan langhterding zong asi fawn. Pathian bia kan chimnak le kan tuahnak nih, kan pawngkam ummi mi tampi nih Pathian hngalhnak le zumhnak lei ah kan kalpinak hna lawng si lo in Pathian kha a ka khamhtu le ka Bawipa asi ti zong an conghlan khawh ve lai. Hi thil hi ruahbuin, tlawmpal nan sin ah chim ka duhvemi le Laimi khrihfa tthanchonakding caah ruahawk ka duhvemi cu:

Pathian bia ah kan nunnak bunh hmaisa hna usih.
Kan Laimi kan tthanchokhawhnakding caah cun, kan Khrihfa sinak le kannunnak hi Pathian bia ah bunh hmaisa hna usih. Inn kan sak tikah fekseh law saupi hmunseh ti kanduh ahcun, a pakhatnak ah, Foundation ttha tein ka tuah hmaisa. Foundation a tthat lo maw, afehlo ah cun, thlichia a hrangtikah fawite in inn a rawktawn. Cu ve bantuk cun, Pathian bia ah kan nunnak kan bunh hmaisa lo ahcun, evangelist pawl nih maw a kankaltak tik asilo ah kan pastor te hna an umlo ah cun, Baibal ca rel le thlacam chimlo Biak inn kal zong kan duh tilo. Cu caah cun, Khrihfa asi mi nihcun kan nunnak hi Pathian bia ah kan I bunh hmaisa lawng ah kan tthancho kho lai I theittha zong kan tlai kho lai. Zeibantuk harsatnak ah siseh zeibantuk harnak (Problem) kan nunnak ah kan tontik zong ah zumtu asi mi nihcun, Pathian bia le hla tu in theikhawh kan I zuam ding asi. Thilpakhat kan philh loding cu, harsatnak caan ah siseh lunglomhnak can zong ah siseh Pathian cu kan sinah a um peng ti kha kan philh lo ding asi. Cu ticun kan nunnak hi abiachung ah fekte in kan dir I Khrihdawtnak in nifa kan nunnak kha kan tthanterding asi.

Jesuh cawkpiaknak chung ah nungcanghna usih.
Kan Laimi kan thanchonakding cah ka ruahmi pakhat cu, kan thinlungchung ah Jesuh Khrih a kan cawnpiakmi kha kan I cinken I cuticun nifate kan nunnak ah lam a kan hruaitu ah kan I serding le hmanding asi. Zeithil kan tuahmi pohhi a pakhatnak ah chuahtertu le a kan tuahtertu cu kan lungthin (heart) hi asi bik rua dah tiah kazumh. Phungthlukbia ttialtu pa nih cun hitin achim, “Na lung kha ttha tein veng tuah, zeicahtiah cuka cun nunnak certi kha a put” (4:23). Nifatin kan nunnakding caah le harsatnak ruangah hin, minung kan lungthin hi khulrang tein le fawi tein khatte lei khatte lei ah a kal tawn. Cu caah, kan thinlung kan venkhawhnak ding ca ah cun, nifate zeithil kantuahhlan ah, Baibal relnak in siseh thlacannak in siseh Pathian hen kan I tonhmaisa a hau. An chimtawnmi biapakhat cu, “Zeibantukhmanh hi fawi tein cawnkhawh le thiamkhawh asi lo, (or) Rome khualipi cu nikhat ah ansa lo ti asi.” cuvebantuk cun, Khrihfa nun kan timi zong hi nikhat calawngah ah azabel lo. Biafak deuh in kan chim asi ah cun, ka piangthar cang ti lawng hi aza lo, amah muicuang in sermi kan si I cuvebantuk cun kan nunding, kan tuahveding le theikan tlaiding hi asi cang. Kan Baibal ca nih ka kan cawkpiakmi cu, “Mi nih a tuhmi cu a zun ko lai” (Galati 6:7). Cu caah cun, nifate kan nunnak ah hin Baibal ca hi kan lam hruaitu ah I ser hna usihlaw cuticun tthangcang hna usih, tukumchung le ara laimi kumchung ah cun. Kanchimkhawhmi cungah Pathian ni thlawchuahnak kan pekpiak ko seh.

Upatnak he
Van Hmun Lian,
Tokyo

Theihternak: January 10, 2010 ni CIM caan hmannak kan tarmi a si.

Sunday, January 10, 2010

Nihin Rawl: Damnak le Nunnak

Dam a biapi. Ngandam tein um hi Pathian thluachuah kan hmuhmi a si. Kan damlo tikah zei hmanh a nuam ti lo. Damlo tikah kanmah pumpak ca lawng ah si loin midang ca tiang ah thilrit a si. Cu caah, hawile hna, Pathian nih damnak in pe cio ko hna seh! A tanglei hi kan Baibal chungah damnak le nunnak kong he pehtlai in tampi a ummi chungah tlawmpal an si.

"BAWIPA nan Pathian ka bia kha tha tein nan ngaih i a ding ka timi kha nan tuah i ka nawlbia kha nan zulh hna i ka phunglam kha nan tuah hna ahcun, Izipt mi cungah ka tlunter mi rai kha nan cungah ka tlun ter lai lo. Keimah cu an dam tertu hna BAWIPA ka si," a ti.
- Exodus 15:26

BAWIPA nan Pathian lawng kha nan biak lai i ti le rawl in thluachuahnak kan pek hna lai i nan damlonak vialte kha kan lak piak hna lai.
- Exodus 23:25

Pathian nih, "A ka dawmi cu ka khamh hna lai i a ka hngalmi cu ka huhphenh hna lai. An ka auh tikah ka leh hna lai i harnak an in tikah ka umpi hna lai. Laksawng ah nun sau ka pek hna lai i ka khamh hrimhrim hna lai," a ti.
- Salm 91:14-16

Maw ka nunnak, BAWIPA cu thangthat tuah! Ka sining vialte, a min thiang cu thangthat tuah u! Maw ka nunnak, BAWIPA cu thangthat law, ka sualnak vialte kha a ka ngaihthiam i ka zawtnak vialte kha a ka damter; thlan chungin a ka khamh i dawtnak le zaangfahnak he thluachuah a ka pek; ka nunnak cu thil tha in a khahter i cucaah ka no peng i mupi bantuk in ka thawng.
- Salm 103:1-5

A nawlbia in a damter hna i thlan chungin a khamh hna.
- Salm 107:20

Sihmanhsehlaw hma a in cu kan sual ruangah a rak si i tuknak a huah cu kan thatlo ruangah a rak si. A in mi dantatnak in luatnak kan hmu i an tuknak vual in damnak kan hmu.
- Isaiah 53:5

Cun thinghmuipa pakhat kha a ra i a hmai ah khuk bik in a kun i, "Bawipa, na duh ahcun na ka damter khawh ko," tiah a si. Jesuh nih a hei banh i a tongh i, "Ka duh. Thiang ko cang," tiah a ti. Chikkhatte ah a zawtnak thinghmui--zawtnak khan a thiang.
- Matthai 8:2-3

Mifir cu fir duh le thah duh le hrawh duh lawngah an ra. Kei cu nunnak kha an ngeih i duhdimte in an ngeih nakhnga caah ka ra.
- Marka 10:10

Ka dawtmi ka hawi, ngandam tein khua na sak i zeizong vialte na caah remte in a um nakhnga thla kan cam piak.
- 3 Johan 2

Sunday, January 3, 2010

Khrih Ah Mithar

"BAWIPA SININ KUMTHAR LOMHNAK LE THLACHUAHNAK CU NAN DIHLAK CUNG AH UM KO SEH"

CIM Caanhman nak (3rd January, 2010)

Caantlaitu: Ngun Thawng Lian, Japan
Thawngtha chimtu: Rev. Lal Pek Lian, Malaysia

2010 akan phanhter tu kan Bawipa Pathian min thangtthat si ko seh. Pathian Dawtnak, Velngeihnak le Daihnak cu Zumtu nu le Pa nan dihlak cung ah um ko seh.

Psalm 103:1,2 "Maw ka nunnak Bawipa cu thangtthat tuah! Ka sining vialte a minthiang cu thangtthat tuah uh! Maw ka nunnak Bawipa cu thangtthat law zeitluk in dah zaangfahnak a ngeih kha philh hlah."

Nihin thawngtha bia a kan chimtu Chin Christian fellowship, Malaysia ah Pastor a ttuan lio mi Rev. Lal Pek Lian cung ah lomhnak nganpi kan nei. Bawipa nih kan dihlak caah thlachuah kan pek piak hram seh tiah thlaza kan cam.

Thawngtha bia kan ihrawm hlan ah "Ruahchan nak ttha bik" Pathian thangtthatnak hla ngai ta hna usih.

Rev. Lal Pek Lian:-

Khrih Ah Mithar

"Mi zeihmanh hi Khrih he an i pehtlaih tikah cun mi thar a si; a nungning hlun kha a lo cang, nunning thar kha aa thok cang." 2 Kor. 5:17

2010 dam te le lawmte in a kan phanh tertu Pathian min thangthat si ko seh! Hi kum thluan chung zong ahhin Bawi Jesuh he kan kal tti ahcun khua awng kan pemh lai i thluachuah vanluh kan hmu ko lai. Hi kum thluan chungah hin Bawi Jesuh he kan kal tti lo ahcun tukforhnak rap nih a kan foih tik ah kan i hlitphuak kho lai lo, ningttihnak chungah kan pil ko lai. 2009 ah zumhawktlak Pathian nih a kan hruai bantukin zumh awktlak te in kan nun ve ahcun 2010 zong ah lungthlitum a kheng khomi, teitu kan si ve ko lai. Cucaah Paul nih Efesa khuami hna sin ah a rak chim bang, "zeizong kip caah Jesuh Khrih min in Pathian cu lawm ko usih," a timi hi kan i lawmhnak raithawinak si hram ve ko seh!

Paul hi a hlan a min ah Saul a si. Mi lianngan tinak a ngeimi min a si. A min hi a rak i nunpi khawh ngai. Phunhram lei ah Benjamin hrin a si i vawleicung sianghleirun i a pathumnak ah an chiahmi Tarsus chuak a si. Biaknak lei ti ah minthang bik pakhat i ruahmi Gamaliel kut tang ah a tthangmi a si. Amah kutke cung te ah a dir kho bakmi a si. Bochan awktlak taktak a si. Jesuh Khrih zultu pawl, khrihfa hmasa hna hrem ah san a tlai ngaingaimi a rak si. Damascus lam i Jesuh nih ceunak in a hun kah i a ton tik ah a nun kha aa thleng.

Ceunak nih kan nun a kah taktak tik ahcun thlennak kan ngei. Cu thlennak tawh tlaitu cu Jesuh Khrih a si. Cu thlennak a chak a merhtu cu Jesuh Khrih a si. Aa thlengmi, minu mipa i a sining vialte kha ceunak chung ah a luhpi. I phuhrunnak pakhat hmanh a um ti lonak, i porhlawtnak pakhat hmanh a um ti lonak ceunnak innpi chungah cun a luhpi. Muihnak nih a ngiar len zong ah a tei kho lo.

Mi lianngan tiah sullam a ngeimi Saul min khan mi hmete tiah sullam a ngeimi Paul min ah Paul cu ceunak nih cun a nun a thlen. Cu hlan ah Jesuh Khrih a hrem tawntu pa cu Jesuh Khrih sal ah aa cang i thawngtha ruangah mi vilate sal ah aa ser ngammi pa a si. Hihi thlennak taktak cu a si i, hrinthan kan timi cu a si.

2010 hi ceunak nganpi nih kan nun hi a thar in kan kap tthan sehlaw Paul bantukin nun aa thleng ngammi si ding ah Bawipa sin ah kan pum i pe hna usih. Jesuh Khrih ah nunning thar ah nun tti hi Laimi khrihfami nih kan herh bikmi nun a si. Phuhrunnak le porhlawtnak pelpawi te hmanh a ngei lomi nun in 2010 cu Jesuh Khrih he nung tti hna usih.

Lawmhnak he,
Lal Pek Lian

Theihternak: January 3, 2010 ni CIM caan hmannak kan tarmi a si.